SARAY TAGLEEY

א [Aleph]*

1 Agayla a bukbukor to lay akayurong, samay syudad a nensaman et napnoy totoo!+

Agayla a sikatoy nagmaliw a singa biin balo, samay sakey a nensaman et matoo nen say arum a nasyon!+

Agayla a samay prinsesa ed limog na saray probinsya* et nagmaliw lan aripen!+

ב [Beth]

2 Sikatoy manak-akis kada labi,+ tan manag-agus iray lua ed aping to.

Anggapoy anggan sakey ed saramay manangaro to a manligliwa ed sikato.+

Sikatoy trinaidor na amin a kakaaro to;+ nagmaliw iran kalaban to.

ג [Gimel]

3 Say Juda et nibantak ed arum a dalin,+ a sikatoy pinairap tan inaripen.+

Kaukolan toy miayam ed saray nasyon;+ anggapoy aromog ton painawaan.

Sikatoy nabotan na amin a mamapasegsegang ed sikato sanen nagogonigon.

ד [Daleth]

4 Saray karsadan paonlad Sion et maneermen, lapud anggapoy oonlad piesta.+

Amin a puerta to et pinaulyanan;+ saray saserdote to et onnanangis.

Saray birhen* to et maneermen, tan pinasyay pakakagonigon to.

ה [He]

5 Saray kalaban to et nagmaliw a katawan* to; saray kakabusol to et anggapoy pagpaga ra.+

Ta impalikna nen Jehova ed sikato so ermen lapud karakel na impakasumlang to.+

Saray ananak to et inerel na kalaban.+

ו [Waw]

6 Naandin amin so karakpan na anak a bii na Sion.+

Saray prinsipe to et singa saray kalakian ya ulsa ya agmakaromog na napankabkaban,

Tan naknaksawan iran manaakar diad arap na saray malabay a mangerel ed sikara.

ז [Zayin]

7 Diad saray agew a maniirap tan andian na ayaman so Jerusalem, anonotan to

So amin a mablin bengatla a walad sikato nensaman.+

Sanen saray totoo to et niyawat ed lima na kalaban tan anggapoy mananulong to,+

Sikatoy anengneng na saray kalaban to tan inelekan* day inkagba to.+

ח [Heth]

8 Say Jerusalem et akagaway baleg a kasalanan.+

Kanian sikatoy nagmaliw a makapadimlan bengatla.

Amin iramay datin mamapagalang ed sikato et manleleglemew lad sikato, ta anengneng day inkalakseb to.+

Sikaton mismo et nanakis+ tan binmeneg lapud kababaingan.

ט [Teth]

9 Sankanengneng so inkarutak to diad saray palda to.

Agto ninonot so arapen to.+

Makapabigla so inkagba to; anggapoy anggan sakey a manligliwa ed sikato.

O Jehova, nengneng moy paniirap ko, ta say kabusol et ipapaatagey toy sarili to.+

י [Yod]

10 Amin a kayamanan to et inala na kalaban.+

Ta anengneng to a linmoob ed santuaryo to iray nasyon,+

Saramay ingganggan mo ya agnepeg ya onloob ed kongregasyon mo.

כ [Kaph]

11 Amin a totoo to et onaakis; manaanap iray tinapay.+

Saray mablin kayarian da et insalat dad naakan, pian mansiansia ra labat a mabilay.*

Imanom, O Jehova, tan nengneng mo, nagmaliw ak a singa biin* andi-kakanaan.

ל [Lamed]

12 Kasin anggapo labat iya ed sikayon amin ya ondadalan?

Imano yo tan nengneng yo!

Wala ta ni mas ansakit nen say impaliknad siak a sakit,

Say impasagmak ed siak nen Jehova diad agew na mandarlang a sanok to?+

מ [Mem]

13 Manlapud tawen et sikatoy angibaki na apoy pian poolan iray pukel ko,+ tan tinalo to so kada sakey ed saratan.

Sikatoy angibuskag na iket pian patitan so salik; apaatras to ak.

Ginawa to ak a sakey a biin pinaulyanan.

Sanagew ak a mansasakit.

נ [Nun]

14 Saray impakasumlang ko et singa pako, ya impansisingeran na saray lima to.

Inyan iraya ed tenger ko, tan naupot so kasil ko.

Inyawat ak nen Jehova ed lima na saramay agko sarag a labanan.+

ס [Samekh]

15 Imbantak nen Jehova so amin a mabibiskeg a totook.+

Sikatoy nampatawag na totoo a mantitipon pian onatakid siak tan deralen da ray kalangweran kon lalaki.+

Ginatin-gatinan nen Jehova so birhen ya anak a bii na Juda diad panagpespesan na ubas.+

ע [Ayin]

16 Manak-akis ak lapud sarayan bengatla;+ manag-agus iray luak.

Ta amin a nayarin manligliwa odino mamainawa ed siak* et arawrawi rad siak.

Saray anak kon lalaki et apaulyanan, lapud analo so kabusol.

פ [Pe]

17 Inyunat na Sion iray lima to;+ anggapoy anggan sakey a manligliwa ed sikato.

Ingganggan nen Jehova ya onsumpad Jacob so amin ya akapaliber a kalaban to.+

Say Jerusalem et nagmaliw a makapadimlan bengatla ed sikara.+

צ [Tsade]

18 Si Jehova et matunong,+ ta nanrebelde ak ed saray ganggan* to.+

Dengel kayo, amin yon totoo, tan nengneng yoy sakit a naliliknak,

Saray birhen ko* tan saray kalangweran kon lalaki et narel.+

ק [Qoph]

19 Tinmawag ak ed saray manangarok, balet trinaidor da ak.+

Diad syudad et inatey iray saserdotek tan saray mamatatken ko,

Legan iran manaanap na naakan pian mansiansia ran mabilay.*+

ר [Resh]

20 Nengneng mo, O Jehova, ta masyado lay pakakagonigon ko.

Saray walad loob* ko et singa kikiwalen.

Say pusok et manpukal, lapud alablabas so impanrebeldek.+

Diad paway et papaandien na espada iray ananak;+ diad loob na abung et singa itan patey.

ש [Shin]

21 Arengel na totoo so panaakis ko; anggapoy anggan sakey a manligliwa ed siak.

Arengel na amin a kabusol ko so mauges ya agawad siak.

Maliket ira, ta sika so angipasabid satan.+

Balet ipasabim ed sikara imay agew ya inyabawag mo,+ sano magmaliw iran singa siak.+

ת [Taw]

22 Komon ta makasabid sika so amin a kaugsan da, tan komon ta dusaen mo ra+

A singa ed impanusam ed siak lapud amin ya impakasumlang ko.

Ta pinasyay pannanangis ko, tan mansasakit so pusok.

א [Aleph]

2 Agayla a sinakbongan nen Jehova na lurem so anak a bii na Sion lapud sanok to!

Manlapud tawen et imbantak tod dalin so karakpan na Israel.+

Agto ninonot so toonan na sali to+ diad agew na sanok to.

ב [Beth]

2 Andiay panangasin dineral nen Jehova so amin ya ayaman na Jacob.

Diad sanok to et inggeba to ray apadiran a pasen na anak a bii na Juda.+

Inyabeba tod dalin tan pinabanday to so panarian+ tan saray prinsipe na satan.+

ג [Gimel]

3 Diad petang na sanok to et pinaandi toy amin a biskeg* na Israel.

Sikatoy agtinmulong sanen inmataki so kalaban,+

Tan mandarlang so sanok tod Jacob a singa apoy a manguupot ed amin ya akapaliber ed satan.+

ד [Daleth]

4 Pininat toy pana to a singa sakey a kabusol; say kawanan a lima to et akaparaan la a singa sakey a kalaban;+

Pinapatey toy amin a makapalikliket ed mata.+

Tan inkalbo toy sanok ton singa apoy+ diad tolda na anak a bii na Sion.+

ה [He]

5 Si Jehova et nagmaliw a singa sakey a kabusol;+

Dineral toy Israel.

Dinederal toy amin a tori na Sion;

Inggegeba toy amin ya apadiran a pasen na satan.

Tan diad anak a bii na Juda et sikatoy amawala na pinasyan panermen tan pantagleey.

ו [Waw]

6 Ginaygay toy alolong to,+ a singa sakey a siroman ed hardin.

Impangangga* toy piesta to.+

Inabuloyan nen Jehova a nalingwanan ed Sion so piesta tan sabaton,

Tan lapud pinasyan sanok to et imbaliwala to so ari tan saserdote.+

ז [Zayin]

7 Impulisay nen Jehova so altar to;

Pinaulyanan toy santuaryo to.+

Saray padir na malet a tori na Sion et inyawat tod lima na kabusol.+

Inmeeyag ira diad loob na abung nen Jehova,+ a singa diad agew na piesta.

ח [Heth]

8 Denesidi nen Jehova a deralen so padir na anak a bii na Sion.+

Inyunat toy lubir a panagsukat.+

Agto pinugeran so lima to a maneral.*

Tan pinaermen to so pandepensan tambak tan say padir.

Kinmapuy iratan.

ט [Teth]

9 Saray puerta to et linmereg ed dalin.+

Saray balewet to et dinederal tan pinuputer na Dios.

Say ari tan saray prinsipe to et walad saray nasyon.+

Anggapo so ganggan;* anggan saray propeta to et ag-akaawat na pasingawey manlapud si Jehova.+

י [Yod]

10 Saray mamatatken na anak a bii na Sion et akalespak ed dalin, ya ag-ira oneseesel.+

Angisabuyag iray dabok ed ulo ra tan nansulong ira na sakon abel.+

Saray birhen na Jerusalem et insubsob day ulo ra ed dalin.

כ [Kaph]

11 Saray matak et naksawan lad kakaakis.+

Saray walad loob* ko et singa kikiwalen.

Say altey ko et nibantak ed dalin, lapud impakaderal na anak a bii na* baley ko,+

Lapud nalelemay iray ugugaw tan saray kapangiyanak diad saray plaza na baley.+

ל [Lamed]

12 Lanang dan itetepet ed ina ra, “Kawalaay naakan tan iinumen?”+

Legan iran nalelemay a singa ra asugatan diad saray plaza na syudad,

Legan a kalkalnan naaandi bilay* da diad akwalan na ina ra.

מ [Mem]

13 Anto kasi usaren kon pantasi,

Tan anto kasi pangikomparaan kod sika, O anak a bii na Jerusalem?

Anto kasi pangiparaan kod sika, pian naligliwa ka, O birhen ya anak a bii na Sion?

Ta say inkaderal mo et singa kaawang na dayat.+ Siopay makapanpaabig ed sika?+

נ [Nun]

14 Saray pasingawey ya anengneng na saray propetam nipaakar ed sika et aliwan tua tan andi-kakanaan,+

Tan agda imparungtal so lingom pian agka naerel,+

Say lanang ya ibabaga ran pasingawey nipaakar ed sika et aliwan tua tan mapalikdo iran mensahe.+

ס [Samekh]

15 Amin ya ondadalan et titipakan tan mumudmoraen da ka.+

Manngisiw ira lapud pankelkelaw+ tan mameyengpeyeng ira ed anak a bii na Jerusalem, a kuan da:

“Aya ta may syudad ya ibabaga ran, ‘Nagnap ed inkarakep, say panliliketan na interon dalin’?”+

פ [Pe]

16 Amin a mamubusol ed sika et akasangi ra ed sika.

Manngisiw tan manngayet ira tan inkuan da: “Aderal tayo la.+

Aya la may agew ya aalagaren tayo!+ Sinmabi la, anengneng tayo la!”+

ע [Ayin]

17 Ginawa nen Jehova imay ninonot to;+ sinumpal toy imbaga to,+

Samay ingganggan to nensaman a panaon.+

Sikatoy aneral ya andiay panangasi.+

Inabuloyan toy kabusol a manliket lapud sika; inyatagey toy biskeg* na saray kalaban mo.

צ [Tsade]

18 Inmakis so puso na totoo ed si Jehova, O padir na anak a bii na Sion.

Paagus mon singa kulos iray lua diad agew tan labi.

Agka ontutunda, agmo pampapainawaen so matam.

ק [Qoph]

19 Bangon ka! Iyaki-akis mo no labi, diad igapo na saray panagbantay.

Ikalbom a singa danum so amin a walad pusom diad arapan nen Jehova.

Itagey mo ray limam ed sikato parad bilay* na ananak mo,

A nalelemay diad amin a suyok na karsada lapud eras.+

ר [Resh]

20 O Jehova, nengneng mo may angidapoan mo na graben irap.

Kasin mantultuloy a kanen na saray bibii so dilin ananak* da, saray ugugaw ya inyanak da,+

Odino kasin pateyen iray saserdote tan propeta diad santuaryo nen Jehova?+

ש [Shin]

21 Diad saray karsada et kitungilang so bangkay na ugugaw a lalaki tan mamasiken.+

Saray birhen ko* tan saray kalangweran kon lalaki et pinapatey ed espada.+

Amatey ka diad agew na sanok mo; amatey ka ya andiay panangasi.+

ת [Taw]

22 Singano diad agew na piesta,+ impatawag mo manlapud amin a pasen iray pakakataktakotan.

Diad agew na sanok nen Jehova et anggapoy akatakas odino akaliktar;+

Saramay inyanak ko* tan pinabaleg ko et pinapatey na kabusol ko.+

א [Aleph]

3 Siak may too ya akanengneng na irap lapud lewet na sanok na Dios.

 2 Pinataynan to ak tan impanakar to ak ed kabilungetan, aliwan diad liwawa.+

 3 On, kada agew et naynay to ak ya ipupulisay.+

ב [Beth]

 4 Pinakapuy toy laman ko tan dineral toy baog ko;

Pinuputer to ray pukel ko.

 5 Kinubkob to ak; pinaliberan to ak na ampait a samal+ tan kairapan.

 6 Pinayurong to ak ed ambilunget iran pasen, a singa sakey a toon abaybayag lan inatey.

ג [Gimel]

 7 Pinadir to ak pian agak makatakas;

Binalor to ak na ambelbelat iran gansan gulonggulong.+

 8 Tan sano onkekerew ak na tulong, ipupulisay* toy pikakasik.+

 9 Sinaraan to na saray bato iray dalan ko;

Ginawa ton pikewet iray dadalanan ko.+

ד [Daleth]

10 Sikatoy manatambang ed siak a singa sakey ya oso, singa sakey a leon a walad amot.+

11 Pinaekal to ak ed saray dalan tan biningbingkas to ak;*

Ginawa to ak a sakey ya apaulyanan.+

12 Pininat toy pana to, tan siak so ginawa ton puntirya to.

ה [He]

13 Tinmalos ed saray batok iray pana* a walad pananginan to.

14 Inelek-elekan ak na amin a totoo, nipaakar ed siak so lanang a kakansionen da.

15 Pinesel to ak na ampait iran bengatla tan pinera to ak na ahenho.+

ו [Waw]

16 Binunger to ray ngipen ko diad panamegley na batobato;

Pinakebkeb to ak ed dapol.+

17 Insiblet mod siak* so kareenan; alingwanan ko la no antoy maong.

18 Kanian ibabagak: “Naandi lay karakpan ko, pati say paniilalok ed si Jehova.”

ז [Zayin]

19 Nonot moy paniirap ko tan say inkaandian koy ayaman,+ say ahenho tan say ampait a samal.+

20 Seguradon nanonotan mo* tan onyuko ka pian tulongan mo ak.+

21 Sankanonot ko iya; kanian maan-anos ak a manalagar.+

ח [Heth]

22 Ag-itayo inatey lapud matoor a panangaro nen Jehova,+

Ta agbalot mangangga so panangasi to.+

23 Say panangasim et balo a kinabuasan;+ ontan lay inkamatoor mo.+

24 “Si Jehova so nabebetangan ko,”+ inkuan ko,* “kanian maan-anos ak a manalagar ed sikato.”+

ט [Teth]

25 Maong si Jehova ed samay maniilalo ed sikato,+ diad samay too* a manaanap ed sikato.+

26 Maong so mareen a panalagar*+ ed panangiliktar nen Jehova.+

27 Maong parad sakey a too so panakbat na pako legan na kalangweran to.+

י [Yod]

28 Sikatoy onyurong komon a bukbukor tan mandeen labat sano ipasakbat itan na Dios ed sikato.+

29 Isubsob to komon so lupa to ed dabok;+ agla pigan wala ni ilalo.+

30 Iyarap to komon so aping to ed samay manatampal ed sikato; akoen to komon so amin a pananginsulto.

כ [Kaph]

31 Ta aliwan anggad angga so pangipulisay nen Jehova ed sikatayo.+

32 Anggano sikatoy amaermen, mangipatnag met na panangasi unong ed kabaleg na matoor a panangaro to.+

33 Ta anggapod puso to a pairapen odino paermenen iray anak na totoo.+

ל [Lamed]

34 Say pangigatin-gatin ed amin a priso diad dalin,+

35 Say pangisiblet na hustisya ed sakey a too diad arapan na Sankatagyan,+

36 Tan say pansaol ed sakey a too diad kaso to

—Sarayan bengatla et agkokonsintien nen Jehova.

מ [Mem]

37 Wala tay sarag toy mansalita tan nagawaan to itan no aliwan si Jehova so angiganggan?

38 Diad sangi na Sankatagyan

Et agmanbansag ya ompaway so mauges tan maong a bengatla.

39 Akin et manreklamo so sakey a too ed saray resulta na kasalanan to?+

נ [Nun]

40 Usisaen tan surien tayo ray dalan tayo,+ tan ompawil tayod si Jehova.+

41 Masimoon itayon onasingger ed Dios a walad tawen tan itagey tayo ray lima tayo,+ ya ibaga tayon:

42 “Nankasalanan tan nanrebelde kami,+ tan agmo kami pinerdona.+

ס [Samekh]

43 Diad sanok mo et sinaraan moy iyaasingger mi;+

Inusil-usilan tan pinatey mo kami ya andiay panangasi.+

44 Sinaraan mo na lurem so iyaasingger ed sika pian say pikakasi mi et agmakasabi.+

45 Pinagmaliw mo kamin dutak tan basura ed limog na katooan.”

פ [Pe]

46 Amin a kalaban mi et nansalita sumpad sikami.+

47 Lanang kamin natataktakot tan napapatitan,+ pinaulyan tan aderal kami.+

48 Manag-agus iray luak lapud impakaderal na anak a bii na baley ko.+

ע [Ayin]

49 Manak-akis iray matak, ag-ontunda tan agmanpainawa,+

50 Anggad onusdong si Jehova tan onnengneng manlapud tawen.+

51 Naermenan ak ed saray nanenengneng ko* lapud amin ya anak a bibii na syudad ko.+

צ [Tsade]

52 Anggan anggapoy makasengeg et pinatitan ak na saray mamubusol ed siak a singa ak sakey a manok.

53 Sinali ran panampoten so bilay ko ed abot; tinutupak da ak na bato.

54 Inmagus iray danum ed ulok, tan inkuan ko: “Ompatey ak la!”

ק [Qoph]

55 Tinawag koy ngaran mo, O Jehova, manlapud kaaralman na abot.+

56 Dengel moy boses ko; agmo komon pepepetan so layag mo ed ikekerew koy tulong, pian nainawaan ak.

57 Inmasingger ka diad samay agew ya ontatawag ak ed sika. Inkuan mo: “Agka natatakot.”

ר [Resh]

58 Indepensam so kasok,* O Jehova, dinondon moy bilay ko.+

59 Anengneng mo, O Jehova, so mauges a ginawad siak; ikdan mo ak komon na hustisya.+

60 Anengneng moy amin a panangibales da, amin a pakana ra ed siak.

ש [Sin] odino [Shin]

61 Nadngel moy panagkantiaw da, O Jehova, amin a pakana ra ed siak,+

62 Saray ibabalikas na bibil na saramay onsusumpad siak tan say naynay a paneesaesan da nipaakar ed siak.

63 Nengneng mo ra; anggan akayurong odino akaalagey ira, babalawen da ak ed saray kansion da!

ת [Taw]

64 Ibales mod sikara, O Jehova, so unong ed saray ginawa ra.

65 Isambam ira, a paaweten moy puso ra.

66 Diad pasnok mo et usilan mo ra, O Jehova, tan paandien mo ra diad silong na tawen mo.

א [Aleph]

4 Agayla a dinmeket la may mankirlap a balitok, samay maabig a klasen balitok!+

Agayla a saray masanton bato*+ et nitaytayak diad amin a suyok na karsada!+

ב [Beth]

 2 Saramay papablien ya anak a lalaki na Sion, a mabmablin singa puron balitok,

Agayla ya impasen labat iran singa saray buyog,

A ginawa na saray lima na sakey a managdamili!

ג [Gimel]

 3 Anggan saray ason jakal et papasusoen da ray oken da,

Balet say anak a bii na baley ko et nagmaliw a maruksa,+ singa saray ostrits ed kalawakan.+

ד [Daleth]

 4 Say dila na onsususo nin ugaw et pinmeket ed ngalangala to lapud inkapgaan.

Saray ugugaw et mipapayabol na tinapay,+ balet anggapoy mangiter ed sikara.+

ה [He]

 5 Saramay datin mamangan na espisyal iran kakanen et akarukol a narnarasan* diad saray karsada.+

Saramay pinabaleg a mansusulong na mablin kawes*+ et tinmikleb ed dapol.

ו [Waw]

 6 Say dusa ed* anak a bii na baley ko et mas ambelat ni nen say dusa ed impankasalanan na Sodoma,+

Ya agangganon aderal, tan anggapoy tinmulong ed sikato.+

ז [Zayin]

 7 Saray Nazareo+ na Sion et datin malinis nen say niebe, mas amputi nen say gatas.

Mas ambalanga ra nen saray korales; singa ra mankirlap a baton safiro.

ח [Heth]

 8 Natan et nagmaliw la ran mas andeket nen say uring;

Agla ra nabidbir ed saray karsada.

Nagmaliw la ran kapukepukel;+ say baog da et amagaan a singa kiew.

ט [Teth]

 9 Saramay pinatey ed espada et mas maong ni nen saramay inatey ed eras,+

Saramay kinmapkapuy, a singa ra dinuduyok lapud anggapo lay naakan a manlalapud uma.

י [Yod]

10 Saray makasin bibii et inlalambong da ray dilin ananak da.+

Nagmaliw irayan kakanen da* legay impakaderal na anak a bii na baley ko.+

כ [Kaph]

11 Impaway nen Jehova so amin a pasnok to;

Inkalbo toy mandarlang a sanok to.+

Tan pinaliob toy apoy diad Sion ya angupot ed saray pundasyon na satan.+

ל [Lamed]

12 Saray arari na dalin tan amin a manaayam ditan et ag-ira anisia

A say kalaban tan say kabusol et onloob ed saray puerta na Jerusalem.+

מ [Mem]

13 Agawa itan lapud saray kasalanan na saray propeta to, saray lingo na saray saserdote to,+

Ya angipaagus ed dala na saray matunong diad pegley to.+

נ [Nun]

14 Nanakar-akar irad saray karsada ya anggapo rad sarili ra.+

Adutakan ira ed dala,+

Kanian anggapoy nayarin maniwit ed saray kawes da.

ס [Samekh]

15 “Arawi kayo! Marutak kayo!” kuan na totoo ed sikara. “Arawi kayo! Arawi kayo! Agyo kami didiwiten!”

Ta anggapo lay ayaman da tan manaakar-akar la ra.

Imbaga na totoo na saray nasyon: “Ag-ira nayarin miayam dia.*+

פ [Pe]

16 Pinansisian ira nen Jehova;+

Agla mangipatnag na kaabigan ed sikara.

Agrespetoen na totoo iray saserdote,+ agda kasian iray mamatatken.”+

ע [Ayin]

17 Anggad natan naksawan la ray mata min manaalagar na tulong ya ag-onsasabi.+

Aminpigapiga kamin kinmerew na tulong ed sakey a nasyon ya agmakapangiliktar ed sikami.+

צ [Tsade]

18 Aanapen da kami ed amin a pasen+ kanian agkami makaakar diad saray plaza mi.

Asingger lay anggaan mi; anampot la ray agew mi, ta sinmabi lay anggaan mi.

ק [Qoph]

19 Saray manguusil ed sikami et mas maples nen saray agila ed tawen.+

Inusil-usilan da kami diad saray palandey; tinambangan da kami diad kalawakan.

ר [Resh]

20 Say linawa na bilay mi, samay nilanaan nen Jehova,+ et narel ed ginawa ran baleg ya abot,+

Samay angibagaan mi: “Diad proteksion to et manbilay kami ed limog na saray nasyon.”

ש [Sin]

21 Manggayaga tan manliket ka, O anak a bii na Edom,+ a manaayam diad dalin na Uz.

Balet ondalan met ed sika so kopa,+ tan nabuek ka tan ipanengneng moy inkalakseb mo.+

ת [Taw]

22 O anak a bii na Sion, anampot lay dusa ed impakalingom.

Say Dios et agto ka la ibantak lamet ed arum a dalin.+

Balet imanoen toy lingom, O anak a bii na Edom.

Iparungtal to ray kasalanan mo.+

5 O Jehova, nonot mo pay agawad sikami.

Imanom tan nengneng moy kababaingan mi.+

 2 Say tawir mi et niiter ed saray agkabat a totoo, saray kaabungan mi et niiter ed saray dayo.+

 3 Nagmaliw kamin ulilad ama; saray kainaan mi et singa ra balo.+

 4 Kaukolan mi manbayar pian makainum kami ed danum mi,+ tan sasaliwen mi so kiew ya itungo mi.

 5 Ngalngali kami la naabotan na saray manguusil ed sikami;

Naknaksawan kami la, balet agda kami pampainawaen.+

 6 Inyawat mi lima mi ed Ehipto+ tan ed Asirya+ pian makala kami magenap a tinapay a kanen mi.

 7 Saray inmuunan atateng mi a nankasalanan et anggapo la ra, balet kaukolan min akoen iray lingo ra.

 8 Natan, saray lingkor so manuuley ed sikami; anggapoy mangiliktar ed sikami ed lima ra.

 9 Ipepeligro mi bilay* mi pian makala kami na tinapay,+ lapud saramay de-awit na espada diad kalawakan.

10 Say baog mi et pinmetang a singa hurnoan lapud graben eras mi.+

11 Pinabanday da* iray kaasawaan a bibii ed Sion, tan saray birhen diad saray syudad na Juda.+

12 Saray prinsipe et imbitay diad lima ra,+ tan saray mamatatken et agnirespeto.+

13 Saray kalangweran a lalaki et mangaalsa na gilingan, tan saray ugugaw a lalaki et natutumba ed kabelat na sasakbaten dan kiew.

14 Anggapo la ray mamatatken diad puerta na syudad;+ agla mantotogtog na musika iray kalangweran a lalaki.+

15 Anggapo lay liket diad puso mi; say pansasayaw mi et nagmaliw lan paneermen.+

16 Say korona ed ulo mi et naplag. Pakaskasi kami, lapud nankasalanan kami!

17 Lapud saya et mansasakit so puso mi,+

Tan lapud sarayan bengatla et kinmuyep iray mata mi,+

18 Lapud Palandey Sion ya apaulyanan;+ liberliber la ditan iray kuyangen.

19 Balet sika, O Jehova, akayurong ka ed tronom ya anggad angga.

Say tronom et mansiansia diad amin a henerasyon.+

20 Akin et nilingwanan mo kami ya anggad angga tan tinaynan mo kami ya abaybayag?+

21 Papawil mo kamid sika, O Jehova, tan mabulos kamin ompawil ed sika.+

Pasimbalom iray agew mi a singa nensaman.+

22 Balet, sigpot mo kamin impulisay.

Siansia nin grabe sanok mod sikami.+