Komaduan Awaran

29 Si Hezekias+ et mantaon na 25 sanen nagmaliw ya ari, tan 29 taon a nanuley ed Jerusalem. Say ngaran na ina to et Abia ya anak nen Zacarias.+ 2 Sikatoy nantultuloy a nanggaway duga ed pakanengneng nen Jehova,+ a singa ginawa nen David ya inmunan ateng to.+ 3 Diad unonan bulan na unonan taon na uley to et nilukasan to ray kapot na abung nen Jehova tan inapiger to iratan.+ 4 Insan tinipon to ray saserdote tan saray Levita diad plaza ed bandad bukig. 5 Inkuan tod sikara: “Dengel yo ak, sikayo ran Levita. Pasantos yoy inkasikayo+ tan pasantos yoy abung nen Jehova a Dios na inmuunan atateng yo, tan ipaway yod masanton pasen so antokaman ya aliwan malinis.+ 6 Ta saray kaamaan tayo et agnanmatoor tan nanggawa ray mauges ed pakanengneng nen Jehova a Dios tayo.+ Sikatoy tinaynan da tan agda labay ya iyarap so lupa ra ed tabernakulo nen Jehova tan sikatoy imbeneg da.+ 7 Insara da met iray kapot na balkonahe+ tan inerep da ray lamparaan.+ Tinmunda la ran mamool na insenso+ tan mangiyapay na saray bagat a popoolan+ diad masanton pasen parad Dios na Israel. 8 Diad ontan et sinmanok si Jehova ed Juda tan Jerusalem,+ kanian ginawa to ra a bengatlan pakataktakotan, pankelkelawan, tan panngisiwan,* a singa nanenengneng yon mismo.+ 9 Saray inmuunan atateng tayo et pinapatey ed espada,+ tan inaala iray anak tayon lalaki, anak tayon bibii, tan saray kaasawaan tayo lapud saya.+ 10 Natan, pirpirawat na pusok a misipanan ed si Jehova a Dios na Israel,+ pian onkepay mandarlang a sanok tod sikatayo. 11 Ananak ko, aliwan natan so panaon pian magmaliw kayon mapaulyan,* ta pinili kayo nen Jehova pian onalagey ed arapan to, magmaliw a lingkor to,+ tan manpaasewek na saray bagat ed sikato.”+

12 Diad saman et kinmiwas iray Levita: si Mahat ya anak nen Amasai tan si Joel ya anak nen Azarias a sakey ed saray Kohatita;+ diad saray Merarita+ et si Kis ya anak nen Abdi tan si Azarias ya anak nen Jehalelel; diad saray Gersonita+ et si Joa ya anak nen Zima tan si Eden ya anak nen Joa; 13 diad saray ananak nen Elizafan et si Simri tan Jeuel; diad saray ananak nen Asaf+ et si Zacarias tan Matanias; 14 diad saray ananak nen Heman+ et si Jehiel tan Simei; tan diad saray ananak nen Jedutun+ et si Semaias tan Uziel. 15 Diad ganggan na ari unong ed salita nen Jehova et tinipon da ray agagi ra tan pinasantos day inkasikara tan linma ra pian linisan so abung nen Jehova.+ 16 Tan saray saserdote et linmoob ed abung nen Jehova pian manlinis ira tan impaway day amin a marutak a bengatla ya aromog dad templo nen Jehova tan inawit dad sular+ na abung nen Jehova. Insan inaala iratan na saray Levita tan inawit dad paway tan imbantak dad Lawak na Kidron.+ 17 Kanian ginapoan day panagpasantos diad unonan agew na unonan bulan, tan diad komawalon agew na sayan bulan et asabi day balkonahe na abung nen Jehova.+ Pinasantos day abung nen Jehova diad loob na waloran agew, tan asumpal ira diad koma-16 ya agew na unonan bulan.

18 Kayari na satan et linma rad si Arin Hezekias tan inkuan da: “Alinisan mi lay interon abung nen Jehova, say altar parad apay a popoolan+ tan amin a kagawaan ditan,+ tan say lamisaan na nantatapewan a tinapay*+ tan amin a kagawaan ditan. 19 Tan amin a kagawaan ya impireg nen Arin Ahaz legan na uley to sanen impatnag toy ag-inkamatoor+ et imparaan mi tan pinasantos mi,+ tan wadman la iratan ed arapan na altar nen Jehova.”

20 Et asakbay a binmangon si Arin Hezekias tan tinipon to ray prinsipe na syudad, tan linma rad abung nen Jehova. 21 Angawit ira na pitoran kalakian a baka, pitoran kalakian a karnero, pitoran kalakian a kordero, tan pitoran kalakian a kanding bilang apay parad kasalanan. Saraya so iyapay parad panarian, parad santuaryo, tan parad Juda.+ Kanian imbaga tod saray saserdote a kailalakan nen Aaron ya iyapay da iratan diad altar nen Jehova. 22 Et pinakgeran da ray baka+ tan say dala et inala na saray saserdote tan inwalsik dad altar;+ insan pinakgeran da ray kalakian a karnero tan inwalsik day dala diad altar, tan pinakgeran da ray kalakian a kordero tan inwalsik day dala diad altar. 23 Kayari na satan, saray kalakian a kanding ya apay parad kasalanan et inyakar dad arapan na ari tan say kongregasyon tan intapew day lima ra ed saratan. 24 Pinakgeran iratan na saray saserdote tan inyapay da bilang apay parad kasalanan. Inyan dad altar so dala na saratan pian manggawa na pananakbong ed interon Israel, lapud imbaga na ari a say apay a popoolan tan say apay parad kasalanan et nepeg ya iyapay parad interon Israel.

25 Kaleganan na satan, impasen to ray Levita diad abung nen Jehova, a de-awit ira na saray piangpiang, nandeles ya instrumento, tan saray arpa,+ unong ed totontonen ya inletneg nen David+ tan si Gad+ a mangipapasabi na pasingawey ed ari tan si Natan+ a propeta, ta satan a totontonen et inter nen Jehova diad panamegley na saray propeta to. 26 Kanian akaalagey iray Levita ya awit da ray instrumenton ginawa nen David, ontan met iray saserdote a de-awit na saray trumpeta.+

27 Insan ingganggan nen Hezekias ya iyapay lay bagat a popoolan diad altar.+ Sanen ginapoan lan iyapay so apay a popoolan, ginapoan met lan kansionen so kansion nen Jehova tan paknolen iray trumpeta, ya intumbok ed saray instrumenton ginawa nen Arin David na Israel. 28 Et dinmakmomo so interon kongregasyon legan na pangakansion ed satan tan pamapaknol ed saray trumpeta—nantultuloy iya anggad niyapay la so apay a popoolan. 29 Tan kayari ran angiyapay, say ari tan amin a kakaiba to et tinmalimukor tan dinmakmomo. 30 Et imbaga nen Arin Hezekias tan saray prinsipe ed saray Levita ya idayew day Jehova diad panamegley na saray salmo nen David+ tan nen Asaf+ a makakanengneng na pasingawey. Kanian malikeliket iran angiyapay na panangidayew, tan tinmalimukor tan dinmakmomo ira.

31 Diad saman et inkuan nen Hezekias: “Natan ta imbiig kayo la* parad si Jehova, singger kayo tan mangawit kayo na saray bagat tan saray apay parad pisasalamat diad abung nen Jehova.” Kanian say kongregasyon et angawit na saray bagat tan saray apay parad pisasalamat, tan amin a walaan na mabulos a puso et angawit na saray apay a popoolan.+ 32 Say bilang na apay a popoolan ya inawit na kongregasyon et 70 baka, 100 a kalakian a karnero, tan 200 a kalakian a kordero—amin iraya et inyapay ed si Jehova bilang apay a popoolan+— 33 tan saray arum nin masanton apay et 600 a baka tan 3,000 karnero. 34 Balet lapud aliwan magenap so bilang na saray saserdote, agda sarag a katatan so amin ya apay a popoolan, kanian tinulongan ira na saray agagi ran Levita+ anggad asumpal so kimey tan anggad napasantos na saray saserdote so inkasikara,+ ta saray Levita et mas manonot* ed panagpasantos na inkasikara nen saray saserdote. 35 Ontan met, dakdakel iray apay a popoolan,+ pati saray taba na saray bagat a pandurungoan+ tan saray apay ya iinumen a kabansag na saray apay a popoolan.+ Diad ontan et nipawil ed dati* so panaglingkor diad abung nen Jehova. 36 Kanian si Hezekias tan amin a totoo et nanliketan day ginawa na tuan Dios parad saray totoo,+ ta mapmaples itan ya agawa.