“Saray Lirios ed Uma”

KAANDIAN na trabaho. Itatagey na presyo. Inkaduka. Kairapan ed ekonomya. Sarayan salita so mabetbet a nipaparungtal diad saray dyaryo. Tan ipapanengneng daray irap a kidudungetan na nilaksalaksa legan a panggugunaetan dan pakanen tan kawesan iray pamilya ra tan pakawalaan na panayaman.

Parehon nanaapektoan iray mananisia tan agmananisia. Balet agbokbokor na saray mananisian manresolbi ed saratan a problema. Diad impitongtong ed mapaabeban totoo diad inmunan siglo, inkuan nen Jesus: “Imano yo ray kamanokan ed tawen, ya ag ira mantatanaman, ag ira met manaani, tan ag ira met mantipon ed kamkamalir; et say mangatatawen ya Ama yo tataganoen to ra. Ag kayo ta mamabli nen sikara?”—Mateo 6:26.

Inkuan met nen Jesus: “Omameng yo ‘ray lirios ed uma, no panon so katotobo ra; ag ira mankimey, ag ira met maniramey: Ingen kuan ko’d sikayo, ya angan si Salomon dia ed amin a karakpan to ag akawesan a singa sakey ed saraya. Et no onia so panangawes na Dios ed dika na uma, . . . ag kasi nagkalalo so pangawes to ed sikayo?”—Mateo 6:28-30.

Kasin kabaliksan na saya a say sakey a Kristiano et agla nakaukolan a mantrabaho pian manbilay? Maseguron andi! Mamapasyan mantratrabaho so Kristiano pian nabayaran iray babayaran to. Inkuan nen apostol Pablo: “Say ag mankimey, ag met komon mangan.” (2 Tesalonica 3:10) Anggaman kuan, sinononot so Kristiano ed maaron panatalima na Dios tan walaan na pananisia a say mangatatawen ya Ama to so mamabantay ed sikato. Kanian, sikato so agmanaburido ed saray kapagaan ed kabibilay. Anggan diad mairap iran panaon et iyuuna toray bengatla​—espiritual a bengabengatla—unaan. Sisiaen toray salita nen Jesus: “Ingen anapen yo ni’n onona so panarian, tan inkatonong to; et amin iraya a bengatla niarum ira ed sikayo.”—Mateo 6:33.