Apocalipsis—Asingger la so Engranden Kapantokan To!

Kapitulo 4

Onsabi Si Jesus a Tekep na Panamaseseg

1. Diad siopa so susulatan nen Juan, tan siopa natan so nepeg a nainteresan a tuloy ed mensahe to?

¹ Say ontumbok so nepeg a makapasagyat a tuloy ed balang sakey a nikasakey ed saray kongregasyon na totoo na Dios natan. Nia so sakey a serye na saray mensahe. Sikara so walaan na partikular ya aplikasyon legan a say “aturon panaon” so manasingger. (Apocalipsis 1:3) Onkana ed andi-anggaan a pakagunggunaan tayo so italineng ed saratan ya anunsyo. Nabasa so kuritan: “Si Juan ed pitoran kongregasyon a wala ed luyag na Asia: Komon ta nawalaan kayo na agkanepegan a panangasi tan kareenan a manlapud ‘Say Sakey a sikato so wala natan tan wala nensaman tan sikato so onsabi,’ tan manlapud saray pitoran espiritu a wala ed arap na trono to, tan manlapud si Jesu-Kristo.”​—Apocalipsis 1:4, 5a.

2. (a) Anto so ituturo na bilang a “pitora”? (b) Kaleganan na agew na Katawan, diad siopa so aplikaan na saray mensahe ed “pitoran kongregasyon”?

² Dia et ipapaarap nen Juan so sulat ed “pitoran kongregasyon,” tan saraya so salambiten ed sikatayo na propesiya ed saginonor. Atan a bilang, “pitora,” so mabetbet a naulit ed Apocalipsis. Ituturo to so inkagnap, nagkalautla no nipaakar ed bengabengatlan kayarian na Dios tan ed alanaan a kongregasyon to. Lapud say bilang na saray kongregasyon na totoo na Dios ed sankamundoan so binmulaslas ed sinamplon nilibu kaleganan na agew na Katawan, makaseguro itayon say manunan nibagan “pitoran kongregasyon” na saray alanaan so onaplika met ed amin a totoo na Dios natan. (Apocalipsis 1:10) On, si Juan so walaan na makanan mensahe ed amin a kongregasyon na saray Tasi nen Jehova tan ed amin na saramay akikasakey ed sikara, diad amin a pasen ed tapew na sayan dalin.

3. (a) Diad pabano nen Juan, iner so panlapuan na “agkanepegan a panangasi tan kareenan”? (b) Anton balikas nen apostol Pablo so miulibay ed pabano nen Juan?

³ “Agkanepegan a panangasi tan kareenan”​—agaylan saraya so kalikaliktan tan nagkalautla sano naapresya tayo so nanlapuan da! Say “Sakey” a sikato so panlalapuan na agus da et say Soberanon Katawan a Jehova a mismo, “say Ari ed andi-anggaan,” a manbilay “manlapud panaon ya andi-geter ya angga ed panaon ya andi-geter.” (1 Timoteo 1:17; Salmo 90:2) Alanor dia, met, et “saray pitoran espiritu,” ya atan a termino so mangipapanengneng ed inkagnap na ikikiwas na aktibon puersa na Dios, odino masanton espiritu, legan ya itarok to so pakatalos tan bendisyon ed amin a mangimano ed propesiya. Ontan met a manguukopa na manunan betang si “Jesu-Kristo,” a diad saginonor et insulat nen Juan: “Sikato so napno na agkanepegan a panangasi tan katuaan.” (Juan 1:14) Sirin, say pabano nen Juan so walaan na parehon elemento a sinaglawi nen apostol Pablo diad pansara na komaduan sulat to ed kongregasyon na Corinto: “Say agkanepegan a panangasi na Katawan a Jesu-Kristo tan say aro na Dios tan say pinanabang ed masanton espiritu so wala komon ed amin ed sikayo.” (2 Corinto 13:14) Komon ta saratan a salita so onaplika met ed balang sakey ed sikatayo a mangaaro ed katuaan natan!​—Salmo 119:97.

“Say Matoor a Tasi”

4. Panon so impangituloy nen Juan a paneskribe ed si Jesu-Kristo, tan akin a sarayan managdeskriben termino so matukotukoy?

⁴ Ontumbok ed si Jehova, si Jesus so sankaglorian a persona ed talba, a singa binidbir nen Juan, a dedeskribien to bilang “‘say Matoor a Tasi,’ ‘Say panguloan a manlapud saray inaatey,’ tan ‘Say Manuley na saray arari ed dalin.’” (Apocalipsis 1:5b) Singa say bulan ed katawenan, sikato so malet a niletneg a bilang say sankabalgan a Tasi diad Inkadios nen Jehova. (Salmo 89:37) Kayari na impamemben to na katooran ed sakey a masakripisyon ipapatey, sikato so nagmaliw ya inmuna a manlapud limog na katooan ya apaoli ed imortal ya espiritun bilay. (Colosas 1:18) Natan diad kiwawala nen Jehova, sikato so nitandoro ed tagey na amin a mangaraldalin ya arari, unong ta akawesan tekep na “amin a pakauley . . . ed tawen tan ed dalin.” (Mateo 28:18; Salmo 89:27; 1 Timoteo 6:15) Nen 1914 sikato so nipasen bilang Ari a manguley ed limog na mangaraldalin a nasyones.​—Salmo 2:6-9; Mateo 25:31-33.

5. (a) Panon nen Juan ya intuloy so pangibalikas na apresasyon ed Katawan a Jesu-Kristo? (b) Siopa so nagunggunaan manlapu ed langkap nen Jesus ya ayadyarin atooan a bilay to, tan panon so impibiang na saray alanaan a Kristianos diad sakey a nikadkaduman bendisyon?

⁵ Intultuloy nen Juan ya ibalikas so apresasyon ed si Katawan a Jesu-Kristo diad sarayan masnag a salita: “Diad sikato ya angaro ed sikatayo tan angibulos ed saray kasalanan tayo diad panamegley na dilin dala to​—tan ginawa to itayo a sakey a panarian, saray saserdote ed Dios to tan Ama to—​on, diad sikato komon so gloria tan pakayari ed ando lan ando. Amen.” (Apocalipsis 1:5c, 6) Inter nen Jesus so ayadyarin atooan a bilay to ta pian saramay walad mundo na katooan a mangagamil na pananisia ed sikato so nipawil ed ayadyarin bilay. Sika, pinablin managbasa, so nayarin nisakup ed saya! (Juan 3:16) Balet say masakripisyon impatey nen Jesus so angilukas na dalan a para ed nikaduman bendisyon ed saraman so magmaliw ya alanaan a Kristianos a singa si Juan. Saraya so niyabawag a matunong diad letnegan na dondon bagat nen Jesus. Diad pangitalirak ed amin iran ilalo ed mangaraldalin a bilay, a singa ginawa nen Jesus, saramay kabiangan na melag a pulok so nailalak ed espiritu na Dios, diad panilalo ed kioli pian manlingkor a bilang arari tan saserdote a kaiba nen Jesu-Kristo ed Panarian to. (Lucas 12:32; Roma 8:18; 1 Pedro 2:5; Apocalipsis 20:6) Agaylan engranden pribilehyo! Agpankelawan ya inyabawag nen Juan a sipepekder a say gloria tan say pakayari so kayarian nen Jesus!

“Onsabi a Kaulop na Saray Lurem”

6. (a) Anto so iyaabawag nen Juan nipaakar ed ‘isabi’ nen Jesus a “kaiba na saray lurem,” tan diad anton propesiya nen Jesus so nayarin anonotan nen Juan? (b) Panon so ‘isabi’ nen Jesus, tan siopa so makasagmak na baleg a kaermenan ed dalin?

⁶ Ontumbok, maligligsan iyaabawag nen Juan: “Nia! Sikato so onsabi a kaulop na saray lurem, tan amin a mata so makanengneng ed sikato, tan saraman so anugat ed sikato; tan amin na saray tribu na dalin so mandageyem ed kaermenan nisesengeg ed sikato. On, Amen.” (Apocalipsis 1:7) Anggapoy duaruwan nipapanonot ed si Juan so asasakbay a propesiya nen Jesus nipaakar ed konklusyon na sistema na bengabengatla. Ditan et imbaga nen Jesus: “Insan say tanda na Anak na too so ompatnag ed tawen, tan insan amin a tribu na dalin so mantagleey, tan nanengneng da so Anak na too ya onsasabi ed saray lurem na tawen a tekep na pakayari tan baleg a gloria.” (Mateo 24:3, 30) Sirin, si Jesus so ‘onsabi’ diad pangipaarap to na imano ed pangidapo na saray panangukom nen Jehova ed nasyones. Saya so mansumpal ed makatantandan pananguman ed dalin, tan lapud “amin a tribu na dalin” so angipulisay ed kapetegan na inkaari nen Jesus, sikara a peteg so makasagmak “na petang na sanok na Dios a Makapanyarin-amin.”​—Apocalipsis 19:11-21; Salmo 2:2, 3, 8, 9.

7. Panon ya “amin a mata,” pati saraman so matungangan totoo, so “makanengneng” ed si Jesus?

⁷ Kaleganan na unor a labi a kaiba nen Jesus iray babangatan to, imbaga to ed sikara: “Wala ni daiset tan say mundo so agla makanengneng ed siak.” (Juan 14:19) Panon, sirin, ya “amin a mata so makanengneng ed sikato?” Agtayo nepeg ya ilaloan a saray kakabusol nen Jesus so makanengneng ed sikato ed saray pisikal a mata, lapud imbaga nen apostol Pablo, kayari insegep nen Jesus ed tawen, a si Jesus natan so “manaayam ed agnaasinggeran a liwawa,” tan “anggapo so anggan sakey ed saray lalaki ya akanengneng odino makanengneng” ed sikato. (1 Timoteo 6:16) Mapatnag, labay nen Juan ya ibaga a “nanengneng” diad pantalos a “natebek,” a singa nanengneng tayo, odino natebek, iray agnanengneng a kalidad na Dios diad panamegley na saray palsa to. (Roma 1:20) Si Jesus “so onsabi a kaiba na saray lurem” unong ta sikato so agnanengneng na uldar a mata a singa say agew sano wala ed sanib na saray lurem. Anggan sano say agew so sinaniban na saray lurem legan na oras-na-agew, amta tayo a sikato so wadtan lapud liwawa-na-agew a manliberliber ed sikatayo. Miulibay, anggaman say Katawan a Jesus so agnanengneng, sikato so nipatnag a singa ‘sakey a mandarlang ya apuy, unong ya itarok to so panangibales ed saraman so agmangunor na maong a balita nipaakar ed sikato.’ Saraya met so napaskar a “makanengneng ed sikato.”​—2 Tesalonica 1:6-8; 2:8.

8. (a) Siopa “iraman so anugat ed sikato” nen 33 K.P., tan siopa iraya natan? (b) Lapud si Jesus so anggapo la diad dalin, panon a saray totoo so ‘manugat ed sikato’?

⁸ Si Jesus so ‘nanengneng’ met na “saraman so anugat ed sikato.” Nayarin siopa iraya? Sanen si Jesus so pinatey nen 33 K.P., saray sundalon Romano so anugat ed sikato a literal. Say kasalanan ed saman ya impamatey so akinonongan na saray Judios, lapud imbaga nen Pedro ed arum ed saraya nen Pentecostes: “Sikato so ginawa na Dios a Katawan tan Kristo, sayan Jesus ya impasak yo.” (Gawa 2:5-11, 36; ipareng so Zacarias 12:10; Juan 19:37.) Saraman a Romano tan Judio so inatey la ra diad ngalngalin 2,000 lan taon. Sirin saraman so ‘anugat ed sikato’ natan so nepeg a mangirepresenta ed nasyones tan totoo a mangipapatnag na parehon managgulan awawey a nipanengneng sanen si Jesus so impasak. Si Jesus so anggapo la dia ed dalin. Balet sano saray sumusumpa balanglan aktibon mamapasegsegang ed saray Tasi nen Jehova, a mantasi ed si Jesus, odino mangokonsenti ed ontan a tratamento, saratan a sumusumpa so singa lanlamang ‘manusugat’ ed si Jesus a mismo.​—Mateo 25:33, 41-46.

“Say Alpa tan say Omega”

9. (a) Siopa natan so mansasalita, tan aminpigan danay a ginawa to so ontan diad Apocalipsis? (b) Sanen tinawag nen Jehova so inkasikato a “say Alpa tan say Omega” tan “say Makapanyarin amin,” anto so labay ya ibaga na saya?

⁹ Natan, pakelaw na saray pakelaw! Say Soberanon Katawan a Jehova a mismo so mansasalita. Agaylan saya so matukoy a bilang paunan-salita ed saray pasingawey a ngalngalilan nalukasan, lapud sikato so Engranden Managbangat tayo tan say ultimon Sengegan na Apocalipsis! (Isaias 30:20) Iyabawag na Dios tayo: “Siak so say Alpa tan say Omega, . . . say Sakey a sikato so wala natan tan wala nensaman tan sikato so onsabi, say Makapanyarin-amin.” (Apocalipsis 1:8) Saya so ununa ed taloran danay diad Apocalipsis a si Jehova a mismo so nansalita a manlapu ed tawen. (Nengnengen met so Apocalipsis 21:5-8; 22:12-15.) Saray inmunan-siglon Kristianos so masiglat ya akabidbir ed Alpa tan Omega a bilang say ununa tan sampot a letra na Griegon alpabet. Say impanawag nen Jehova a mismo ed inkasikato diad saratan a duaran letra so mangidanet a sakbay to, anggapo so makapanyarin-amin a Dios, tan anggapo so ontumbok ed sikato. Itarok to ed maaligwas a konklusyon, diad amin ya ando lan ando, so isyu na Inkadios. Sikato so ando lan ando a naalangon a bilang say sakey tan alenleneg a makapanyarin-amin a Dios, Supremon Soberano ed amin a palsa to.​—Ipareng so Isaias 46:10; 55:10, 11.

10. (a) Panon so onggendan ya impaneskribe nen Juan ed inkasikato, tan iner so nipangawan to? (b) Siopa so akikoopera pian say lukot ya insulat nen Juan so nipaarap ed saray kongregasyon? (c) Panon so mabetbet a kitatarya na taganon espiritual natan?

¹⁰ Matalek a si Jehova so mangiwanwan ed pansumpalan na saray pamaakaran, ibaga nen Juan ed saray kapara ton ariripen: “Siak si Juan, say agi yo tan minanabang ed sikayo diad kairapan tan panarian tan panagsungdo a kaiba nen Jesus, so niwala ed pulo a tinawag na Patmos lapud pansasalita nipaakar ed Dios tan pantatasi ed si Jesus.” (Apocalipsis 1:9) Sakey a priso ed Patmos nisesengeg ed maong a balita, a susungdoan iray kairapan a kaiba toray agagi to, a maniilalon malet a nawalaan na pibiang diad onsasabin Panarian, say masiken lan Juan natan so makakanengneng na unaan ed saray pasingawey ed Apocalipsis. Anggapoy duaruwan sikato so apaseseg a tuloy ed sarayan pasingawey, a singa say Juan a klase so aliing natan diad pakakanengneng ed kasumpalan da. Agtayo amta no panon so impangipaarap nen Juan ed lukot na Apocalipsis diad saray kongregasyon, lapud sikato so nipisok ed saman a panaon. (Apocalipsis 1:11; 22:18, 19) Saray angheles nen Jehova so akikoopera diad kagawa na saya, a singa unong a mabetbet ya impanalimbeng ed saray matoor a Tastasi nen Jehova a nanserbi ed silong na saray panangisebel tan panameget natan, ta pian saraya so makapangiyakar ed nipanpanaon a taganon espiritual ed saray nanaerasan-ed-katuaan ya agagi ra.​—Salmo 34:6, 7.

11. Miulibay ed saman so inapresya nen Juan, anton pribilehyo, so pinabpablin tuloy na Juan a klase natan?

¹¹ Agaylan inapresya nen Juan a tuloy so pribilehyo to diad panguusar nen Jehova ed sikato bilang paralanan na pitatalosan To diad saray kongregasyon! Miulibay, say Juan a klase natan so mamapablin tuloy ed pribilehyo to diad pangitatarya na espiritual a “tagano ed manepeg a panaon” diad sankaabungan na Dios. (Mateo 24:45) Komon ta sakey ka ed saraman so apabiskeg na sayan espiritual a probisyon ta pian nagamoran so maglorian kalat ya andi-anggaan a bilay!​—Uliran 3:13-18; Juan 17:3.

[Kahon ed pahina 27]

Panangamor na Taganon Espiritual ed Mairap Iran Panaon

Kaleganan na sarayan kaunoran ya agew, a saray Tasi nen Jehova so managmak na ontanlan panamasegsegang tan kairapan, makanakana ed sikara so pangawat na taganon espiritual ta pian mansiansian mabiskeg ed pananisia. Diad kaslakan iran kaso, nitatarya so magenap a sustento, salamat ed mabetbet a makapakelaw iran kipapatnag na pakayari nen Jehova.

Alimbawa, diad Alemanya ed leksab nen Hitler, saray Tasi nen Jehova so angimimeograp tan angibunog ed saray kopya na The Watchtower, ya atan so opisyal ya insebel na saray maruksan autoridad na Nazi. Diad Hamburg et nilubak na Gestapo so sakey ya abung a panggagawaan a panag-mimeograp. Say abung so melag, tan anggapo so maligen a napangiyamotan na antokaman a bengatla. Say makinilya so tinaynanan ed sakey a cupboard, tan say baleg a kagawaan na panag-mimeograp so inkarga ed kahon na patatas diad silongan. Sakey ni, diad benegan a batulang et wala so maleta a napno na saray magasin! Singa agnapaliisan so pakadiskobre. Balet anto so agawa? Say opisyal a nanlukas ed cupboard so nanggawa ed ontan ya agto anengneng so makinilya. No nipaakar ed silongan, say unabung so angibalita: “Saray taloran opisyales so nantanyareg ed pegley na kuarto, isipen yo, diman a mismo ed kawalaan na batulang a pati say maletan napno na saray Watchtower ed beneg to. Balet anggapo ed sikara so akaimano ed atan; sikara so singano abulag.” Salamat ed sayan makapakelaw a tulong, say unabung so akapantultuloy a mangiter na taganon espiritual diad mairap tan mapeligron panaon.

Diad 1960’s, wala so guerra-sibil ed baetan na Nigeria tan say sinmian a probinsya na Biafra. Lapud say Biafra so sigpot a niliktub na teritorya na Nigeria, say alenleneg a mangisiglaot ed baetan to tan diad paway a mundo et sakey a patekiaban na eroplano. Kabaliksan na saya a saray Tasi ed Biafra so wala ed kaatapan a napegpeg a manlapud suplay dan taganon espiritual. Insan, asasakbay nen 1968, pinabtangan na saray autoridad na Biafra so sakey ed saray membro na serbisyo sibil ed importantin puesto ed Europa tan sakey so pinabtangan ed patekiaban na eroplano ed Biafra. Nibanbanan sarayan dua et Tastasi nen Jehova, tan natan sikara la so wala ed nantupag a sampot na alenleneg a mangisiglaot ed Biafra tan ed paway a mundo. Abidbir na duara a say oksuyan so nanlapu ed si Jehova. Sirin, sikara so nanboluntaryo ed delikado tan mapeligron kimey na panangiyakar na taganon espiritual ed Biafra. Tan saya so ayarian dan ginawa kaleganan na guerra. Sakey ed sikara so nankomento: “Say oksuyan so bengatlan agnayarian ya iplano na totoo.”

[Tsart ed pahina 25]

Saray Simbolikon Bilang ed Apocalipsis

Bilang Simbolikon Kabaliksan