Unonan Samuel

30 Sanen akasabid Ziklag+ si David tan saray totoo to ed komatlon agew, alusob na saray Amalekita+ so abalaten* tan say Ziklag, tan inmataki ra ed Ziklag tan pinoolan da itan. 2 Ineerel da iray bibii+ tan amin a wadman, manlapud ugugaw ya anggad mamatatken. Anggapoy pinatey da, balet inawit da ra sanen tinmaynan ira. 3 Sanen akasabid syudad si David tan saray totoo to, anengneng dan apoolan itan, tan anggapo lad man iray kaasawaan da tan saray ananak dan lalaki tan bibii. 4 Kanian inmakis a maksil si David tan saray totoo to, anggad anggapo lay kasil dan onakis. 5 Inala ra met iray duaran asawa nen David, a si Ahinoam a taga Jezreel tan si Abigail a datin asawa nen Nabal a Carmelita.+ 6 Agonigon a maong si David, ta pantotongtongan na saray lalaki a sikatoy tupaken da, lapud ansakit so linawa na amin a lalaki* diad impakaandi na saray ananak dan lalaki tan bibii. Balet pinabiskeg nen David so sarili to diad panamegley nen Jehova a Dios to.+

7 Insan inkuan nen David ed si Abiatar+ a saserdote, ya anak nen Ahimelec: “Ipangasim pan iyakar dia so efod.”+ Kanian inyakar nen Abiatar so efod ed si David. 8 Nantepet si David ed si Jehova:+ “Kasin usilan ko imay grupo na saray tulisan? Kasin naabotan ko ra?” Diad saman et oniay inkuan Tod sikato: “La ka, usilan mo ra, ta naabotan mo ra, tan nabawim so amin ya inala ra.”+

9 Tampol a binmuat si David tan say 600 a lalakin+ kaiba to, tan akasabi rad Kulos* na Besor, a ditan et tinmilak iray arum a lalaki. 10 Intuloy nen David so panguusil a kaiba so 400 a lalaki, balet atilak iramay 200 a lalaki a naksawan lan maong kanian agla ra makabaliw ed Kulos na Besor.+

11 Akanengneng ira na sakey ya Ehipsio diad uma, tan sikatoy inyakar dad si David. Sikatoy inikdan da na naakan tan nainum, 12 ontan met ed sakey a pisag na bibingkan igos tan duaran bibingkan pasas. Kayari ton angan, pinmawil so biskeg to,* ta taloy agew tan taloy labi lan agto angan tan inminum. 13 Sikatoy tinepetan natan nen David: “Siopay akankayarian ed sika, tan taga iner ka?” et inkuan to: “Sakey ak ya Ehipsio a lingkor, aripen na sakey ya Amalekita, balet tinaynan ak na katawan ko lapud nansakit ak, taloy agew lay apalabas. 14 Nilusob mi so abalaten* na saray Kereteo+ tan say dalin a nasasakopan na Juda tan say abalaten* na Caleb,+ tan pinoolan mi so Ziklag.” 15 Diad saman et inkuan ed sikato nen David: “Sarag ton ibaan mo ak ya onlad kawalaan na samay grupo na saray tulisan?” Sikatoy inmebat: “No mansamba kad arapan na Dios ya agmo ak papatey tan agmo ak iyawat ed katawan ko, ibaan ta kan onlad kawalaan na samay grupo na saray tulisan.”

16 Kanian sikatoy inibaan ton linma ed pasen a nitaytayakan da ed saman a dalin, a mamangan tan oniinum tan manliliket ira lapud kabaleg na asamsam da ed dalin na saray Filisteo tan ed dalin na Juda. 17 Insan kinabil ira nen David manlapud palbangon ya anggad onsublay a labi; anggapoy anggan sakey a lakin akatakas+ nilikud ed saray 400 a lalakin linmugan ed kamelyo. 18 Abawi nen David so amin ya inala na saray Amalekita,+ tan niliktar nen David so duaran asawa to. 19 Anggapoy naandi ed saray kayarian da, manlapud sankamelagan ya anggad sankabalegan. Abawi da iray ananak dan lalaki tan bibii tan say samsam;+ abawi nen David so amin ya inala ra. 20 Kanian inala nen David so amin a karnero tan baka, a saratan et inyan dad unaan na dilin ayayep da. Inkuan da: “Saya so samsam nen David.”

21 Insan akasabi si David ed saramay 200 a lalakin tinmilak ed Kulos na Besor+ a naksawan lan maong pian mila ed si David, tan inmabet irad si David tan saray totoon kaiba to. Kaasingger nen David ed sarayan lalaki, kinumusta to ra. 22 Balet, oniay inkuan na saramay mauges tan andi-kakanaan a lalakin akila ed si David: “Ag-ira akilad sikatayo, kanian agtayo ra ikdan na antokaman ed saray samsam ya abawi tayo, balet sarag dan alaen so asawa ra tan saray ananak da insan la ra ontaynan.” 23 Balet inkuan nen David: “Agyo itan gagawaen, agagik, ta inter iraya nen Jehova ed sikatayo. Sinalimbengan to itayo tan inyawat tod lima tayo imay grupo na saray tulisan a linmusob ed sikatayo.+ 24 Ta siopay onabobon ed sikayo? Say apag na samay akilan akilaban et mipara ed apag na samay atilak a nambantay na bagahe.+ Amin et nawalaan na apag.”+ 25 Tan manlapu lad saman ya agew, samay imbaga nen David et nagmaliw lan totontonen tan ganggan diad Israel ya anggad natan.

26 Sanen akapawil ed Ziklag si David, impawit toy arum a samsam ed saray kakaaro ton mamatatken na Juda, ya inkuan to: “Nia so regalo* parad sikayo a kabiangan ed saray asamsam ed saray kakabusol nen Jehova.” 27 Impawit to itan ed saramay walad Bethel,+ ed saramay walad Ramot ed Negeb,* ed saramay walad Jatir,+ 28 ed saramay walad Aroer, ed saramay walad Sifmot, ed saramay walad Estemoa,+ 29 ed saramay walad Racal, ed saramay walad saray syudad na Jerameelita,+ ed saramay walad saray syudad na Keneo,+ 30 ed saramay walad Horma,+ ed saramay walad Borasan, ed saramay walad Atac, 31 ed saramay walad Hebron,+ tan ed amin a pasen a mabetbet a laen nen David tan saray totoo to.