Say Sanok Ko Odino say Bunigas Ko?
SIOPA ta so ag-onsasanok? Nagagawa itan ed sikatayon amin. No maminsan et say sakey a nengneng na sanok so nayarin makatunongan. Balet, diad simamatuan panagsalita, agta tua a mabetbet a say sanok tayo (odino say kagrabe to) so agmakatunongan?
Say Biblia so mangibabaga ed sikatayo: “Tondaan mo so petang na olo, tan ikaindan mo so sanok; agmo gonigonen so inkasika ed antokaman a mananangoyor ed pangawa na mauges.” (Salmo 37:8) Panon inkamakabat itan a simbawa? Kasin apektoan na saya so manbayag a bunigas yo?
Diad seksion na saya a “Bunigas,” onia so kuan na The New York Times:
“Saray totoon mabetbet a grabe tan biglaan so panpasnok da odino basta ememan da so sanok tan ingongot ed kada abaloan a samet a kakulangan na arum ed sikara et papaugesen da so inkasikara. Ompan papateyen da ni ingen so inkasikara.
“Saray managsukimat so akatugyop na dakel ya impormasyon ed agano ni a mangipapanengneng a say alabas a sanok so makaderal a tuloy ed laman a misimbangan itan, odino alablabas ni ingen nen say panagsigarilyo, inkataba tan taganon mamantika bilang maples a pakarisgoan na bilay ed masabkay ya ipapatey.
“‘Ipapanengneng na impansukimat mi a say agmakatunongan, mainap a sanok so mipetekan met la ed antokaman niran kapeligroan ed bunigas a kabat mi,’ kuan nen Dr. Redford Williams, sakey a managsukimat ed medisina na saray walaay sakit ed utek diad Duke University Medical Center.”
Ipapanengneng na saray impanaral a saramay panaaburidoan dan tuloy iray kaslakan a problema ed inagew-agew a kabibilay so mamapawala na dakel a stress hormone. Say mabetbet ya isasanok da so nayarin magmaliw a sengegan na ag asimbang a manalimbeng tan makaderal iran porma na kolesterol, a sengegay mapeligron sakit ed puso.
Nayarin onebat so arum, ‘Balet talagan ontan’ak’ odino, ‘Binmaleg ak ya ontan.’ Anggaman kuan, agkabaliksan na satan ya agka la napasimbalo, diad sisisimoon a gunaet ed pangiyaplika ed simbawa na Dios. Diad dilin Bibliam, usisaen mo’y simbawa to nipaakar ed sanok tan ingongot a nisulat ed Uliran 14:29, 30; 22:24, 25; Efeso 4:26; Santiago 1:19, 20.
Diad pangiyaplika na satan a madibinon kakabatan et nayarin napaaligwas so bunigas mo tan naparukey so bilay mo. Onia so inkuan na Times: “Dakel a managsukimat so nankuan a nabawasan so kapeligroan na asasakbay ya ipapatey no saray mapasnok a totoo et paaliisan da so biglaan a panpasnok.”