Ed Saray Taga Roma
4 No ontan sirin, antoy nibaga tayon agunggona nen ama tayon Abraham? 2 Singa bilang, no si Abraham et niyabawag a matunong lapud saray gawa, walay rason ton manpasirayew, balet aliwan diad arapan na Dios. 3 Ta anto so ibabaga na kasulatan? “Impatnag nen Abraham so pananisia ed si Jehova,* tan sikatoy impasen a matunong lapud satan.”+ 4 Natan, diad sakey a toon mankikimey, say upa to et ag-ipapasen ya agnaparaan a kaabigan noagta sakey a bengatlan nepeg ya iter ed sikato.* 5 Balet, say toon agmankikimey ingen ta mangipapatnag na pananisia ed Dios, samay iyaabawag ton matunong so makasalanan, et ipapasen a matunong lapud pananisia to.+ 6 Imbaga met nen David so nipaakar ed liket na toon ipapasen na Dios a matunong aliwan lapud saray gawa, a kuan to: 7 “Maliket iramay totoon aperdona la ray mauges a ginawa ra tan saramay asakbongan* la ray kasalanan da; 8 maliket so too a say kasalanan to et agla nonoten nen Jehova.”*+
9 Sirin, kasin sayan liket et para labat ed saray totoon asegat odino dia met ed saray totoon ag-asegat?+ Ta ibabaga tayo: “Si Abraham et impasen a matunong lapud pananisia to.”+ 10 Kanian, kapigan impasen a sikatoy matunong? Sanen sikatoy asegat odino sanen agni asegat? Aliwan sanen asegat, noagta sanen agni asegat. 11 Tan inawat to so sakey a tanda+—salanti, say panagsegat—bilang sakey a tatak* na inkatunong lapud pananisia to sanen agni asegat, pian sikatoy magmaliw ya ama na amin a walaan na pananisia+ anggaman ag-ira asegat, diad ontan et ipasen iran matunong; 12 tan pian sikatoy magmaliw ya ama na saray asegat ya ilalak, aliwa labat ya ama na saramay ontutumbok ed panagsegat noagta pati saramay ontutumbok ed dalan na pananisia ya impatnag na ama tayon si Abraham+ sanen agni asegat.
13 Ta aliwan diad panamegley na ganggan ya insipan ed si Abraham odino ed ilalak* to a tawiren to so sakey a mundo,+ noagta diad panamegley na inkatunong lapud pananisia.+ 14 Ta no saramay ontutumbok ed ganggan so manawir, magmaliw ya andi-kakanaan so pananisia tan naandi la so sipan. 15 Diad tua, say Ganggan et mamapawalay sanok na Dios,+ balet no anggapoy ganggan, anggapo met so isusumlang.+
16 Kanian diad panamegley na pananisia et niiter so sipan, pian mitunosan itan ed agnaparaan a kaabigan,+ diad ontan et seguradon nasumpal itan ed amin ya ilalak* to,+ aliwa labat ed saramay ontutumbok ed Ganggan noagta ontan met ed saramay mangaalig ed pananisia nen Abraham, ya ama tayon amin.+ 17 (Mitunosan iya ed samay nisulat: “Tinuro ta ka bilang ama na dakel a nasyon.”)+ Agawa iya diad arapan na Dios ya angipatnagan toy pananisia, samay mamibilay ed saray inaatey tan tatawagen to ray bengatlan anggapo a singano wala la.* 18 Anggaman anggapo lay rason a manilalo, sikatoy siansia nin nanilalo tan walaan na pananisia a sikatoy magmaliw ya ama na dakel a nasyon unong ed samay nibaga la: “Ontan so pagmaliwan na ilalak mo.”*+ 19 Tan anggano agkinmapuy so pananisia to, ninonot to a say laman to et singa inatey la (ta manga 100 lay taon to),+ pati say kipapasen nen Sara ya agmakaanak.+ 20 Balet lapud sipan na Dios, sikatoy walaan na pananisia kanian agbalot nanduaruwa; tan nagmaliw a mabisbiskeg ed pananisia, ya inggloria toy Dios 21 tan mataletalek a nayarian na Dios a gawaen imay insipan to.+ 22 Kanian “sikatoy impasen a matunong lapud satan.”+
23 Balet nisulat so balikas a “sikatoy impasen a matunong” aliwan parad sikato labat,+ 24 noagta parad sikatayo met a pinili na Dios ya ipasen a matunong, lapud manisia tayod Sikato, samay amaoli ed si Jesus a Katawan tayo manlapud inaatey.+ 25 Sikatoy inyawat lapud saray kasalanan tayo+ tan pinaoli pian niyabawag itayon matunong.+