Pananap na Niyamot a Kayamanan

NEN 1848 nalmoan so balitok ed lugar na Sutter’s Mill diad California, E.U.A. Asabi taon 1849 nilibo la so inmaarap ed saman a lugar diad ilalon sikaray biglan onyaman, tan say sankabalgan ya impananap na balitok so agawa ed awaran na Estados Unidos. Diad loob labat na sakey taon, say sankaasinggeran a doongan, diad San Francisco, so inmaligwas manlapud melag a baley angga’d nagmaliw a sakey a syudad a walaan na 25,000 a mibabaley. Say ilalon makaalmo na biglan kayamanan so apaneknekan a makapaayat a tuloy.

Kabat nen Arin Solomon na kadaanan ya Israel no panoy seet na totoon mangotkot pian anapen so akaamot a kayamanan, tan saya so tinukoy to sanen insulat to: “On, no kelyawan mo so kaisipan, tan itagey mo so voces mo nipaakar ed pakatalos; no sikato so anapen mo a singa pilak, tan sikato so osisaen mo a singa saray inyamot a kayamanan. Diad ontan natalosan mo so takot ed Jehova, tan naromog mo so pikakabat ed Dios.”​—Uliran 2:3-5.

Dakel so nagawaan mon bengatla ed balitok tan pilak, balet nagkalalo ni so nagawaan mo diad panamegley na pakatalos tan pakatebek. Saraya so ontulong ed sika a manggawa na saray dugan desisyon, manresolbi na saray problema, ontalona ed panamaley, tan makaromog na liket. (Uliran 2:11, 12) Mipadpara, say tuan pikakabat tan kakabatan so ontulong ed sikan mangamta ed Manamalsam, talosan iray gagala to, tan ontulok tan mamagayaga ed sikato. Say balitok so agmakapangiter ed sika na sarayan bengatla.

Tua iray salita na Biblia a: “Say kakabatan so sakey a sakurong unong a say kuarta et sakey a sakurong, balet say bentaha na say pikakabat et saya: iliktar na kakabatan so bilay na walaan na saya.” (Eclesiastes 7:12, New International Version) Legan a dakel so mankukugkugip ya onyaman, nagkalalon makabat so pangilukas ed Biblia tan mansukimat pian makalmo na pakatebek, pakatalos, pikakabat, tan kakabatan a tua iran kayamanan.