Apocalipsis—Asingger la so Engranden Kapantokan To!

Kapitulo 5

Anengneng nen Juan So Niglorian Jesus

1. Panon so inkipresenta na ununan pasingawey, tan panon nen Juan ya impapanengneng so panaon na peteg ya aplikasyon to?

Say ununan pasingawey ed libro na Apocalipsis so onggapo ed kapitulo 1, bersikulo 10. Sayan pasingawey, singa say arum ed Apocalipsis, so niparungtal diad sakey a deklarasyon a narerengel nen Juan odino nanenengneng ton bengatlan nikadkaduma. (Apocalipsis 1:10, 12; 4:1; 6:1) Sayan ununan pasingawey so nipresenta ed ununan-siglon letnegan a ditan saray mensahe so nipaarap ed pitoran kongregasyon a wala nen nambilay si Juan. Balet ta impanengneng nen Juan so panaon na peteg ya aplikasyon to sanen inkuanto: “Diad panamegley na puyan et siak so sinmabi ed agew na Katawan.” (Apocalipsis 1:10a) Kapigan iyan “agew”? Kasin say dramatikon agawgawa ed sayan magonigon a koma-20 siglo so walaan na anggan anton koneksion ed atan? No ontan, nepeg tayon imanoen a maong so propesiya, unong ta apektaen toray mismon bilay tayo​—anggan say kililiktar tayo.​—1 Tesalonica 5:20, 21.

Diad Agew na Katawan

2. Kapigan so inggapo na agew na Katawan, tan kapigan so pangangga to?

² Diad anton peryodo na panaon sirin so pangipasenan na kasumpalan na Apocalipsis? Bueno, anto so agew na Katawan? Atan so tutukoyen nen apostol Pablo a bilang sakey a panaon na panangukom tan ed kasumpalan na saray madibinon sipan. (1 Corinto 1:8; 2 Corinto 1:14; Filipos 1:6, 10; 2:16) Diad isabi na atan ya “agew,” saray engranden gagala nen Jehova so onaabante tan mananalo a mamapaarap ed pantok da. Atan ya “agew” so onggapo diad kabalangetan nen Jesus a bilang mangatatawen ya Ari. Anggan diad kayari na pangidapo nen Jesus na panangukom ed mundo nen Satanas, say agew na Katawan so mantultuloy, diad kipawil na Paraiso tan say kayadyari na katooan, ya anggad kaunoran et si Jesus so “mangiyawat ed panarian diad Dios to tan Ama.”​—1 Corinto 15:24-26; Apocalipsis 6:1, 2.

3. (a) Panon a say propesiya nen Daniel ed “pitoran panaon” so ontulong ed sikatayon makanengneng no kapigan so igapo na agew na Katawan? (b) Antoran agawgawa ed dalin so mamekder ed taon 1914 a bilang gapowan na agew na Katawan?

³ Say kasumpalan na arum niran propesiya na Biblia so ontulong ed sikatayon makanengneng no kapigan so igapo na agew na Katawan. Alimbawa, dineskribe nen Daniel so kapupo na pananguley ed linya nen Arin David; kayari “pitoran panaon” naamtaan a “say Sankatagyan so Manuley ed panarian na katooan, tan iter to itan ed samay sakey a labay ton pangikdan.” (Daniel 4:23, 24, 31, 32) Say manunan kasumpalan na saratan a propesiya so ginmapo diad impankibalatar na panarian na Juda, a sikato so impanengneng na ebidensya na Biblia ya asumpal nen Oktubre 607 K.K.P. Ipanengneng na Apocalipsis 12:6, 14 a say 3 1/2 panaon so kasimbangan na 1,260 agew; kanian, say pitoran panaon (mamidua na atan a bilang) so nepeg a 2,520 agew. Diad panguenta ed “sakey ya agew a para ed sakey a taon,” makasabi itayo ed 2,520 taon a bilang karukey na “pitoran panaon.” (Ezequiel 4:6) Sirin, ginmapo si Kristo Jesus ed mangatatawen ya uley to ed saginonor a kabiangan na 1914. Say imbetag na inmunan guerra mundial ed saman a taon so ananda “ed gapoan na ot-ot na kairapan” a nantultuloy a mamabakbak ed katooan. Nanlapulad 1914, agaylan saray nikadkaduman agawgawa ed sayan naames-ed-dala a dalin so amekder ed atan a taon a gapowan na “agew” na kiwawala nen Jesus!​—Mateo 24:3-14.a

4. (a) Anto so ipanengneng na saray salita na Apocalipsis a mismo ed no kapigan so kasumpal na ununan pasingawey? (b) Kapigan so pangangga na kasumpalan na ununan pasingawey?

⁴ Sirin, sayan ununan pasingawey tan say simbawan karga to so para ed agew na Katawan, manlapud 1914 a manpatuloy. Sayan panangipanaon so sinuportaan na katuaan a, saginonor ed Apocalipsis, say rekord so manedeskribi ed kidapo na tua tan matunong iran panangukom na Dios​—saray agawgawa a ditan say Katawan a Jesu-Kristo so onkiwas ed matalonan biang. (Apocalipsis 11:18; 16:15; 17:1; 19:2, 11) No say kasumpalan na ununan pasingawey so ginmapo nen 1914, kapigan so pangangga to? A singa ipanengneng na saray mensahe a mismo, say angipaarapan ya organisasyon et say kongregasyon na saray nilanaan na Dios ed dalin. Sirin, say kasumpalan na sayan ununan pasingawey so mangangga, sano say unor a matoor a membro na atan ya alanaan a kongregasyon so ompatey tan napaoli ed mangatatawen a bilay. Anggaman kuan, say Agew na Katawan, a tekep na saray bendisyon ed mangaraldalin ya arum a karnero, so mantultuloy ya anggad kasampotan na Milenyon Uley nen Jesu-Kristo.​—Juan 10:16; Apocalipsis 20:4, 5.

5. (a) Anto so intawag na sakey a boses a gawaen nen Juan? (b) Akin a say pasen na “pitoran kongregasyon” so paborable diad pangitulor na sakey a lukot ed sikara?

⁵ Diad sayan ununan pasingawey, sakbay a nanengneng nen Juan so antokaman, wala so narerengel to: “Tan nadngel ko ed benegan ko so sakey a mabiskeg a boses a singa sakey a trumpeta, a kuanto: ‘Say nanengneng mo so isulat mo ed sakey a lukot tan ipawit mo ed saray pitoran kongregasyon, diad Efeso tan diad Smyrna tan diad Pergamo tan diad Tiatira tan diad Sardis tan diad Piladelpia tan diad Laodicea.’” (Apocalipsis 1:10b, 11) Sakey a boses a walaan na pakauley tan mangigaganggan a singa sakey a tawag na trumpeta, sakey a boses so ontatawag ed si Juan a mansulat ed “saray pitoran kongregasyon.” Sikato so mangawat na sakey a serye na saray mensahe tan pian ipalapag iray bengatlan nanengneng tan narengel to. Imanoen a saray kongregasyon ya asalambit dia so peteg a wala ed agew nen Juan. Amin da so wala ed Asia Minor, dian mismo ed basil na dayat a manlapu ed Patmos. Sikara so magmainomay a nasabi ed balang sakey diad panamegley na ekselentin kalsada na Romano a wala ed saman a pasen. Say sakey a mensahero so agnairapan diad pangawit na lukot a manlapud sakey a kongregasyon ya iyakar ed sananey. Sarayan pitoran kongregasyon so miulibay ed sakey a seksion na modernon-agew a sirkito na saray Tasi nen Jehova.

6. (a) Anto so kabaliksan na “saray bengatla natan”? (b) Akin a makapanseguro itayon saray kipapasen ed kongregasyon na saray alanaan a Kristianos natan so miulibay ed saraman so wala ed agew nen Juan?

⁶ Maslak ed saray propesiya ed Apocalipsis so nasumpal ed kayari na panaon nen Juan. Tinukoy da “so saray bengatlan nagawa ed kayari na saraya.” Balet say simbawa ed pitoran kongregasyon so manasaglawi ed “saray bengatlan wala,” saray kipapasen a peteg a wala ed pitoran kongregasyon ed saman a panaon. Saray mensahe so mabmablin tulong ed saray matoor ya aturon mamatatken ed saraman a kongregasyon, a singa ontan met ed amin nin arum a kongregasyon na alanaan a Kristianos ed saman a panaon.b Lapud say pasingawey so walaan na manunan aplikasyon ed agew na Katawan, say ibabaga nen Jesus so mangiiter na paimanon miulibay ed saray kipapasen a nailaloan ed kongregasyon na saray alanaan a Kristianos ed dilin agew tayo.​—Apocalipsis 1:10, 19.

7. Siopa so anengneng nen Juan ed sayan ununan pasingawey, tan akin ya importantin tuloy tan makapasagyat itan ed sikatayo natan?

⁷ Diad sayan ununan pasingawey, anengneng nen Juan so masnag a Katawan a Jesu-Kristo ed mangatatawen a gloria To. Anto ni so nagkalalon matukoy ed sakey a libro na saray propesiya a manasalaysay ed baleg ya agew na sayan Katawan ya ingganggan na tawen? Tan anto ni so nagkalalon importante ed sikatayo, a manbibilay natan ed atan a peryodo na panaon tan mangiiter na maalwar a panangimano ed balang ganggan to? Nagkalalo ni, agaylan makapasagyat ed saray manusuporta ed inkasoberano nen Jehova a napaseguroan a say Mesianikon Bini, a sinungdoan to so amin iran subok tan panamasegsegang ya intarok nen Satanas tan anagmak na makapautot ya ipapatey sanen say “mukor” To so sinugat ed apalabas lan 1,900 taon, so natan et mabilay ed tawen, naikdan na pakayarin mangitarok ed engranden gagala na Dios diad mananalon kasumpalan!​—Genesis 3:15.

8. Diad anton kiwas so akaparaanan la nen Jesus natan?

⁸ Mapatnag a si Jesus natan so akaparaan lan onkiwas a bilang nitronon Ari. Sikato so aturo a bilang Manunan Manamatey nen Jehova a mangitarok na saray pinal a panangukom nen Jehova sumpad sayan daan, marelmeng a sistema na bengabengatla tan say deniriablon dios to, si Satanas. Sikato met so akaparaan a mangukom ed saraman so kongregasyon na saray nilanaan to tan say baleg ya ulop a walad kakaiba ra, pian ontan met a mangukom ed mundo.​—Apocalipsis 7:4, 9; Gawa 17:31.

9. (a) Panon so ipaneskribe nen Juan ed niglorian Jesu-Kristo ed pegley na saray binmalitok a kandelero? (b) Anto so ipanengneng na singa-templon kipapasen tan say kawes ya insulong nen Jesus? (c) Anto so ituro na binmalitok a balkes?

⁹ Si Juan so linmingaw ed tanol na maksil a boses, tan nia so nanenengneng to: “Siak so linmingaw ed boses a mitotongtong ed siak, tan, diad inlingaw ko, anengneng ko so pitoran binmalitok a kandelero.” (Apocalipsis 1:12) Saginonor, naaralan nen Juan so isisimbolo na sarayan pitoran kandelero. Balet say persona ed pegley na saray kandelero so akatawag na imano to. Wadman “ed pegley na saray kandelero so sakey a singa sakey ya anak na too, ya akawesan na sakey a kawes ya angga ed saray sali, tan abalkesan ed saray pagew na sakey a binmalitok a balkes.” (Apocalipsis 1:13) Si Jesus, say “anak na too,” so angipresenta dia na inkasikato ed arap na nikelawan a tasi, si Juan, bilang sakey a marlang, masnag a pigura. Sikato so pinmatnag ed masnag a gloria ed limog na mandarlang a binmalitok iran kandelero. Sayan singa-templon itsura so angidanet ed si Juan na katuaan a si Jesus so presente ed betang a baleg ya Atagey a Saserdote nen Jehova, a tekep na saray pakayari na panangukom. (Hebreos 4:14; 7:21-25) Say andukey, makapasagyat a kawes to so matukoy ed sinasaserdoten betang to. Singa saray Judion atagey a saserdote nensaman, sikato so nansulong na sakey a balkes​—sakey a binmalitok a balkes diad pagew to a sinakbongan to so puso to. Saya so mangituturo a sikato so sigpot-puson manumpal ed madibinon kimey ya inawat ton nanlapud si Jehova a Dios.​—Exodo 28:8, 30; Hebreos 8:1, 2.

10. (a) Anto so ipanengneng na nieben-amputin buek nen Jesus tan saray mandarlang a mata? (b) Anto so kabaliksan na saray sali nen Jesus a singa mandarlang a gansa?

¹⁰ Intuloy na salaysay nen Juan: “Nagkalalo ni, say ulo to tan say buek to so amputi a singa amputin bago, singa niebe, tan saray mata to so singa mandarlang ya apuy.” (Apocalipsis 1:14) Say nieben-amputin buek to so mangipapanengneng na kakabatan nisengeg ed karukey na bilay. (Ipareng so Uliran 16:31.) Tan saray mandarlang a mata to so mangipanengneng a sikato so makdem, alerto, legan ya usisaen to, suboken to, odino ibalikas to so sanok. Anggan saray sali nen Jesus so anawag na imano nen Juan: “Tan saray sali to so singa masileng a gansa sano mandarlang ed palbaan; tan say boses to so singa tanol na dakel a danudanum.” (Apocalipsis 1:15) Diad pasingawey, saray sali nen Jesus so singa gansa, mandarlang, masnag​—manepenepeg ed sakey a manakar a magunaet tan walaan na maabig a talindeg ed imaton nen Jehova a Dios. Nagkalalo ni, lapud diad Biblia et saray madibinon bengatla so mabetbet ya inretrato na balitok, sirin saray bengatlan atooan so no maminsan et irepresenta na gansa.c Kanian say mandarlang a sali nen Jesus a singa masileng a gansa so mangipanonot ed sikatayo no panon a “malimgas” so sali to sanen nanakar ed dalin ya angipulong ed maong a balita.​—Isaias 52:7; Roma 10:15.

11. (a) Diad anto so ipanonot ed sikatayo na saray maglorian sali nen Jesus? (b) Anto so impanengneng na katuaan a say boses nen Jesus “so singa tanol na dakel a danudanum”?

¹¹ Peteg, bilang sakey ya ayadyarin too, si Jesus so walaan na sinag a mapatnag ed saray angheles tan totoo. (Juan 1:14) Saray maglorian sali to so mangipanonot met ed sikatayo a sikato so nanakar ed masanton pasen diad organisasyon nen Jehova, a sikato so Atagey a Saserdote. (Ipareng so Exodo 3:5.) Sakey ni, say boses to so singa karol na abalbaleg ya agus na danum. Sikato so makapasagyat, makapakelkelaw, unong ta atan so onnepeg ed sakey ya opisyal a tinawag na Salita na Dios, samay sinmabin “mangukom ed panaayaman a dalin diad inkatunong.”​—Gawa 17:31; Juan 1:1.

12. Anto so kabaliksan na “makdem, andukey a duaray-tarem a kampilan”?

¹² “Tan wala ed nikawanan a lima to so pitoran bibitewen, tan diad sangi to et ompapaway so sakey a makdem, andukey a duaray-tarem a kampilan, tan say lupa to so singa agew sano onsinag ed pakayari to. Tan sanen sikato so anengneng ko, siak so alukbob a singa inatey ed saray sali to.” (Apocalipsis 1:16, 17a) Si Jesus a mismo so angipaliwawa ed kabaliksan na pitoran bibitewen ed saginonor. Balet imanoen no anto so ompapaway ed sangi to: “sakey a makdem, andukey a duaray-tarem a kampilan.” Agaylan matukotukoy a nengneng! Lapud si Jesus so sakey ya aturon mangibesngaw na saray unor a panangukom nen Jehova a sumpa ed saray kakabusol To. Saray mapekder a balbalikas a manlapud sangi to so mansumpal diad kaderal na amin a marelmeng.​—Apocalipsis 19:13, 15.

13. (a) Say masnag, mansinag a lupa nen Jesus so mangipanonot ed sikatayo na anto? (b) Anton interamentin impresyon so naala tayo a manlapud deskripsyon nen Juan ed si Jesus?

¹³ Say masnag, mansinag a lupa nen Jesus so mangipanonot ed sikatayo a say lupa nen Moises so sinminag kayari na impitongtong nen Jehova ed sikato ed Palandey Sinai. (Exodo 34:29, 30) Nonoten, met, a sanen si Jesus so nantranspigura ed arap na talora ed saray apostoles to ed apalabas lan 1,900 taon, “say lupa to so sinminag a singa say agew, tan saray akinpaway a kawes to so nagmaliw a masnag a singa liwawa.” (Mateo 17:2) Natan, diad pasingawey a representasyon nen Jesus legan na agew na Katawan, say lupa to so miulibay a mangisindag na masnag a karlangan na sakey a wala ed arap nen Jehova. (2 Corinto 3:18) Diad tua, say interamentin impresyon ya impaamta na pasingawey nen Juan et say inkasnag ed gloria. Manlapud nieben-amputin buek, saray mandarlang a mata, tan say mansinag a lupa ya angga ed mandarlang a sali, atan so superlatibon pasingawey na Sakey a manaayam natan “ed agnaasinggeran a liwawa.” (1 Timoteo 6:16) Say kapetegan na sayan anengneng so mabitabitar! Panon so inkiwas nen nikelawan a tuloy a Juan? Ibabaga ed sikatayo na apostol: “Tan sanen sikato so anengneng ko, siak so alukbob a singa inatey ed saray sali to.”​—Apocalipsis 1:17.

14. Panon so kaapektaan tayo sano basaen so nipaakar ed pasingawey nen Juan ed niglorian Jesus?

¹⁴ Natan, say makolor, detalyadon deskripsyon na pasingawey nen Juan so mamano ed saray totoo na Dios tekep na impapuson apresasyon. Sikatayo la so linmabas ed masulok a 70 taon ed agew na Katawan, a kaleganan to et say pasingawey so mantutultuloy a nawawalaan na makapaligsan kasumpalan. Say uley na Panarian nen Jesus so diad sikatayo et sakey a mabilay, presenten kapetegan, aliwan sakey ya arapen ya ilalo. Sirin, manepeg ed sikatayo bilang matoor ya uuleyan na Panarian so inengneng a malaknab tekep na pankelaw ed saman so dineskribe nen Juan ed sayan ununan pasingawey tan ontalineng a situtulok ed saray salita na niglorian Jesu-Kristo.

[Paimano ed leksab]

[Kahon ed pahina 28]

Apocalipsis 1:10–3:22

Tema: Ininspeksionan nen Jesus so espiritual ya Israel ed dalin tan mangiter na ampetang a panamaseseg

Panaon na kasumpalan: Sayan kabiangan na agew na Katawan so onnatnat a manlapud 1914 ya anggad say unor a matoor ya alanaan so ompatey tan napaoli