Anto so Agawa ed Inkanatural na Too?

“Akin a walaan tayo na karuksaan ed ugaw ed sayan panaon? Akin a walaan tayo na karuksaan ed ayayep? Akin a walaan tayo na karawalan? . . . Akin a manggaway terorismo iray totoo? Akin a mandruga iray totoo? . . . Akin, anta walaan ka na amin a bengatla, a saray arum a totoo et onarap ed saramay manunan bengabengatla a maneral ed interon sibilisasyon?”

SARAMAN a tepetepet so tinepet a maksil na katagtagyan a ministro na Britanya. Nayarin nitepet yo so mipadparan tepetepet a dakel iran danay. Akaromog ka ta na anggan dinan a makapenek iran ebat?

Ibabalikas so tepet to ed sakey ya inengneng, inkuan na katagtagyan a ministro: “Diad dakel a taon sanen siak so tobonbalo tan walad politiko a tekep na amin ya ilalok tan kugip tan ambisyon, ompatnag a siak tan dakel ed saray kaedaran ko a no sikamiy walaan na panaon no iner a walaan kami na maabig a paabung, maabig ya edukasyon, sakey a makatunungan ya estandarte na panagbilay, insan amin a bengatla so nitarya tan nawalaan kami na kaabigan tan lalon masmainomay ya arapen. Kabat mi natan ya aliwan ontan. Sikamiy sumpa ed peteg iran problema ed inkanatural na too.”​—Kien mi so italiko.

Say inkanatural na too so natukor bilang “say inkawetwet na manuna iran kalidad tan ugali na totoo.” Mapatnag, a saray mansumlangan iran kalidad tan ugali so sengegan na saray problema ed personal, nasyonal, odino anggan ed pang-internasyonal. Balet ed anton kalaknab a peteg a tetelen so inkanatural na too ed mapeligro iran kurang ed karawalan, terorismo, negosyo ed druga, tan arum nin mipadparad saya?

Kasin say inkanatural na too lambengat so tetelen ed saray kipapasen a manigensigen a “maneral ed interon sibilisasyon”? Odino walaray arum iran sengegan a nonoten tayo pian isalaysay no akin a saray totoo et mag-mainomay a nalagyat ed makapauges, sinisiblet iran ag-agamil anta sarag dan dampoten so atatagey, magalang iran babatiken? Nengnengen tayo.