Say Pormisa nen Jefte

ASALIM ta lay nanpormisa balet ta singa mairap mon gawaen? Ontan so agawad sayay lakin walad litrato, kanian sikatoy maer-ermen. Sayan laki et masibeg ya ukom ed Israel tan say ngaran to et Jefte.

Nambilay si Jefte sanen agla mandadayew ed si Jehova iray Israelita. Manggagawa ira lamet na mauges. Kanian inabuloyan nen Jehova iray Ammonita ya mamairap ed sikara. Lapud saya, kinmerew na tulong iray Israelita ed si Jehova: ‘Nankasalanan kami ed sika. Panangasim, iliktar mo kami!’

Nagbabawian na totoo iray mauges ya ginawa ra. Impanengneng da itan diad impandayew da lamet ed si Jehova. Kanian tinulongan ira lamet nen Jehova.

Si Jefte so pinili na totoo ya milaban ed saray mauges ya Ammonita. Labay nen Jefte ya sikatoy tulongan nen Jehova ed pilaban to. Kanian impormisa tod si Jehova: ‘No panaloen mo ak ed saray Ammonita, iter kod sika so unonan toon ompaway ed abung ko ya onabet ed siak kapawil ko manlapud impilaban ko.’

Dinengel nen Jehova so impormisa nen Jefte, tan sikatoy tinulongan to pian manalo. Kasempet nen Jefte, antam no siopay sankaunaan ya inmabet ed sikato? Say anak ton bii, say alenleneg ya anak to. Imbaga nen Jefte: ‘O, anako! Paeermenen mo ak. Ta nampormisa ak ed si Jehova tan agko la nababawi.’

Nen naamtaan na anak nen Jefte so impormisa to, diad gapo et maer-ermen met. Ta amta ton lapud satan et kaukolan ton taynan so ama tan kakaaro to. Anggaman ontan, sikatoy makapanserbid si Jehova ed interon bilay to diad tabernakulo ed Silo. Kanian imbaga tod ama to: ‘No nampormisa kayod si Jehova, gawa yo.’

Kanian linmad Silo so anak nen Jefte, tan nanserbi ed si Jehova diad tabernakulo legay bilay to. Apatiran agew kada taon, sikatoy bibisitaen na bibiid Israel tan malikeliket iran saniiba. Inad-aro na totoo so anak nen Jefte ta sikatoy maong ya lingkor nen Jehova.