Sankaunaan ya Rainbow

ANTAM no antoy ginawa nen Noe kapaway dad biong? Sikatoy angiyapay odino nanregalo ed Dios, ya singa sayay nanenengneng mod litrato. Angiregalo si Noe na ayayep pian pisalamatan so Dios ed impakaliktar dad baleg a delap.

Agustoan kasi nen Jehova iman ya regalo? On. Tan impormisa tod si Noe ya agto lan balot deralen so mundo panamegley na delap.

Ag-abayag, amaga lay dalin, tan nambilay la rad paway na biong. Benendisyonan ira na Dios tan inkuan tod sikara: ‘Manparakel kayo anggad napanoy interon dalin.’

Balet no ondakel lay totoo tan nabalitaan da imay baleg ya delap, nayarin nataktakot ira ta ompan naulit lamet. Kanian angiter so Dios na tanda ed saray totoo ya agto lan balot delapen lamet so interon dalin. Antam no anton tanda? Say rainbow.

Lanang tayon nanenengneng so rainbow kayari uran. Marakdakep iray nanduruman kolor to. Akanengneng ka lay rainbow ya singa sayay walad litrato?

Onyay imbaga na Dios: ‘Agko lan balot deralen so amin a totoo tan ayayep panamegley na delap. Iyan ko so rainbow ed lurem. Tan sano ompaway itan, seguradon nanengneng tan nanonotan ko iyan impormisak.’

Kanian no makanengneng kay rainbow, antoy nanonotan mo? On, say impormisa na Dios ya agto lan balot deralen so mundo panamegley na baleg a delap.