Kasin Sikayoy Singa Sakey ed Saraya?

‘MAGMAONG so pagmaliw a sakey a leon ed sakey ya agew nen say sakey a kordero ed sanlasus a taon.’ Saratan a salita so nisulat nipaakar ed si Benito Mussolini, aminsan a diktador na Italya.

Singa si Mussolini dakel a totoo so agmalabay a bilang klase na saray kordero tan karnero. Bangbalet, say kadaanan a salmistan-ari na Israel a si David so angiyabawag: “Si Jehova so managpastol ed siak; agak naani onkolang. . . . itonton toak ed abay na saray mareen a danudanum.” (Salmo 23:1, 2) On, si Jehova a Dios so Baleg a Managpastol, a mangiiter ed saray totoo na matamoy a panangasikaso bilang sikaray maamon karnero.

Saray totoo na Dios so asalita bilang piguratibon karnero ed Salmo 95:7, a nabasa tayo: “Lapu ed sikato so Dios tayo; tan sikatayo so katooan na pastolan to, tan ovejas na lima to.” Arum so nayarin manilalo ed salmista a mansalita ed “say karnero na pastolan to” tan “say katooan na lima to.” Balet dia say pamaakaran so asuni, tan saray totoo nen Jehova a mismo so abidbir bilang say karnero to. Sikara so mangagayaga ed saray gungguna na panangipastol na Dios tan sikaray itotonton na maaron lima to.

Say Anak nen Jehova, si Jesu-Kristo, so Maabig a Pastol. Mabetbet ton tinukoy iray totoo bilang karnero. Singa bilbilang, sinalita nen Jesus so sakey a “melag a pulok” tan “arum a karnero” to. (Lucas 12:32; Juan 10:14-16) Nipaakar ed saray mapaabeban malakarneron babangatan to, inkuan nen Jesus: “Saray carneroc dengelen da so voces ko, et kabat ko ra, tan ontombok ira ed siak: Et iter ko ed sikara so maando a bilay; et ag ira natawtaw angan kapigan, tan angapo so manamsam ed sikara ed limak.” (Juan 10:27, 28) Diad lima na sakey a maong a manuley, a saray uuleyan so nagunggunaan manlapu’d pakayari to, tulong, panangiwanwan, tan pananalimbeng to.​—Apocalipsis 1:16, 20; 2:1.

Anggapoy siopaman a makasingkat ed saray tuan kinmarneron totoo manlapu’d mananalimbeng a lima nen Jesus. Natan, sikatoy mangibibiig ed totoo balangla a bilang “kanding” ya onkukulang ed pabor to odino bilang “karnero” a mangayaga ed maandon bilay diad silong na uley na mangatatawen a Panarian na Dios. (Mateo 25:31-46) Napruebaan yo kasi inkasikayo a magmaliw a sakey ed saramay abendisyonan a karnero?

[Picture Credit Line ed pahina 32]

Garo Nalbandian