Singa Sakey a Kiew

“Saray anlong so gawa na saray makulangkulang a singa siak, balet say Dios lambengat so makagawa na sakey a kiew.” Diad panangidayew ed dakel a kaabigan na kakiewan, inter nen manag-anlong a si Joyce Kilmer so dayew ed Dios lapud inkapalsa ra.

Ginawa nen Jehova a Dios so kakiewan ed nanduruman nengneng, karakpan, tan usar. Namparan saray ankelag tan ankabaleg a kiew, so ontanlan agaylan dakep ya onkulang itayo ed paneskribe. Niarum ni, itatarya na kakiewan so tagano, itungo, tan siruman. Tan mantutultuloy ya aanapen na saray managdesinyo iray balon kiusaran na kiew.

Diad Biblia, say kakiewan so no maminsan et piguratibon nausar pian mangirepresenta ed saray panarian, manuley, tan indibidual. (Ezequiel 31:1-18; Daniel 4:10-26) Saray kakiewan so asalambit a misiglaotan ed maliket, mareen, tan mabunga iran kipapasen a mansumpal ed inkaari nen Jehova tan say kipawil na totoo to. (1 Awaran 16:33; Isaias 55:12; Ezequiel 34:27; 36:30) Isisipan met na Kasulatan a saray agew na totoo na Dios so magmaliw a singa ed agew na sakey a kiew. (Isaias 65:22) Saya so makabaliksan a tuloy sano moriaen tayon arum a kakiewan so manbilay na nilasus iran taon.

Inkuan na sakey a salmista na Biblia a say toon manliket ed ganggan na Dios so “mipara ed sakey a kiew a nitanem ed abay na saray ag-agos na danum, a mamapaway na bunga to no panaon to, say bolong to met ag namaga; tan antokaman a gawaen to onbona.” Say mabunan kiew a nitanem ed pasen a mansusbol so angipanonot ed salmista ed espiritual ya aligwas a panggagayagaan na samay “say gayaga to [et] wala ed gangan nen Jehova.” (Salmo 1:1-3) No peteg a panggagayagaan yo so ganggan na Dios tan say Sagradon Salita to, saray agew yo so magmaliw a singa ed saray agew na sakey a kiew. Diad tua, diad ikiwas a mitunosan ed suston pikakabat ed si Jehova a Dios tan si Jesu-Kristo, nagamoran yo so ilalo ed bilay ya andi-anggaan.​—Juan 17:3.