Isaias
2 Saya so anengneng nen Isaias ya anak nen Amoz nipaakar ed Juda tan Jerusalem:+
2 Diad kasampotan a parte na saray agew,*
Say palandey a kawalaan na abung nen Jehova
Et niletneg a malet ed tagey na saray toktok na kapalandeyan,+
Tan magmaliw itan a mas atagey nen saray pukdol,
Tan ondagsa ditan so amin a nasyon.+
3 Tan dakel a totoo so onla tan mangibaga:
“Gali, ontatdang itayo ed palandey nen Jehova,
Diad abung na Dios nen Jacob.+
Ibangat tod sikatayo iray dalan to,
Tan tumboken tayo iray basbas to.”+
4 Sikatoy mangukom ed saray nasyon
Tan ipetek to ray kaukolan ya ipetek parad dakel a totoo.
Pitpiten da ray espada ra pian gawaen a tarem na lukoy
Tan saray gayang da et gawaen dan palot.+
Anggapo lay nasyon a mangitagey na espada sumpad sananey a nasyon,
Agmet la ra manaral a miguerra.+
6 Ta pinaulyanan moy totoom, say sankaabungan nen Jacob,+
Lapud dakel so inalig dad saray taga Bukig;
Manguusar ira na mahiko+ a singa saray Filisteo,
Tan diad limog da et dakerakel so ananak na saray dayo.
7 Say dalin da et napnoy pilak tan balitok,
Tan agnabilang iray kayamanan da.
Say dalin da et napno na saray kabayo,
Tan agnabilang iray karwahe ra.+
8 Say dalin da et napno na saray andi-kakanaan a dirios.+
Ondadakmomo ra ed samay ginawa na saray dilin lima ra,
Ed samay ginawa na saray dilin gamet da.
9 Kanian napabanday so too, sikatoy nipaabeba,
Tan agmo ra nayarin perdonaen.
10 Loob kayo ed baleg a bato tan mankotkot kayo na amotan yo
Lapud makapataktakot a kiwawala nen Jehova,
Tan lapud katagyan na gloria to.+
Si Jehova labat so narayrayew ed satan ya agew.
12 Ta satan so agew a parad si Jehova na saray armada.+
Onsabi itan ed amin a mapaatagey tan mapangta,
Ed amin a niyatagey odino niyabeba,+
13 Ed amin ya ataragey tan niyatagey a kiew a sedro ed Lebanon
Tan ed amin a kiew a roble* ed Basan,
14 Ed amin ya ataragey a kapalandeyan
Tan ed amin ya ataragey a pukdol,
15 Ed kada atagey a tori tan malet a padir,
Tan ed amin a mararakep a baloto.
17 Niyabeba so mapaatagey a too,
Tan ontuek* so malastog a too.
Si Jehova labat so narayrayew ed satan ya agew.
18 Sigpot a naandi iray andi-kakanaan a dirios.+
19 Tan onloob iray totoo ed saray ungib
Tan ed saray abot ed dalin,+
Lapud makapataktakot a kiwawala nen Jehova
Tan lapud katagyan na gloria to,+
Sano sikatoy ontalindeg pian panggiwgiwen to so dalin lapud takot.
20 Diad satan ya agew et alaen na totoo iray andi-kakanaan a pilak tan balitok a dirios da
A ginawa ra pian dakmomoan da,
Tan ibantak da iratan ed saray utot* tan kaging,+
21 Pian makaamot ira ed saray ungib
Tan ed saray letak na angkakabaleg a bato,
Lapud makapataktakot a kiwawala nen Jehova
Tan lapud katagyan na gloria to,
Sano sikatoy ontalindeg pian panggiwgiwen to so dalin lapud takot.
22 Parad pankaabigan yo, agkayo la manmamatalek ed too,
A mandedepende ed dagem a susungapen to.*
Wala tay nagunggona ed sikato?