Akaliktar so Ugaw a si Moises

NENGNENG mo yay ugaw ya onaakis, tan akaegnad gamet na bii. Si Moises iya. Antam no siopa yay magangganan bii? Sikatoy prinsesa ed Ehipto, say mismon anak nen Faraon.

Si Moises et taloy bulan ya inyamot nen nanay to, ta agto labay ya napatey na saray Ehipsio. Balet amta to ya ompan nanengneng da lanlamang si Moises, kanian onyay ginawa to pian niliktar so anak to.

Angala na baskit tan inapiger to pian agnalooban na danum. Insan inkarga to ditan si Moises, tan inyamot tod ataragey ya dika diad Ilog Nilo. Ingganggan toy Miriam, ya atsi nen Moises, a bantayan itan ed asingger tan nengnengen no antoy nagawa.

Kabebekta, nitan lay marikit nen Faraon pian manames ed Ilog Nilo. Bigla ton anengneng so baskit diman ed ataragey iran dika. Kanian, ingganggan toy sakey ed saray aripen ton bii: ‘Alam may baskit.’ Nen nilukasan na prinsesa so baskit, anengneng toy guap-guapon ugaw! Akis lan akis si Moises, tan nakakasian to. Agto labay ya pateyen day Moises.

Insan, inmasingger si Miriam. Sikato tay walad litrato. Tinepet nen Miriam so marikit nen Faraon: ‘Labay yon manawag ak na Israelitan bii pian mankomis ed ugaw?’

‘Laka sirin,’ so kuan na prinsesa.

Kanian, tinawag nen Miriam so nanay to. Kasabi nen nanay to, imbaga na prinsesa: ‘Alam yan ugaw tan ikomisan mo ak ta upaan ta ka.’

Kanian, si Moises et kinomisan na mismon nanay to. Nen binmaleg lay Moises, inyakar tod marikit nen Faraon, ya angampon ed sikato. Diman sirin nanayam si Moises ed abung nen Faraon.