Impangipaway ed Kaunoran Iran Lukot ed Inatey a Dayat

SANEN imbeneg a Setyembre, sakey a lukot a ginawa na eskolar ed apalabas iran dekada so diad kaunoran et niparungtal. Say ampetang a sangsangan na saray estudyante ed saray Lukot ed Inatey a Dayat so manasampot la, ingen sakey a balon sangsangan so onggagapo.

Saray Lukot ed Inatey a Dayat so nalmoan ed saray ungib ya asingger ed Inatey a Dayat nen 1947 tan ed saginonor iran taon. Sikaray mablin tuloy diad pangidemostra ed makanan inkasusto na teksto na Hebreon Kasulatan tan pamalinew ed saray relihyoson kipapasen ed Palestina sanen wadiad dalin si Jesus. (Isaias 40:8) Anggaman arum a manuskrito so asasakbay a nipalapag, diad 1991 et ngalngalin 400 iran manuskrito so siansian agnipalapag tan agniwala ed maslak iran eskolar. Dakel so manliknan singa si Propesor Ben Zion Wacholder, “a dismayado ed ilalo a diad kaplesan ya andar na panangipalapag et nayarin amin tayo so andi lad bilay sano niwala ed mundo so tugyop na saray teksto ed Inatey a Dayat.”

Balet say kipapasen so anguman nen imbeneg a Setyembre. Ununa, inyabawag nen Propesor Wacholder tan say kaiba ton si Martin Abegg, ya inusar dan sikakabat so computer pian pawalaen so nilaniran iran teksto. Insan, inyabawag na Libraria na Huntington ed San Marino, California, E.U.A., a walaan ira na saray retrato na orihinal iran manuskrito tan saraya so bulos a niwalad saray kagalgalang ya eskolar. Kanian, dakel iran niretraton kopya na saray lukot so ginawa pian naseguro so kipreserba ra. Saray tugyop na retrato so insinop ed nanduruman pasen, tan nibanbanan say sakey et diad Libraria na Huntington.

Sayan impanguman na saray ebento so tinawag na sakey ya eskolar a ‘say eskolaryon kasimbangan na inkagba na Bakor na Berlin.’ Say palapagan na atugyop a teksto tan say impangipaway ed saray retrato so inkuan na opisyal iran editor a ‘panagtakew.’ Say sangsangan nipaakar ed ethics so nayarin onterak ed dakel iran taon. Diad bekta, mapatnag a nayarian la natan na saray eskolar so ontupleg ed interon lugan na saray Lukot ed Inatey a Dayat.

[Litrato ed pahina 32]

Impangiparungtal na komentaryo ed Habacuc, sakey ed saray Lukot ed Inatey a Dayat