Sayan Libro so Amasimbalo ed Saray Bilay Da

Pigaran taon la so linmabas sakey a bii so angawat na diborsyo nanlapud asawa ton laki. Diad saginonor say anak ton laki si Steve so nagmaliw a sakey ed saray Tasi nen Jehova. Sinali nen Steve ingen sinmaew ya itongtong ed ina to so nipaakar ed pananisia to. Nakar to met a bisitaen so ama to, ya ompapatey ed kanser.

Imbes a mitongtong na dakel, si Steve so basta angitilak na libro a Makapambilay Kayo na Ando lan Ando ed Paraiso diad Dalin ed diking na dukolan nen ama to tan inkuan a saman so makatulong ed sikato. Binasa na ama to so libro tan diad dili to et ginmapon inmatendi ed saray pantitipon na saray Tasi nen Jehova ed Enero 1988.

Kaleganan to, say ina nen Steve so walaan na saray pankanawnawan ed saray pantitipon na pamilya a naimano so balon personalidad ya impanengneng na datin-asawa to. Saya so akalagyat ed sikaton onabobon ya onatendi ed miting na saray Tasi nen Jehova. Ginmapon onatendi ed saray miting a maparanay, tan diad saginonor et akiyurongan ed sikara dingan na datin asawa to. Agnambayag sikaray nanasawa lamet.

Say ama nen Steve so inatey nen Setyembre 1988 kayariy inggapo ton akibiang ed Kristianon ministeryo. Say ina nen Steve, a nanasikaso ed ama to legan na kaunoran iran bulan ed sakit to, so abautismoan nen Hunyo 1988 tan natan et sakey a maseet a Tasi.

Say Makapambilay Kayo na Ando lan Ando ed Paraiso diad Dalin so sakey a libron makapangiter na ilalo diad pangituro ed saray ebat na Biblia ed saray problema ed bilay. Satan so mausar ed impamasimbalo ed saray dakel a bilay. Parad inpormasyon no panon a nawalaan na sakey a kopya, mansulat tan mangibuson ed kaiban kupon.

Labay ko so makawat ed masekder-apis a 256-pahinan libro a Makapambilay Kayo na Ando lan Ando ed Paraiso diad Dalin. ( Mansulat ed address ed leksab parad inpormasyon. Diad paway na Pilipinas, mansulat ed lokal a sanga na Watch Tower a para ed impormasyon.)