Apocalipsis—Asingger la so Engranden Kapantokan To!
Kapitulo 14
Say Karlangan na Mangatatawen a Trono nen Jehova
Pasingawey 2—Apocalipsis 4:1–5:14
Tema: Makapakelkelaw a nagagawa ed arap na trono na panangukom na Dios
Panaon na kasumpalan: Sayan pasingawey so mangidadatak ed saray ebenton nagagawa nanlapulad 1914 ya anggad anggaan na Milenyo tan diad labas to, sano kada pinalsa a wala ed tawen tan ed dalin so mangidayew ed si Jehova.—Apocalipsis 5:13
1. Akin a sikatayo so nepeg ya interesado ed saray pasingawey ya ipinabang nen Juan ed sikatayo?
Igapo nen Juan ya ipinabang ed sikatayo so malaknab nin makapaligsay-kamarerwan pasingawey. Diad puyan et sikato nin siansia so wala ed agew na Katawan. Sirin, say dedeskribien to so walaan na aralem a kabaliksan ed sikatayo a peteg a manbibilay ed satan ya agew. Diad panamegley na saratan a pasingawey, intagey nen Jehova so belo na agpakanengneng ed mangatatawen a kapetegan tan iter to ed sikatayo so dilin panmoria to ed saray panangukom a nagawa ed dalin. Nagkalalo ni, balanglan walaan itayo na mangatatawen odino mangaraldalin ya ilalo, sarayan panangiparungtal so ontulong ed sikatayon makanengneng ed pasen tayo diad gagala nen Jehova. Amin tayo, sirin, so nepeg a mantultuloy ya interesado ed balikas nen Juan: “Maliket iman so manbasan maksil tan saraman so ondengel ed saray salita na sayan propesiya, tan manumpal ed saray bengatlan nisulat ditan.”—Apocalipsis 1:3.
2. Anto natan so eksperiensia nen Juan?
2 Say onggendan ya anengneng nen Juan so onlampas ed anggan anton bengatlan impresenta na video ed koma-20 siglon too! Insulat to: “Kayari na sarayan bengatla et anengneng ko, tan, nia! sakey a lukas a puerta ed tawen, tan say inmunan boses a nadngel ko so singano ed sakey a trumpeta, a mansasalita ed siak, a kuanto: ‘Onsegep ka dia, tan ipanengneng ko ed sika iray bengatlan nepeg a nagawa.’” (Apocalipsis 4:1) Si Juan ed pasingawey so analos ed agnanengneng a katawenan na kiwawala nen Jehova, a nitandoro ed labas na pisikal ya akinpaway a liwang ya asukisok na saray modernon astronaut, anggan dia ed labas na saray galaksi na materyal a talba. A singa onloloob ed sakey a lukas a puerta, si Juan so naimbitaan a manliket ed saray mata to diad sankarakpan a nanengneng ed ultimon espiritun katawenan a nitronoan nen Jehova a mismo. (Salmo 11:4; Isaias 66:1) Agaylan pribilihyo!
3. Anto so ipanonot na boses “a singano ed sakey a trumpeta,” tan siopa so andi-duaruwan Sengegan na satan?
3 Ag-ipapabidbir na Biblia iyan “ununan boses.” Singa say mabiskeg a boses nen Jesus a nadngel ya akadkauna, satan so walaan na manangikumandon singa-trumpetan tanol. (Apocalipsis 1:10, 11) Ipapanonot to so mananalos a tanol na trumpetan mangitatanda ed kiwawala nen Jehova diad Palandey Sinai. (Exodo 19:18-20) Agpanduaruwaan, si Jehova so sankarlangan a Sengegan na tawag. (Apocalipsis 1:1) Nilukasan to so puerta ta pian si Juan, diad pasingawey, so makaloob ed sankasantosan a pasen ed amin a sankaawangan ya ayaman na inkasoberano nen Jehova.
Sankarakpan a Kiwawala nen Jehova
4. (a) Anto so kabaliksan na pasingawey nen Juan ed saray alanaan a Kristianos? (b) Anto so kabaliksan na pasingawey ed saramay say ilalo ra et say pambilay na ando lan ando ed dalin?
4 Anto so anengneng nen Juan? Ontalineng, unong a sikato natan so mangibiang ed sikatayo ed engranden eksperiensia to: “Kayari na sarayan bengatla et tampol a siak so sinmabi ed pakayari na espiritu: tan, nia! sakey a trono so wala ed pasen to diad tawen, tan wala so sakey ya akayurong ed trono.” (Apocalipsis 4:2) Diad sakey a kisap na panaon, si Juan so espiritual ya inyalis na aktibon puersa na Dios ed mismon trono nen Jehova. Agaylan makapaliket ed si Juan! Dia et sikato so naikdan na masnag a pakanengneng ed saraman so mismon katawenan a ditan et sikato tan arum iran alanaan a Kristianos so nireserbaan na “agkabubulok tan andi-tilol tan ag-onkupas a tawir.” (1 Pedro 1:3-5; Filipos 3:20) Para ed saraman so say ilalo ra et say pambilay na ando lan ando ed dalin, say pasingawey ed Juan so walaan met na malaknab a kabaliksan. Tulongan toran manebek ed gloria na kiwawala nen Jehova tan ed mangatatawen a pananguley ya inusar nen Jehova diad panangukom ed saray nasyones tan kayari to diad panguley ed bilay na totoo diad dalin. Peteg a si Jehova so Dios na sankarakepan ya organisasyon!
5. Anton kapetegan so anengneng nen Juan ya insimbolo na sakbong na kaban na sipan?
5 Dakel ed anengneng nen Juan diman ed tagey ed tawen so miulibay ed saray kabiangan na tabernakulo ed kalawakan. Saya so impaalagey ed ngalngalin 1,600 taon ya asasakbay bilang sakey a santuaryo na tuan panagdayew a para ed saray Israelita. Diad Sankasantosan na saman a tabernakulo et wadman so kaban na sipanan, tan diad tagey na solidon balitok a sakbong na saman a Kaban so nansalitaan nen Jehova a mismo. (Exodo 25:17-22; Hebreos 9:5) Sirin, say sakbong na Kaban so nanserbin bilang sakey a simbolo na trono nen Jehova. Anengneng natan nen Juan so kapetegan na saman a simbolikon representasyon: say Soberanon Katawan a Jehova a mismo so manyudyurong ed sankarakpan a karlangan ed atagey a mangatatawen a trono to!
6. Anton impresyon nen Jehova so inter nen Juan ed sikatayo, tan akin a saya so matukotukoy?
6 Aliwan singa saray akadkaunan propetas a walaan na pasingawey ed trono nen Jehova, agdedeskribien nen Juan a detalyado so Masanton Sakey ya angukopa ed satan. (Ezequiel 1:26, 27; Daniel 7:9, 10) Balet inikdan itayo nen Juan na impresyon to ed samay Sakey a nitrono diad sarayan salita: “Tan say sakey ya akayurong so, ed indengan, singa sakey a baton jaspe tan sakey a mablin ambalangan-kolor a bato, tan diad liber na trono et wala so sakey a kabunlalakaw a singa sakey ya esmeralda ed indengan.” (Apocalipsis 4:3) Agaylan agnaparengan a karlangan! Anengneng nen Juan so maulimek, makaingganyon kalimgasan a singa saman so masileng, masnag a bato. Agaylan matukotukoy a saya so miabobon ed salaysay nen babangatan a Santiago ed si Jehova a bilang “say Ama na mangatatawen a liwawa”! (Santiago 1:17) Kayarin tuloy na impansulat ed Apocalipsis, si Juan a mismo so angibaga: “Say Dios so liwawa tan anggapo so kabilungetan a balot diad pikasakey ed sikato.” (1 Juan 1:5) Agaylan sankarakpan a maglorian Persona a peteg si Jehova!
7. Anto so naaralan tayo ed katuaan a wala so kabunlalakaw ed kaliberliber na trono nen Jehova?
7 Imanoen ya anengneng nen Juan ed liberliber na trono so sakey a kabunlalakaw, a nankolor na berdin esmeralda. Say Griegon salita dia a nipatalos a kabunlalakaw (irʹis) so mangisusuhiri na kumpleton malimpek a porma. Say kabunlalakaw so inmunan asalambit ed Biblia a misiglaotan ed agew nen Noe. Kayari na inyepas na saray danum na Delap, pinawala nen Jehova so sakey a kabunlalakaw ed lurem, tan impaliwawa to no anto so insimbolo to ed sarayan salita: “Say kabunlalakaw ko ya iter ko ed lurem, tan nepeg a manserbin sakey a tanda na sipanan ed siak tan say dalin. Tan peteg a nonoten ko so sipan ko ed baetan ko tan sikayo tan ed amin a mabilay a kamarerwa ed limog na amin a laman; tan saray danum so agla manelap a mangitarok ed amin a laman diad kadederal.” (Genesis 9:13, 15) Anto, sirin, so impanonot na mangatatawen a pasingawey ed si Juan? Say kabunlalakaw ya anengneng to so angipanonot sirin ed sikato ed pankaukolan na mareen a relasyon ed si Jehova, a singa panggagayagaan na Juan a klase natan. Ipurek to met ed sikato so kaulimekan tan kareenan ed kiwawala nen Jehova, sakey a kaulimekan ya onnatnat ed amin na matulok a katooan sano inatnat nen Jehova so tolda to ed katooan diad balon dalin a sosyedad.—Salmo 119:165; Filipos 4:7; Apocalipsis 21:1-4.
Panamidbir ed 24 a Mamatatken
8. Siopa so anengneng nen Juan ed liberliber na trono, tan siopa so irerepresenta na saraya?
8 Kabat nen Juan a saray saserdote so aturon manlingkor ed kadaanan a tabernakulo. Sirin nayarin sikato so asurprisa diad impakanengneng ed saman so ontumbok a deskribien to: “Tan diad kaliberliber na trono et wala so duamplo-tan-apat a trono, tan diad tapew na sarayan trono et anengneng ko ya akayurong so duamplo-tan-apat a mamatatken ya akawesan ed amputin akinpaway a kawes, tan walad kauloan da so saray binmalitok a balanget.” (Apocalipsis 4:4) On, imbes a saray saserdote, wala so 24 a mamatatken, nitrono tan akoronaan a singa arari. Siopa irayan mamatatken? Anggapoy arum noagta saray alanaan ed Kristianon kongregasyon, apaoli tan manguukopa ed mangatatawen a posisyon ya insipan nen Jehova ed sikara. Panon so pikabat tayo ed satan?
9, 10. Panoy pikabat tayo a saray 24 a mamatatken so mangirerepresenta ed alanaan a Kristianon kongregasyon diad maglorian mangatatawen a posisyon to?
9 Ununa ed amin, sikara so angisulong na balanget. Sasalitaen na Biblia so alanaan a Kristianos a bilang makagamor ed ‘agnaderal a balanget’ tan makagungguna ed andi-anggaan a bilay—imortalidad. (1 Corinto 9:25; 15:53, 54) Balet lapud sarayan 24 a mamatatken so manyudyurong ed trono, saray binmalitok a balanget ed sayan konteksto so mangirepresenta na maarin autoridad. (Ipareng so Apocalipsis 6:2; 14:14.) Saya so manusuporta ed konklusyon a say 24 a mamatatken so mangireretrato ed saray alanaan a patumbok nen Jesus ed mangatatawen a posisyon da, lapud si Jesus so nanggawa na sakey a sipanan ed sikara ya onyurong ed saray trono diad Panarian to. (Lucas 22:28-30) Si Jesus tan sarayan 24 a mamatatken lambengat—aliwan anggan saray angheles—so adeskribin manuuley ed tawen diad kiwawala nen Jehova.
10 Saya so mitukoyan ed sipan nen Jesus ed kongregasyon ed Laodicea: “Diad samay sakey a manalo et iter ko so piyurong ed siak diad tronok.” (Apocalipsis 3:21) Balet say mangatatawen ya asainmin na 24 a mamatatken so agnigeter ed ginogobiernon uley. Diad gapo na libro na Apocalipsis, inkuan nen Juan nipaakar ed si Jesus: “Sikatayo so ginawa to a sakey a panarian, saserdote ed Dios tan Ama to.” (Apocalipsis 1:5, 6) Saraya so namparan arari tan saserdote. “Sikara so magmaliw a saserdote ed Dios tan ed Kristo, tan manuley a bilang arari a kaiba to diad sanlibon taon.”—Apocalipsis 20:6.
11. Akin a matukotukoy a say bilang na mamatatken so 24, tan anto so ituturo na satan a bilang?
11 Anto so nikadkaduma nipaakar ed bilang a 24, unong a si Juan so akanengneng ed 24 a mamatatken ed liber na trono? Diad dakel iran pamaakaran, saraya so inyanino na saray matoor a saserdote ed kadaanan ya Israel. Insulat nen apostol Pedro ed saray alanaan a Kristianos: “Sikayo so ‘sakey ya apilin rasa, sakey a maarin inkasaserdote, sakey a masanton nasyon, sakey a totoo a para ed nikabkabiig a kayarian to.’” (1 Pedro 2:9) Makapasagyat, saman a kadaanan a Judion inkasaserdote so naapag ed 24 a dibisyon. Kada dibisyon so apabtangan ed saray dili ton simba ed taon a manlingkor ed arap nen Jehova, ta pian say sagradon serbisyo so nisaklang ya agnapultot. (1 Awaran 24:5-19) Matukotukoy, sirin, a walaray 24 mamatatken a niretrato diad pasingawey nen Juan ed mangatatawen ya inkasaserdote lapud sayan inkasaserdote so manserbi ed si Jehova a mantultuloy, ya anggapo so tunda. Sano nakumpleto, wala so 24 a dibisyon, kada dibisyon so walaan na 6,000 mananalo, lapud ibabaga ed sikatayo na Apocalipsis 14:1-4 a saray 144,000 (24 x 6,000) so “asaliw a nanlapud limog na katooan” ya ontalindeg ed mangatatawen a Palandey Sion a kaiba na Kordero, si Jesu-Kristo. Lapud say bilang a 12 so mangituturo ed madibinon asimbang ya organisasyon, say 24 so manobli—odino mamabiskeg—ed ontan ya oksuyan.
Saray Kirmat, Boses, tan Karokarol
12. Anto so ontumbok ya anengneng tan nadngel nen Juan, tan anto so ipanonot na saray “kirmat tan boses tan karokarol”?
12 Anto kasi so ontumbok a nanengneng tan narengel nen Juan? “Tan manlapud trono et ompapaway iray kirmat tan boses tan karokarol.” (Apocalipsis 4:5a) Agaylan manangipanonot ed arum iran makapakelaw ya inkipatnag na mangatatawen a pakayari nen Jehova! Alimbawa, sanen si Jehova so “linmasor” ed Palandey Sinai, imbalita nen Moises: “Diad komatlon agew sanen kabuasan la et agawa a saray karokarol tan kirkirmat so ginmapon agawa, tan sakey a makapal a lurem ed tapew na palandey tan makmaksil a tanol na tambuyog. . . . Sanen say tanol na tambuyog so nantultuloy a kinmasil lan kinmasil, inggapo nen Moises so nansalita, tan say tuan Dios so ginmapon mangebat ed sikato ed sakey a boses.”—Exodo 19:16-19.
13. Anto so iretrato na saray kirmat ya ompapaway ed trono nen Jehova?
13 Kaleganan na agew na Katawan, ipatnag nen Jehova so pakayari tan kiwawala to diad magalgalang a dalan. Andi, aliwan diad literal a kirmat, lapud nanenengneng nen Juan iray tanda. Anto, sirin, so irerepresenta na saray kirmat? Bueno, saray kidiam na kirmat so mangiter na liwawa, balet nayarian da met a pateyen so sakey. Sirin, sarayan kirmat ya ompapaway ed trono nen Jehova so mangiretraton maong ed saray kidiam na pakaliwawaan ya itutultuloy ton iiter ed totoo to tan, lalo nin makatantanda, saray mangapuy-apuy a mensahe na panangukom to.—Ipareng so Salmo 18:14; 144:5, 6; Mateo 4:14-17; 24:27.
14. Panon so kipapaknol na saray boses natan?
14 Anto so nipaakar ed saray boses? Legan na inyakseb nen Jehova ed Palandey Sinai, sakey a boses so nansalita ed si Moises. (Exodo 19:19) Saray boses a nanlapud tawen so angipaway na dakel ed saray ganggan tan panangiyabawag ed libro na Apocalipsis. (Apocalipsis 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Natan, si Jehova so angipaway met na saray ganggan tan panangiyabawag ed totoo to, a liliwawaan to so pakatalos da ed saray propesiya tan prinsipyo na Biblia. Saray managliwawan impormasyon so mabetbet a nipaparungtal diad saray internasyonal a kumbension, tan saray ontan a katuaan na Biblia, met, so niyaabawag ed sankamundoan. Imbaga nen apostol Pablo ed saray matoor a managpulong ed maong a balita: “On, diad tua, ‘diad amin a dalin et say tanol da so pinmaway, tan diad kasampotan na panaayaman a dalin iray balikas da.’”—Roma 10:18.
15. Antoran karol so ompapaway a manlapud trono legan na sayan kabiangan na agew na Katawan?
15 Gendagendat a say karol so ontumbok ed kirmat. Tinukoy nen David so literal a karol a bilang “say boses nen Jehova.” (Salmo 29:3, 4) Sanen si Jehova so akibakal a nipaakar ed si David a sumpa ed saray kakabusol to, nibagan say karol so nanlapu ed Sikato. (2 Samuel 22:14; Salmo 18:13) Imbaga nen Elihu ed si Job a say boses nen Jehova so tinmanol a singa karol, legan a gagawaen To so “baleg iran bengatla ya agtayo kabat.” (Job 37:4, 5) Legan na sayan kabiangan na agew na Katawan, si Jehova so ‘angikarol,’ a mamapasakbay ed saray baleg a gawan gawaen to a sumpad saray kakabusol to. Sarayan simbolikon laldis na karol so inmaniweng tan lalon inmaniweng ed sankadalinan. Maliket ka no sika so nanimano ed sarayan kinmarol a panangiyabawag tan manguusar a makabat ed dilam diad pangarum ed kasil da!—Isaias 50:4, 5; 61:1, 2.
Saray Silewan na Apuy tan Dayat a Salming
16. Anto so ituro na pitoran silewan na apuy?
16 Anto ni so nanengneng nen Juan? Saya: “Tan wala so pitoran silewan na apuy a mandarlang ed arap na trono, tan saraya et kabaliksan da so pitoran espiritu na Dios. Tan diad arap na trono et wala, a singa panangibaga, so dayat a salming a singa kristal.” (Apocalipsis 4:5b, 6a) Si Juan a mismo so mangibabaga’d sikatayo ed kabaliksan na pitoran silewan: “Saraya et kabaliksan da so pitoran espiritu na Dios.” Say bilang a pitora so mangisisimbolo ed madibinon inkagnap; sirin say pitoran silewan so nepeg a mangirepresenta ed inkagnap na managliwawan puersa na masanton espiritu. Agaylan misalsalamat so Juan a klase natan a nimatalekan ed sayan pakaliwawaan, a tekep na responsabilidad a pangipasa ed satan diad saray nanaerasan ed espiritual a totoo ed dalin! Agaylan sikatayo so maliket a kada taon et masulok a 200 milyon a kopya na magasin a Watchtower so mantutultuloy a mangisisindag ed sayan liwawa diad masulok a sanlasus a lenguahe!—Salmo 43:3.
17. Anto so isisimbolo na “dayat a salming a kristal”?
17 Anengneng met nen Juan so “dayat a salming a singa kristal.” Anto so isimbolo na saya no nipaakar ed saraman so naimbitaan ed mangatatawen a korte nen Jehova? Sinalita nen Pablo so nengneng na impamasantos nen Jesus ed kongregasyon, “a nilinisan to ed ames na danum diad panamegley na salita.” (Efeso 5:26) Sakbay na impatey to, imbaga nen Jesus ed saray babangatan to: “Sikayo la so alinisan lapud salita a sinalitak ed sikayo.” (Juan 15:3) Sirin, sayan dayat a salming a singa kristal so nepeg a mangirepresenta ed panaglinis, say nikurit a Salita na Dios. Saraman so wala ed maarin inkasaserdote a linmoob ed kiwawala nen Jehova so nagnap ya alinisan ed panamegley na Salita to.
Nia—“Apatiran Mabilay a Pinalsa”!
18. Anto so anengneng nen Juan ed pegley tan liberliber na trono?
18 Naimatonan natan nen Juan so sananey a nengneng. Insulat to: “Tan diad pegley na trono tan liber na trono et wala so apatiran mabilay a pinalsa a napno na saray mata ed arap tan beneg.”—Apocalipsis 4:6b.
19. Anto so iretrato na apatiran mabilay a pinalsa, tan panon so pikabat tayo ed saya?
19 Anto so ireretrato na sarayan pinalsa? Sakey a pasingawey ya inreport na sananey a propeta, si Ezequiel, so ontulong ed sikatayon makalmo ed ebat. Anengneng nen Ezequiel si Jehova a nitrono ed mangatatawen a karwahe, ya inulop na saray mabilay a pinalsan walaan na saray ugalin miulibay ed saraman so deneskribe nen Juan. (Ezequiel 1:5-11, 22-28) Saginonor, anengneng lamet nen Ezequiel itan a karwahen trono ya inulop na saray mabilay a pinalsa. Diad sayan panaon, anggaman kuan, tinukoy to so mabilay iran pinalsa a bilang kerubin. (Ezequiel 10:9-15) Saray apatiran mabilay a pinalsan anengneng nen Juan so nepeg a mangirepresenta ed dakel iran kerubin na Dios—saray pinalsa ed atagey a ranko diad espiritun muyongan To. Ag-inisip nen Juan a nikadkaduma so pakanengneng ed saray kerubin ya akapueston asingger a tuloy ed inkapersona nen Jehova, lapud diad karaanan a tabernakulon oksuyan, duaran kerubin a balitok so impanengneng diad gilig na kaban na sipan, ya angirepresenta ed trono nen Jehova. Manlapud baetan na sarayan kerubin, say boses nen Jehova so angipaway ed saray ganggan ed nasyon.—Exodo 25:22; Salmo 80:1.
20. Diad anton dalan a nibagan saray apatiran mabilay a pinalsa so “wala ed pegley na trono tan ed liberliber na trono?
20 Sarayan apatiran mabilay a pinalsa so “wala ed pegley na trono tan liber na trono.” Eksakton anto so labay a kabaliksan na saya? Ituturo ton sikara so akaposisyon ed liber na trono ed ontan a nengneng a say sakey so manalalagey ed pegley na balang dapag. Sirin, saray managpatalos ed Today’s English Version so anegek ed orihinal a Griegon balikas ed onia: “akapaliber ed trono so balang dapag to.” Nansaletan, say balikas et nayarin kabaliksan ton saray apatiran mabilay a pinalsa so wala ed sentron posisyon ed tawen a kawalaan na trono. Nayarin, sikato no akin ya impatalos na The Jerusalem Bible so balikas: “diad sentro, atugyop ed liber na trono a mismo.” Say importantin bengatla et say inkaapit na saray kerubin ed trono nen Jehova, a mipara ed saramay kerubin ya anengneng nen Ezequiel ed kada suyok na organisasyonal a karwahe nen Jehova. (Ezequiel 1:15-22) Amin na saya so mitukoyan ed saray salita ed Salmo 99:1: “Si Jehova mismo so nagmaliw ya ari. . . . Sikato so manyudyurong ed tapew na saray kerubin.”
21, 22. (a) Panoy impaneskribe nen Juan ed apatiran mabilay a pinalsa (b) Anto so irepresenta na indengan na balang sakey ed saray apatiran mabilay a pinalsa?
21 Intuloy nen Juan: “Tan say inmunan mabilay a pinalsa so singa sakey a leon, tan say komaduan mabilay a pinalsa so singa sakey a kilaw a bakan kalakian, tan say komatlon mabilay a pinalsa so walaan na lupa na singa sakey a too, tan say komapat a mabilay a pinalsa so singa sakey a mantekkiab ya agila.” (Apocalipsis 4:7) Akin a sarayan apatiran mabilay a pinalsa so nengneng day nanduruma, sakey a manlapud sananey? Sarayan nikadkaduman mabilay a pinalsa so mapatnag a mangipapabitar ed espesipikon maridios iran kalidad. Ununa, wadtan so leon. Say leon so nausar ed Biblia bilang simbolo na inkakpel, nagkalautla diad pananumbok ed inkahustisya tan inkatunong. (2 Samuel 17:10; Uliran 28:1) Sirin, say leon so mangirerepresentan maong ed maridios a kalidad na makpel ya inkahustisya. (Deuteronomio 32:4; Salmo 89:14) Say komaduan mabilay a pinalsa so miulibay ed sakey a kilaw a bakan kalakian. Anton kalidad na baka so onsabi ed kaisipan yo? Diad saray Israelita say baka so mabmablin kayarian lapud biskeg to. (Uliran 14:4; nengnengen met so Job 39:9-11.) Say kilaw a baka, sirin, so mangirerepresenta na biskeg, dinamikon enerhya ya inter nen Jehova.—Salmo 62:11; Isaias 40:26.
22 Say komatlon mabilay a pinalsa so walaan na sakey a lupa a singa too. Saya so mangirepresenta ed singa-dios ya aro, lapud diad dalin et say too lambengat so apalsa ed indengan na Dios, a walaan na superlatibon kalidad na aro. (Genesis 1:26-28; Mateo 22:36-40; 1 Juan 4:8, 16) Agpanduaruwaan, saray kerubin so mangipapatnag ed sayan kalidad legan a sikara so manserbi ed liber na trono nen Jehova. Anto natan so nipaakar ed komapat a mabilay a pinalsa? Sayan sakey so singa sakey a mantekkiab ya agila ed indengan. Si Jehova a mismo so angitawag na imano diad mabiskeg a pakanengneng na agila: “Manlapud arawi et saray mata to so onnengneng.” (Job 39:29) Sirin, say agila so mangisisimbolon maong ed arawi-pakanengneng a kakabatan. Si Jehova so Subol na kakabatan. Saray kerubin to so mangaagamil na madibinon kakabatan legan a tutuloken daray ganggan to.—Uliran 2:6; Santiago 3:17.
(Ituloy ed ontumbok a paway.)