Ukom

3 Saraya so nasyon ya inabuloyan nen Jehova a mansiansia pian diad panamegley da et nasubok iramay amin a walad Israel ya agda ni asali akiguerra ed Canaan+ 2 (pian naeksperiensya na saray ontumbok a henerasyon na saray Israelita so miguerra, saramay agni akasali ed saratan a bengatla): 3 say limaran manuley na saray Filisteo,+ tan amin a Canaanita, saray taga Sidon,+ tan saray Heveo+ a manaayam ed Palandey Lebanon+ manlapud Palandey Baal-hermon ya anggad Lebo-hamat.*+ 4 Nausar ira pian suboken so Israel no kasin tuloken da ray ganggan nen Jehova ya inter tod saray kaamaan da diad panamegley nen Moises.+ 5 Kanian nanayam iray Israelita ed limog na saray Canaanita,+ Heteo, Amoreo, Perizeo, Heveo, tan saray Jebuseo. 6 Inasawa da iray bibii ed sarayan nasyon, tan inter da iray ananak dan bibii ed saray lalaki ed sarayan nasyon, tan nanlingkor irad saray dirios da.+

7 Kanian ginawa na saray Israelita so mauges ed pakanengneng nen Jehova, tan nilingwanan day Jehova a Dios da tan nanlingkor irad saray Baal+ tan ed saray sagradon poste.*+ 8 Diad saman et dinmalang so sanok nen Jehova ed Israel, tan inlako to ra ed si Cusan-risataim ya ari na Mesopotamia.* Waloy taon a nanlingkoran na saray Israelita si Cusan-risataim. 9 Sanen kinmerew na tulong iray Israelita ed si Jehova,+ anuro si Jehova na sakey a manangiliktar pian iliktar to iray Israelita,+ salanti, si Otniel+ ya anak nen Kenaz, say yugtan nen Caleb. 10 Niwalad sikato so espiritu nen Jehova,+ tan sikatoy nagmaliw ya ukom na Israel. Sanen sikatoy akiguerra, inyawat ed sikato nen Jehova si Cusan-risataim ya ari na Mesopotamia* kanian tinalo toy Cusan-risataim. 11 Kayari na satan, say dalin et awalaay kaligenan* ed loob na 40 taon. Insan inatey si Otniel ya anak nen Kenaz.

12 Tan ginawa lamet na saray Israelita so mauges ed imaton nen Jehova.+ Kanian inabuloyan nen Jehova a taloen nen Eglon ya ari na Moab+ so Israel, ta ginawa ray mauges diad pakanengneng nen Jehova. 13 Ontan met, inyakar tod sikara iray Ammonita+ tan Amalekita.+ Nilusob day Israel tan sinakop da so syudad na saray kiew a palma.+ 14 Nanlingkoran na saray Israelita si Eglon ya ari na Moab ed loob na 18 taon.+ 15 Insan kinmerew na tulong iray Israelita ed si Jehova,+ kanian anuro si Jehova na sakey a manangiliktar,+ si Ehud+ ya anak nen Gera, sakey a Benjaminita+ a kaliwete.+ Diad saginonor et impawit ed sikato na saray Israelita so buis a parad si Eglon ya ari na Moab. 16 Kaleganan na satan et nanggaway Ehud na duaray-tarem ya espada a sankasiko* ed karukey, tan imbedber to itan ed dalem na kawes to diad kawanan ya ulpo to. 17 Insan inyawat to so buis ed si Eglon ya ari na Moab. Si Eglon et matabataban laki.

18 Sanen niiter la nen Ehud so buis, pinasempet to la iramay totoo ya angawit na buis. 19 Balet sanen sikatoy akasabid kawalaan na saray inukit ya imahen* diad Gilgal,+ sikatoy pinmawil ed ari tan inkuan to: “Walay sekreton ibagak ed sika, O ari.” Kanian inkuan na ari: “Mandeen kayo!” Diad saman et sikatoy tinaynan na amin a lingkor to. 20 Kanian inmasingger ed sikato si Ehud legan a sikatoy manbukbukor ya akayurong ed ambetel a kuarto tod tagey. Insan inkuan nen Ehud: “Walay mensahe na Dios ya ibagak ed sika.” Kanian sikatoy inmalagey ed trono* to. 21 Insan inuyos na kawigin lima nen Ehud so espada diad kawanan ya ulpo to tan induyok tod eges na ari. 22 Pinmanek itan anggad putan, tan abalkot na taba so tarem, ta agto inuyos so espada ed eges to, tan pinmaway iray dutak to. 23 Insan insara nen Ehud iray puerta na kuarto ed tagey tan intalak to, tan pinmaway ed balkonahe.* 24 Kaalis to, pinmawil iramay aripen na ari tan anengneng dan akatalak iray puerta na kuarto ed tagey. Kanian inkuan da: “Ompan sikatoy manbabawas* diad ambetel a kuarto ed loob.” 25 Nanalagar ira ya anggad sinmabi baing da, balet sanen anengneng da a siansia nin agto lukasan iray puerta na kuarto ed tagey, inala ra so tombok tan nilukasan da iray puerta tan anengneng dad datal* ya inatey lay katawan da!

26 Akabatik lay Ehud legan iran manaalagar, tan sikatoy dinmalan ed kawalaan na saray inukit ya imahen*+ tan maligen ya akasabid Seira. 27 Kasabi to, pinaknol toy tambuyog+ diad mapalandey a rehyon na Efraim;+ tan linmasur ed mapalandey a rehyon iray Israelita, a sikatoy walad unaan da. 28 Insan inkuan tod sikara: “Tumbok yo ak, ta inyawat lad sikayo nen Jehova iray kakabusol yo, saray Moabita.” Kanian sikatoy tinumbok da tan sinakop da iray atapew a kulos na Jordan pian agmakatakas iray Moabita, tan agda inabuloyan so siopaman a makabaliw. 29 Diad saman et pinatey da so manga 10,000 Moabita,+ amin da et mabibiskeg tan masesebeg a lalaki; anggapoy anggan sakey ya akaliktar.+ 30 Kanian tinalo na Israel so Moab ed saman ya agew; tan say dalin et awalaay kaligenan* ed loob na 80 taon.+

31 Sinmublay ed sikato si Samgar+ ya anak nen Anat. Pinatey toy 600 a Filisteon lalaki+ diad panamegley na panagdugsol na baka;+ inliktar to met so Israel.