“Singa Agkami Makapantongtong!”
SI Michael, sakey ya abogado, so kaukolan a magmaliw a dinamikon mitatalosan. Satan so kakaukolanen na trabaho to. Balet kayari 16 a taon ed panamaley, si Michael so apaskar a mamidbir a sanen sikato so sinmenpet ed asawa to a si Adrian, say dunong to ed pitatalosan so singa naandipat. “Mantetetelan, mankokolkol, manpapasikian,” nanonotan ni nen Michael, “sikami nen Adrian so lawas agmakapanpaknaan, tan say ilalok et satan so pansawaan mi lanlamang. Siak so manuumameng no kasin ontan so panamaley, say ag-ontundan panangibalikas na ag-inkakontento tan pansyodotan. No ontan so nagawa ed nakekeraan nin panaon na panamong min dua, kaliktan kon lukposan so panamaley—aga’k manlulurey. Talagan agko nayarian ya arapen so 20, 30, 40 a taon na ontan a klase na mabetbet a pansyosyodotan tan pansasangsangan.”
Aliwa lambengat a di Michael tan Adrian so makakalikna na ontan. Saratan so kapetegan ed dakel a sanasawa a say relasyon da et naynay a kolkolan tan ontunda lambengat a magano insan ontubat lamet. Anggan say sankasimplian a tongtongan so mansumpal ed pantatamian. Sikaray “makarengel” na saray bengatlan ag-inbalikas. Nibabaga daray agda getman salitaen. Sikaray mangaataki tan mangaakusa, insan ontundan andi-esel a sisasanok. Sikara so agmansian, balet sikara so aliwan talagan ‘saksakey a laman.’ (Genesis 2:24) Say relasyon da so agmakapanpaknaan. Say isener so mansumpal ed pansian; say iyabanti met so mansumpal ed iyarap da ed saray bengatlan agda panpaknaan. Pian napaliisan so ot-ot ed dinanman a napili, sarayan sanaasawa so onabobon lan manbarongan ed balang sakey angga’d naanosan da.
Nakaukolan na saratan a sanaasawa a ‘narandan so mangaralem a simbawa’ ed panamaley da. (Uliran 1:5) Sayan panangiwanwan so naala diad Salita na Dios, say Biblia. Pepekderan na komaduan sulat nen Pablo ed si Timoteo a say Biblia so “maabig a pakaaralan, pakasumalan, pakasimbawaan.” (2 Timoteo 3:16) Saya so pansumpalan no usaren itan ed pangareglo ed aderal a pitatalosan na sanasawa, a singa nanengneng tayo.