“Makanan Basaen So Palapagan na Saray Tasi nen Jehova”

Saya so titulo na sakey ya artikulon pinmatnag ed Disyembre 23, 1988, ed Creston News Advertiser, Iowa, E.U.A. Say “pilosopya tan relihyon so amainteres ed siak,” so inkuan nen managsulat a Randy Porter, “balet saray palapagan met so walaan na semi-sekular iran estorya nipaakar ed makapakelaw a panduruma na saray isyu ed mundo. . . .

“Nagkalalo ni, arum so nayarin nasurprisan makaaral ed saray magasin a mabetbet a nanaon ed arum iran autoritatibon sengegan, a nilikud ed Biblia. . . .

“Ag-inilaloan, say Enero [22] edisyon met so angipabitar ed sakey ya antikey ya estorya tan dekolor a retrato na dampay na estado na Iowa, say geode. Ibabaga na artikulo a saray totoo so singa ra geodes. Imbes a simplin-nengneng ed paway, sano nalukasan et saray geodes so mangiparungtal na masnag, kristalisadon akindalem a kalimgasan. Say sakey a too, met, so nayarin simplin-nengneng ed paway, tan anggan mareen tan mabaing; anggaman kuan, sano say sakey a too so mangala ‘ed panaon a nikabat, sikara so lukas tan mangipanengneng ed sikayo na akindalem a kalimgasan ya onsinag.’ . . .

“Say Enero [22] a paway so nankarga na pigaran arum ya artikulon nayarin agmet dinmalan ed lamisaan ko! Alimbawa, maslak ed totoo so akadngel nipaakar ed managpatey a bayaong ed Aprika, balet say sakey ya artikulo so angibaga no panon a saray entomolohista so ‘mantatalos’ ed saray bayaong. Dinesinyo na saray Amerikanon inhinyero, sakey a microprocessor a kagawaan a melag a tuloy ya ipeket ed beneg na sakey a bayaong so makayarin ontulong ed saray sientistas a mangipatalos ed kurang na saray bayaong a manlapud sakey ya anggad duaran kilometro.”

Say Awake! so walaan na saray sumusulat to ed dakel iran bansa ed interon mundo tan sirin walaan na saray sengegan ya agnasasabi na dakel. Liknaen min sikayo so makagungguna ed satan tan manggayaga ed makapasagyat ya artikulo na Awake! Walaan na promedyon niiimprinta a 11,250,000 a kopya a kada paway tan ipapalapag ed 54 lenguahe.

Ipangasin ipawit so sakey taon a suskripsion ed Awake! Ilaktip ko so ₱60 ed 24 a paway na sayan magasin (2 kopya ed sakey a bulan).