Rut tan Noemi

DIAD Biblia, walay libron tatawagen ya Rut. Istorya iya na sakey a pamilya nen panaon ya wala ray ukom ed Israel. Si Rut et sakey ya biin taga-Moab, aliwan Israelita. Balet sanen akabat to so tuan Dios a Jehova, sikatoy naaralan ton aroen. Si Noemi et akulaw a bii ya tinmulong ed si Rut a nakabat si Jehova.

Sikatoy sakey ya Israelita. Sanen agaway eras ed Israel, sikato tan say asawa to, kaibay duaran anak dan laki et nanayam ed Moab. Sakey ya agew, inatey so asawa nen Noemi. Ag-abayag, angasawa iray anak to na duaran Moabita, say ngaran da et Rut tan Orpa. Balet kayari 10 ya taon, inatey so duaran anak nen Noemi. Kanian maer-ermen ira! Anto lay gawaen nen Noemi natan ey?

Sikatoy nandesisyon ya ompawil lad baley to. Labay di Rut tan Orpa so milad sikato. Balet nen wala la rad dalan, imbaga nen Noemi ed sikara: ‘Pawil ki lad saray kainaan yo.’

Et inangoban ira nen Noemi tan nampatanir. Manakis ira ta inad-aro day Noemi. Imbaga ra: ‘Andi! Mila kamid sika.’ Balet inkuan nen Noemi: ‘Maong lay ompawil kayo, anako.’ Kanian, sinmempet lay Orpa. Balet, ag-inmalis si Rut.

Imbaga nen Noemi ed si Rut: ‘Linma lay Orpa. Sempet ka met la.’ Balet inkuan nen Rut: ‘Agyo ak papaalisen! Mila ak ed sikayo. No iner so laen yo dimay laen ko, tan no iner so panayaman yo dimay panayaman ko. Saray kakanayon yo magmaliw ya kakanayon ko, tan say Dios yo magmaliw ya Dios ko. No iner so pateyan yo dimay pateyan ko, tan dimay pangiponponan ed siak.’ Nen imbaga iya nen Rut, agla pinilit nen Noemi.

Akasabi ran siansia ed Israel tan ditan la ra nanayam. Tampol ya nantrabahoy Rut ed alog ta panag-ani na sebada ed saman. Sikatoy inabuloyan na sakey a lakin manngaran na Boaz ya manturtor ed alog to. Antam no siopay ina nen Boaz? Si Rahab a taga-Jerico.

Aminsan, imbaga nen Boaz ed si Rut: ‘Naamtaan kon amin so nipaakar ed sika, tan maomaong kad si Noemi. Amtak ya tinaynan mo ray ateng mo, say bansam, tan akiayam kad totoon agmo nin balot akabat. Komon ta bendisyonan ka nen Jehova!’

Imbaga nen Rut: ‘Maomaong kayod siak. Akainawa ak lapud kaabigan yo.’ Agustoan nen Boaz si Rut, tan ag-abayag et nankasal ira. Malikeliket si Noemi! Balet sikatoy lalon maliket nen nan-anak si Rut na sakey a laki, ya nginaranan day Obed. Si Obed et magmaliw ya laki nen David, a naaralan tayo lanlamang.