Ezequiel

37 Kinmiwas ed siak so pakayari* nen Jehova, tan diad panamegley na espiritu nen Jehova et inyakar tan inleksab to ak ed pegley na lawak,+ tan napno itan na pukepukel. 2 Pinaliber to ak ditan, tan anengneng ko a dakdakel so pukel ed satan a patar a lawak, tan amagamaga iratan.+ 3 Intepet tod siak: “Anak na too, nayari kasin ombilay irayan pukepukel?” Diad saman et inkuan ko: “Soberanon Katawan a Jehova, sika so makaamta.”+ 4 Kanian inkuan tod siak: “Manpropesiya kad sarayan pukepukel, tan ibagam ed sikara, ‘Sikayo ran amagaan a pukepukel, dengel yoy salita nen Jehova:

5 “‘Oniay inkuan na Soberanon Katawan a Jehova ed sarayan pukepukel: “Ikdan ta kayoy linawa, tan ombilay kayo.+ 6 Ikdan ta kayoy ula-ulat tan laman, tan balkoten ta kayoy baog tan ikdan ta kayoy linawa, tan ombilay kayo; tan naamtaan yo a siak si Jehova.”’”

7 Insan nampropesiya ak unong a niganggan ed siak. Sanen manpropropesiya ak, walay nadngel kon ungol, sakey a matalakutok a tanol, tan saray pukepukel et nantutuop, pukel ed pukel. 8 Insan anengneng ko ya awalaan ira na ula-ulat tan laman, tan abalkot ira na baog. Balet agni ran siansia onlilinawa.

9 Insan inkuan tod siak: “Manpropesiya kad dagem. Manpropesiya ka, anak na too, tan ibagam ed dagem, ‘Oniay inkuan na Soberanon Katawan a Jehova: “Manlapud apatiran dagem et onla ka dia, O dagem,* tan sibokan mo irayan pinatey a totoo, ta pian ombilay ira.”’”

10 Kanian nampropesiya ak unong ed ingganggan tod siak, tan awalaan ira na linawa,* tan abilay ira tan inmalagey ira,+ sakey a balbaleg ya armada.

11 Insan inkuan tod siak: “Anak na too, sarayan pukepukel et say interon sankaabungan na Israel.+ Ibabaga ran, ‘Amagaan iray pukel mi, tan naandi so ilalo mi.+ Sigpot kamin nisian ed arum.’ 12 Kanian manpropesiya ka tan ibagam ed sikara, ‘Oniay inkuan na Soberanon Katawan a Jehova: “Lukasan ko iray lubok yo+ tan ipaway ta kayo ed saray lubok yo, sikayo ran totook, tan iyakar ta kayo ed dalin na Israel.+ 13 Tan naamtaan yo a siak si Jehova sano lukasan ko iray lubok yo tan ipaway ta kayo ed saray lubok yo, O sikayo ran totook.”’+ 14 ‘Iyan kod sikayo so espirituk tan nabilay kayo,+ tan panayamen ta kayo ed dalin yo; tan naamtaan yon siak a mismo, si Jehova, so angibaga tan nanggawa ed satan,’ so imbaga nen Jehova.”

15 Oniay mensahe nen Jehova a sinmabi lamet ed siak: 16 “Tan sika, anak na too, mangala kay bislak tan isulat mo ditan, ‘Parad Juda tan saray totoo na Israel a kaiba to.’+ Insan mangala kay sakey nin bislak tan isulat mo ditan, ‘Parad Jose, say bislak na Efraim, tan say interon sankaabungan na Israel a kaiba to.’+ 17 Insan panabayen mo ra pian magmaliw iran singa saksakey a bislak ed limam.+ 18 Sano ibagad sika na saray kabaleyan mo,* ‘Agmo ta ibaga ed sikami no antoy kabaliksan na sarayan bengatla?’ 19 ibagam ed sikara, ‘Oniay inkuan na Soberanon Katawan a Jehova: “Alaen ko so bislak na Jose, a walad lima na Efraim, tan saray tribu na Israel a kaiba to, tan itekep ko iratan ed bislak na Juda; tan gawaen ko ran saksakey a bislak,+ tan magmaliw iran saksakey ed limak.”’ 20 Bembenan mo irayan bislak a pansulatan mo pian nanengneng da.

21 “Insan ibagam ed sikara, ‘Oniay inkuan na Soberanon Katawan a Jehova: “Alaen ko iray Israelita ed saray nasyon a nakar da, tan tiponen ko ra manlapud nanduruman direksion tan iyakar ko rad dalin da.+ 22 Gawaen ko ran sakey a nasyon ed dalin,+ diad kapalandeyan na Israel, tan amin da et uleyan na saksakey ya ari,+ tan agla ra magmaliw a duaran nasyon; odino naapag ni ra ed duaran panarian.+ 23 Agda la dutakan so inkasikara ed saray makapadimlan idolo* ra tan makapadimlan kagagawa ra tan amin a kasalanan da.+ Ibulos ko ra manlapud amin ya agmatoor a kagagawa ra a sengegay impankasalanan da, tan linisan ko ra. Magmaliw iran totook, tan siak a mismo so magmaliw a Dios da.+

24 “‘“Si David a lingkor ko so magmaliw ya ari ra,+ tan amin da et nawalaan na saksakey a pastol.+ Manakar ira ed saray ganggan ko tan maalwar dan sumpalen iray totontonen ko.+ 25 Manayam ira ed dalin ya inter kod si Jacob a lingkor ko, a ditan so nanayaman na saray inmuunan atateng yo,+ tan manayam ira ditan ed andi-anggaan,+ sikara tan saray ananak* da tan say ananak na saray ananak da;+ tan si David a lingkor ko so magmaliw a pangulo* ra ed andi-anggaan.+

26 “‘“Tan misipanan ak ed sikara na sakey a sipanan na kareenan;+ sakey itan ya andi-anggaan a pisisipanan ed sikara. Iletneg ko ra ed dalin da tan parakelen ko ra+ tan ipasen koy santuaryok ed limog da ed andi-anggaan. 27 Niwala ed sikara* so toldak,* tan siak so magmaliw a Dios da, tan sikara so magmaliw a totook.+ 28 Tan naamtaan na saray nasyon a siak, si Jehova, so mamapasanto ed Israel legan a say santuaryok et walad pegley da diad andi-anggaan.”’”+