Apocalipsis—Asingger la so Engranden Kapantokan To!

Kapitulo 6

Panangilukas ed Sagradon Sekreto

1. Panon so ikiwas tayo ed mandarlang a retraton nikurit ed Apocalipsis 1:10-17?

Makapakelkelaw a peteg so pasingawey na nitandoron Jesus! Agpanduaruwaan, no sikatayo so manbabantay diman a kaiba nen apostol Juan, sikatayo met so natalonaan na atan a masnag a gloria, ya ondakmomo itayo a singa ginawa to. (Apocalipsis 1:10-17) Sayan superlatibon apuyanan a pasingawey so nipreserban mamakiwas ed sikatayo natan. Singa si Juan, nepeg tayon ipanengneng so mapaabeban apresasyon ed amin a kabaliksan na atan a pasingawey. Komon ta sikatayon naynay so nawalaan na masanton panangigalang ed posisyon nen Jesus bilang nitronon Ari, Atagey a Saserdote, tan Ukom.​—Filipos 2:5-11.

“Say Unaan tan say Unor”

2. (a) Diad anton titulo so angipresentaan nen Jesus na inkasikato? (b) Anto so labay ya ibaga nen Jehova sanen inkuanton: “Siak so unaan tan siak so unor”? (c) Diad anto so panawagan na imano na titulo nen Jesus a “say Unaan tan say Unor”?

² Anggaman kuan, say pankelaw tayo so agnakaukolan a mangipalugar ed makapasakit a takot. Pinaseguroan nen Jesus si Juan, unong ya isalaysay na apostol ed ontumbok. “Tan intapew to so nikawanan a lima to ed siak tan inkuanto: ‘Agka ontakot. Siak so Unaan tan say Unor, tan say sakey a mabilay’” (Apocalipsis 1:17b, 18a) Diad Isaias 44:6, manepenepeg a dineskribe nen Jehova so dilin posisyon to a bilang say sakey tan alenleneg a makapanyarin-amin a Dios, a kuanto: “Siak so unaan tan siak so unor, tan nilikud ed siak et anggapo so Dios.”a Sanen impresenta nen Jesus so inkasikato ed titulon “say Unaan tan say Unor,” agto ibabaga so pipara to ed si Jehova, say Engranden Amalsa. Uusaren to so sakey a titulon matukoy ya impabtang ed sikato na Dios. Diad Isaias, gagawaen nen Jehova so sakey a balikas nipaakar ed nikadkaduman posisyon To bilang say tuan Dios. Sikato so Dios a maando, tan nilikud ed sikato et anggapo la a peteg so Dios. (1 Timoteo 1:17) Diad Apocalipsis, totongtongen nen Jesus so nipaakar ed nipabtang ed sikaton titulo, ya intawag to so imano ed nikadkaduman inkioli to.

3. (a) Diad anton dalan a si Jesus “so Unaan tan say Unor”? (b) Anto so labay ya ibaga na impakawalaan nen Jesus “ed saray tombok ed patey tan ed Hades”?

³ Si Jesus so peteg “ya Unaan” a toon apaoli ed imortal ya espiritun bilay. (Colosas 1:18) Nagkalalo ni, sikato so “Unor” a pinaoli nen Jehova a personal. Sirin, sikato so nagmaliw a “say sakey a mabilay . . . mabilay ed ando lan ando.” Panggagayagaan to so imortalidad. Diad saya, sikato so singa ed imortal ya Ama to, ya atawag na “say mabilay a Dios.” (Apocalipsis 7:2; Salmo 42:2) Para ed amin nin arum a totoo, si Jesus a mismo “so kiolian tan say bilay,” (Juan 11:25) Mitukoyan ed saya, inkuanto ed si Juan: “Siak so nagmaliw ya inatey, balet, nia! siak so manbilay ed ando lan ando, tan siak so walaan na saray tombok na patey tan ed Hades.” (Apocalipsis 1:18b) Sikato so inikdan nen Jehova na autoridad a mamaoli ed saray inaatey. Sikato no akin a nayarian nen Jesus ya ibaga a sikato so kawalaan na saray tombok a mangilukas ed saray puerta parad saraman so inaripen na patey tan Hades (lubok).​—Ipareng so Mateo 16:18.

4. Anton ganggan so inulit nen Jesus, tan para ed siopa pankaabigan?

⁴ Dia et uuliten nen Jesus so bilin to ya ikurit so pasingawey, a kuanto ed si Juan: “Isulat mo irayan bengatlan anengneng mo, tan saray bengatla natan tan saray bengatla a nagawa kayari na saraya.” (Apocalipsis 1:19) Antoran makapasagyat a bengatla so ipaamta ni nen Juan nipaakar ed kibangatan tayo?

(Ituloy ed ontumbok a paway.)

[Paimano ed leksab]