Kaukolan Tayon Sumpaen Iray Tukso

WALA ta lay angibaga ed sikan manggawa ka na mauges?— Kasin sinugsogan to kan gawaen mo itan? Odino kasin imbaga ton panliketan labat itan tan aliwan mauges so panggawa ed satan?— No susugsogan itayo na sakey, sasalien ton tuksoen itayo.

Antoy gawaen tayo no tutuksoen itayo? Kasin patukso itayo tan manggawa na mauges?— Satan so agmamaliket ed si Jehova a Dios. Balet antam no siopa so manliket?— On, si Satanas a Diablo.

Si Satanas et kabusol na Dios, tan si Satanas et kabusol tayo met. Agtayo nanengneng lapud sikatoy sakey ya espiritu. Balet nanengneng to itayo. Aminsan et akitongtong so Diablo ed si Jesus, say Sankamaongan a Managbangat, tan sinali ton tuksoen. Imanoen ta no anto so ginawa nen Jesus. Insan ta amtaen so dugan gawaen no natutukso itayo.

Naynay a labay nen Jesus a gawaen so panlabayan na Dios. Impatnag to iya diad impanpabautismo diad Ilog na Jordan. Sanen kasumsumpal nen Jesus a nampabautismo et Sikatoy sinali nen Satanas a tuksoen. Ibabaga na Biblia a say ‘tawen alukasan’ ed si Jesus. (Mateo 3:16) Kabaliksan na saya a nanononotan la nen Jesus ed saman so amin a nipaakar ed inmunan bilay to ed tawen kaibay Dios.

Kayari na bautismo to, linma si Jesus ed lugar ya anggapoy makadisturbo pian isipen iray onggagapo lan nanonotan to. Apataplon agew tan labi so linmabas. Diad saman et agbalot angan si Jesus, kanian sikatoy narnarasan la. Diad saman et sinali nen Satanas a tuksoen si Jesus.

Imbaga na Diablo: “No sika so Anak na Dios, iganggan mo a sarayan bato et magmaliw iran tinapay.” Masamit komon so tinapay! Balet kasin sarag nen Jesus a pagmaliwen a tinapay iray bato?— On, sarag to. Akin? Lapud si Jesus, say Anak na Dios, so walaan na nikaduma iran pakapanyari.

Kasin pagmaliwen mon tinapay so bato no ibaga ed sika na Diablo a gawaen mo itan?— Narasan lay Jesus. Kanian agkasi duga no gawaen to itan a maminsan labat?— Amta nen Jesus a mauges so pangusar ed pakapanyari to ed ontan a paraan. Inter nen Jehova ed sikato iratan a pakapanyari pian iyasingger so totoo ed Dios, aliwan parad pankaabigan ton dili.

Kanian, imbaga nen Jesus ed si Satanas no anto so nisulat ed Biblia: ‘Say too so manbilay, aliwan diad tinapay labat, noagta diad amin a salita a manlapud sangi nen Jehova.’ Amta nen Jesus a say panggawa na makapaliket ed si Jehova so lalon importante nen say naakan.

Balet ta tinukso lamet na Diablo. Intagar toy Jesus ed Jerusalem tan pinaalagey to ed tagey na templo. Insan imbaga nen Satanas: ‘No anak ka na Dios, taboy ka. Ta nisulat a sampaten ka na saray anghel na Dios.’

Akin ya imbaga nen Satanas iya?— Imbaga to itan pian tuksoen si Jesus a manggawa na makapuy. Balet aglamet dinengel nen Jesus si Satanas. Imbaga to ed si Satanas: “Nisulat, ‘Agmo susuboken si Jehova a Dios mo.’” Amta nen Jesus a makapuy a suboken si Jehova diad pangipeligro ed bilay to.

Agnin siansia tinmunda si Satanas. Intagar to lamet si Jesus ed atagtagey a palandey. Diman et impanengneng toy amin a panarian, odino gobgobierno, na mundo tan say kagalangan na saratan. Insan inkuan nen Satanas ed si Jesus: ‘Amin na saraya iter ko ed sika no ondakmomo ka tan mandayew ka’d siak.’

Nonot mo pay iiter na Diablo. Kasin kien nen Satanas irayan amin a panarian, odino gobgobierno na totoo?— On, lapud agkinontra nen Jesus so ibabaga nen Satanas a kien to iratan. Si Satanas so talagan manuley ed amin a nasyon na mundo. Sikato ni ingen so tatawagen na Biblia a ‘manuley na sayan mundo.’​—Juan 12:31.

Antoy gawaen mo no walay insipan ed sika na Diablo no sikatoy dayewen mo?— Amta nen Jesus a mauges a dayewen so Diablo anggan antoy naawat Ton gunggona. Kanian inkuan nen Jesus: ‘Arawi ka, Satanas! Lapud ibabaga na Biblia a si Jehova a Dios mo so nepeg mon dayewen tan sikatoy nepeg mon panlingkoran labat.’​—Mateo 4:1-10; Lucas 4:1-13.

Nipapaarap itayo met ed saray tukso. Wala ta iray antam ed saratan?— Nia’y sakey ya alimbawa. Bilbilang ta nanggawa si nanay mo na masamsamit a bibingka odino cake a palamis. Insan imbaga to ed sika ya agmo ni ’tan kakanen anggad agni asabi so oras na panangan. Balet ta narnarasan ka la, kanian nayarin natutukso ka lan mangan. Kasin unoren moy nanay mo?— Labay nen Satanas ya agmo unoren si nanay mo.

Nonot mo si Jesus. Sikatoy narnarasan met la. Balet amta to a say pamaliket ed Dios so mas importante nen say panangan. Nipatnag mo a singa ka si Jesus no gawaen mo so ibabaga nen nanay mo.

Nayarin ibaga ed sika na arum ya ugugaw a mangakmon kay pigaran tableta. Nayarin ibaga da ed sika a balibali liknaan mo no akmonen mo iratan. Balet ta saratan a tableta et nayarin druga. Mansakit kan maong odino ompatey ka ni ingen no akmonen mo iratan. Odino nayarin walay mangiter ed sika na sigarilyo, a nanlaok met na druga, insan da ka sugsogan a mansigarilyo. Anto so gawaen mo ey?—

Nonot mo si Jesus. Susugsogan nen Satanas si Jesus ya ipeligro toy bilay to diad impangibaga ton ontaboy diad templo. Balet ag-itan ginawa nen Jesus. Anto so gawaen mo no walay angibaga ed sika a manggaway mapeligro?— Agdinengel nen Jesus si Satanas. Agmo met dedengelen so siopaman a manugsog ed sikan manggawa na saray mauges.

Nasabi panaon et nayarin iganggan da kan mandayew ed imahen, ya ibabaga na Biblia ya agtayo nepeg a gawaen itan. (Exodo 20:4, 5) Nayarin kabiangan itan na seremonya diad eskuelaan. Nayarin ibaga da ed sika ya agda ka la awaten ed eskuelaan no agmo gawaen itan. Antoy gawaen mo ey?—

Mainomay a gawaen so duga no gagawaen met na amin. Balet mairap a gawaen so duga no arum so manusugsog ed sikatayo a manggawa na mauges. Nayarin ibaga ra a say gagawaen da et aliwa met a mauges. Balet say importantin tepet et, Anto so ibabaga na Dios ed satan? Amta to so sankaabigan.

Kanian anggan anto so ibaga na arum, agtayon balot gagawaen iray ibabaga na Dios a mauges. Diad ontan et napaliket tayon naynay so Dios, tan agtayon balot paliketen so Diablo.