Pinataynan Irad Panaayaman Da

NENGNENG mo natan no antoy agawa. Pinataynan si Adan tan Eva ed balibalin hardin na Eden. Antam no akin?

Ta walay mauges a ginawa ra. Kanian, dinusa ira nen Jehova. Antam no antoy ginawa da?

Imbaga na Dios ya nayari dan kanen iray bunga na kakiewan ed hardin. Pero, walay sakey a kiew ya imbawal na Dios, ta no kanen day bunga to, ompatey ira. Gawa na Dios iman. Di ba mauges no alaen moy agmo gawa?

Aminsan, sanen bukbukor nen Eva ed hardin, akitongtong so sakey ya uleg ed sikato. Makapakelaw! Imbaga tod si Eva ya mangan ed samay bungan ibabawal na Dios. Amta tayo ya agginawa nen Jehova a mansalita iray uleg. Kanian wala siri manpapasalita ed samay uleg. Siopa kasi?

Aliwa met ya si Adan. Kanian seguradon sakey ed saray anghel ya ginawa nen Jehova so nampasalita ed uleg. Sayan anghel et nagmaliw a malaslastog. Labay ton sikato so dayewen tan unoren imbes a si Jehova.

Aloko na sayan anghel si Eva. Nen imbaga tod si Eva ya sikatoy magmaliw a singa Dios no kanen to may bunga, anisia met. Sikatoy angan tan inikdan to met si Adan. Agtinulok di Adan tan Eva so Dios, kanian pinataynan ira ed balibalin hardin a panaayaman da.

Balet, nasabi agew et gawaen na Dios a balibali so interon dalin a singa hardin na Eden. Naamtaan tayo lanlamang no panon kan nakaiba a manparakep ed dalin. Pero natan, amtaen tayo ni no antoy agawa ed si Adan tan Eva.