Salmo
Parad direktor. Salmo nen David, pian onkanan panonot.
70 O Dios, komon ta iliktar mo ak;
O Jehova, tulongan mo ak pan tampol.+
2 Komon ta saramay malabay a mamatey ed siak*
Et nabaingan tan napabanday.
Komon ta saramay panliliketan day paniirap ko
Et onatras lapud kababaingan.
3 Komon ta saramay manmumudmora ed siak
Et onsener lapud nabaingan ira.
4 Balet komon ta saramay manaanap ed sika
Et manliket tan manggayaga lapud sika.+
Komon ta saramay mamapabli ed saray panangiliktar mo et naynay dan ibaga:
“Nitandoro komon so Dios!”