Komaduan Awaran

17 Et si Jehosafat ya anak to+ so nagmaliw ya ari a kasalat to, tan pinabiskeg toy pakauley to ed Israel. 2 Sikatoy angipasen na saray armada diad amin ya apadiran a syudad na Juda tan angipuesto na saray bantay a sundalo diad dalin na Juda tan diad saray syudad na Efraim ya asakop nen Asa ya ama to.+ 3 Si Jehova et nansiansian walad si Jehosafat lapud sikatoy nanakar ed saray dalan a nanakaran nensaman nen David+ ya inmunan ateng to tan agto inanap si Baal. 4 Ta inanap to so Dios nen ama to+ tan tinumbok toy* ganggan to, aliwan saray kagagawa na Israel.+ 5 Say panarian to et inletneg a malet nen Jehova;+ tan say interon Juda et mangiiter na saray regalo ed si Jehosafat, tan sikatoy awalaan na dakel a kayamanan tan baleg a kagalangan.+ 6 Makmakpel ton tinumbok iray dalan nen Jehova, tan ineekal to ni ingen ed Juda iray atagey a pasen+ tan saray sagradon poste.*+

7 Diad komatlon taon na uley to et impatawag to ray prinsipe to, sikara di Ben-hail, Obadias, Zacarias, Netanel, tan Micaias, pian manbangat diad saray syudad na Juda. 8 Wala ray Levita a kaiba ra: si Semaias, Netanias, Zebadias, Asael, Semiramot, Jehonatan, Adonias, Tobia, tan Tob-adonias, tan kaiba da ray saserdote+ a si Elisama tan Jehoram. 9 Et nambangat ira ed Juda, ya awit day libro na Ganggan nen Jehova,+ tan niliber day amin a syudad na Juda tan imbabangat da ray totoo.

10 Tan say amin a panarian na saray dalin ed kaliberliber na Juda et tinmakot a maong lapud si Jehova, kanian ag-ira akilaban ed si Jehosafat. 11 Saray Filisteo et angiter ed si Jehosafat na saray regalo tan kuarta bilang buis. Tan saray Arabo et angiter ed sikato na 7,700 a kalakian a karnero tan 7,700 a kalakian a kanding.

12 Si Jehosafat et binmiskeg lan binmiskeg,+ tan nantultuloy ya angipaalagey na saray panag-amotan+ tan saray syudad a panagtiponay abasto+ diad Juda. 13 Angkakabaleg a proyekto so agawaan to diad saray syudad na Juda, tan walaan na saray mabibiskeg a sundalo diad Jerusalem. 14 Inapag-apag ira ed grupo unong ed saray pamilya na kaamaan da: diad Juda et saray pangulo na nilibo, si Adnah a pangulo, tan say kaiba to et 300,000 mabibiskeg a sundalo.+ 15 Tan walad pakauley to si Jehohanan a pangulo, tan say kaiba to et 280,000. 16 Tan wala met ed pakauley to si Amasias ya anak nen Zicri, a namboluntaryo parad panaglingkor ed si Jehova, tan say kaiba to et 200,000 mabibiskeg a sundalo. 17 Tan diad Benjamin+ et si Eliada a mabiskeg a sundalo, tan say kaiba to et 200,000 lalakin de-awit na saray pana tan panagsamper.+ 18 Tan walad pakauley to si Jehozabad, tan say kaiba to et 180,000 lalaki ya akaparaan parad guerra. 19 Manlilingkor iraya ed ari nilikud nid saramay inyan tod saray apadiran a syudad diad interon Juda.+