Katuloyan na Kapitulo 25
Para ed Mundo nen Satanas, Odino Para ed Balon Sistema na Dios
17. (a) Anto so mauges ed saray piesta a mamapagalang ed saray bantog a lalaki odino nasyones? (b) Panon so pangipanengneng na Biblia no anton kurang so alaen na saray Kristianos?
17 Arum iran piesta na mundo et say panamagalang ed bantog a totoo. Siansia nin saray arum so mamapagalang tan mangitatandoro ed nasyones odino minumundon muyongan. Balet say Biblia so mamapasakbay a sumpad pangiter na panagdayew a panamagalang ed totoo, odino say panmatalek ed saray muyongan diad panggawa ed saman so nayarian lambengat na Dios a gawaen. (Gawa 10:25, 26; 12:21-23; Apocalipsis 19:10; Jeremias 17:5-7) Kanian saray piesta a manggetman mangitandoro ed sakey a too odino sakey a muyongan na too so agmitukoyan ed linawa na Dios, tan saray tuan Kristiano so agnepeg a mibiang ed saratan.—Roma 12:2.
18. (a) Antoran bengatla so ginawa na totoo a pagalangan odino dayewen? (b) Anto so ibabaga na ganggan na Dios nipaakar ed panangiter na panagdayew a panamagalang ed sakey a bengatla?
18 Dakel iran bengatla so ginawa na totoo a nibaga ed totoon pagalangan odino dayewen. Arum ed saraya so ginawa ed metal odino kiew. Arum so ginawa ed abel tan nayarin sikara so dinait odino pininturaan na sakey a retrato na bengatla ed tawen odino diad dalin. Say sakey a nasyon so nayarin mangipaakseb na ganggan a mangibabagan balang sakey so nepeg a mangiter na panagdayew a pamagalang ed satan a bengatla. Balet ibabaga na ganggan na Dios a saray ariripen to so agmanepeg a manggawa ed satan. (Exodo 20:4, 5; Mateo 4:10) Anto so ginawa na totoo na Dios ed ontan a kipapasen?
19. (a) Anto so ingganggan na ari na Babilonia a gawaen na amin? (b) Siopa ehemplo so maabig a tumboken na saray Kristianos?
19 Diad kadaanan a Babilonia si Arin Nabucodonosor so angipaalagey na abalbaleg a talintaon balitok tan ingganggan to so amin ya ondakmomo ed satan. ‘Siopaman ya ag-ondakmomo,’ kuanto, ‘so ibantak ed manliob ya apuy na palbaan.’ Ibabaga na Biblia ed sikatayo a taloran walad kalangweran a Hebreo, si Sedrac, Mesac tan Abednego, so ag-angunor ed ganggan na ari. Akin? Lapud satan et nilanor to so panagdayew, tan say panagdayew da so para ed si Jehova lambengat. Inabobonan na Dios so ginawa ra, tan inliktar tora ed sanok na ari. Diad tua, anengneng nen Nabucodonosor a sarayan ariripen nen Jehova so aliwan kaatapan ed Estado, sirin sikato so angipaakseb na ganggan a manalimbeng ed kawayangan da. (Daniel 3:1-30) Agta pagalangan yo so katooran na sarayan walad kalangweran a lalaki? Kasin ipanengneng yo a sikayo so peteg a para ed balon sistema na Dios diad pangunor ed amin a ganggan na Dios?—Gawa 5:29.
20. Antoray nanduruman paraan ya uusaren nen Satanas diad panalin panangguyor ed sikatayo a mamuyak ed ganggan na Dios ed seksual a moralidad?
20 Si Satanas, siempre, so agmalabay ed sikatayo a mandayew ed si Jehova. Labay to itayon mandayew ed sikato. Kanian sasalien to itayon panggawaen na saman so labay to, lapud kabat to a sikatayo so magmaliw ya ariripen, odino igaganggan na siopaman a tuloken tayo. (Roma 6:16) Diad panamegley na nanduruman paraan, a pati say telebisyon, sine, tan arum iran porma na sayaw tan imoral a babasaen, ilalagyat nen Satanas so seksual a relasyon ed baetan na saray aliwan sanasawan totoo, tan ontan met ed pikakalugoran. Say ontan a kondukta so agawan ompatnag a naawat, anggan manepeg ni ingen. Anggaman kuan, saya so sumpa ed saray ganggan na Dios. (Hebreos 13:4; Efeso 5:3-5) Tan say sakey a toon mibibiang ed ontan a gawa so peteg a mangipapanengneng a sikato so para ed mundo nen Satanas.
21. Antoray arum ya agagamil a, no saratan so gawaen na sakey a too, et mangipanengneng a sikato so para ed mundo nen Satanas?
21 Walaray arum iran agamil a ginawan popular na mundo nen Satanas balet ta sikara so sumpa ed ganggan na Dios. Sakey ed saratan et say panagbuanges. (1 Corinto 6:9, 10) Sananey et say panag-usar ed saray druga a singa say marihuana tan heroin, tan ontan met ed panagtabako. Sarayan bengatla so makaderal ed laman tan sikara so marutak. Say pangusar ed saratan so mabitar a pananumlang ed bilin na Dios a “linisan tayo so inkasikatayo ed amin a dutak na laman tan espiritu.” (2 Corinto 7:1) Say panagtabako so maneral met ed bunigas na saraman so kakaabay a makasungap ed asewek, sirin say managsigarilyo so manusumlang ed ganggan na Dios a mangibabagan aroen na sakey a Kristiano so kaabay to.—Mateo 22:39.
22. (a) Anto so ibabaga na Biblia nipaakar ed dala? (b) Akin a say panangisaksak ed dala so aliwan aktual a duma ed “panangan” na dala? (c) Antoy mangipanengneng a say ‘iyarawi a manlapud dala’ et kabaliksan to so agbalot pangipaloob ed laman yo?
22 Sananey a kaslakan ya agamil ed nanduruman pasen na mundo et say panangan na dala. Sirin saray ayayep ya ag-ira manepeg ya aparalaan so kakanen odino nayarin impaikik so dala ra tan inusar a tagano diad panangan. Ingen say Salita na Dios so mangisesebel diad panangan na dala. (Genesis 9:3, 4; Levitico 17:10) Anto, sirin, so nipaakar ed panangisaksak na dala? Arum a totoo so nayarin mangikatunongan a say panangisaksak na dala so aliwan peteg a “panangan.” Balet agta tua a sano say sakey a pasyente so agmakayarin mamaloob na tagano ed sangi to, et mabetbet ya irekomenda na doktor so pamakan ed sikato diad parehon metodo a singa say panangisaksak na dala? Ibabaga ed sikatayo na Biblia ya “onarawi a manlapud . . . dala.” (Gawa 15:20, 29) Anto so kabaliksan na saya? No ibaga na doktor ed sikayo ya arawian yo so mabayanin iinumen, kasin kabaliksan labat na satan ya agyo iparalan ed sangi yo noagta nayarin isaksak a direkta ed saray ulat yo? Siempre andi! Sirin, met, say ‘iyarawi a manlapud dala’ et kabaliksan to so agpangipaloob a balot ed laman yo.
23. (a) Anton desisyon so nakaukolan yon gawaen? (b) Anto so mangipanengneng ed desisyon a ginawa yo?
23 Nakaukolan yon ipanengneng ed si Jehovan Dios a sikayo so para ed balon sistema to tan aliwan kabiangan na sayan mundo. Saya so mankaukolan na desisyon. Say desisyon a nakaukolan yon gawaen et say panlingkor ed si Jehova, say panggawa ed linawa to. Sikayo so agnayarin agmandesidi, a singa saramay arum ya Israelitas nen inmunan panaon. (1 Arari 18:21) Ta nodnonoten, no agyo lilingkoran si Jehova, sirin lilingkoran yo si Satanas. Nayarin ikuan yo a sikayo so para ed balon sistema na Dios, balet anto so ibabaga na kondukta yo? Say pagmaliw a para ed balon sistema na Dios so manasaglawi na ipaliis ed amin ya agagamil a kinondena na Dios tan aliwan para ed matunong a balon sistema to.