Timoteo—Balon Kaiba nen Pablo

SAYAY kalangweran ya kaiba nen apostol Pablo et si Timoteo. Taga-Listra so pamilya to. Say ngaran na nanay to et Eunice tan say bai to et si Loida.

Antam no antoy ibabaga nen Pablo ed si Timoteo? ‘Labay moy milad sikami nen Silas? Natulongan mo kamin manpulong ed ararawin pasen,’ so kuan nen Pablo.

‘On, labay koy mila,’ so ebat nen Timoteo. Kanian ag-abayag, akilay Timoteo ed si Pablo tan Silas. Balet antis na satan, amtaen tayo no anto ni ray agawad si Pablo. Manga 17 taon lay apalabas manlapu nen nampanengneng si Jesus ed sikato diad dalan paarap ed Damasco.

Tandaan, linmay Pablo ed Damasco pian pairapen iray disipulo nen Jesus, balet natan sakey met lan disipulo! Labay na arum ed saray kalaban ya pateyen si Pablo pian agto nibangat so nipaakar ed si Jesus. Balet tinulongan na saray disipulo ya makatakas. Inlugan dad baskit tan inleksab dad paway na padir na syudad.

Insan, linmay Pablo ed Antioquia pian manpulong. Ditan inmunan tinawag ya Kristiano iray papatumbok nen Jesus. Kayari to, nampulong si Pablo tan Bernabe ed ararawin bansa. Say sakey a syudad ya binisita ra et say Listra ya panaayaman nen Timoteo.

Kayari na manga sakey taon, diad komaduan impanbiahe di Pablo et pinmawil irad Listra. Sanen akilay Timoteo ed si Pablo tan Silas, antam no iner so nakar da? Nengneng moy mapa, tan amtaen tayo iray lugar.

Unona, linma rad Iconio, insan diad syudad na Antioquia. Kayari na satan, linma rad Troas, insan diad Filipos, Tesalonica, tan Berea. Nanenengneng moy Atenas diad mapa? Nampulong ira ditan di Pablo. Kayari to et sakey tan kapalduan taon iran nampulong ed Corinto. Binisita da met ya agano so Efeso. Insan ira pinmawil ed Cesarea, tan linma rad Antioquia, ditan tinmilak si Pablo.

Kanian arawdawi so biniahe nen Timoteo pian natulongan si Pablo ya ipulong so “maong a balita” tan nipaalagey iray balon kongregasyon. No baleg ka la, aligen mo kasi si Timoteo ya matoor a lingkor na Dios?