Onla ed Tawen Odino ed Impierno?
“ANTORAY posibilidad a pakaonla ed tawen odino ed impierno?”
Peteg, satan so intepet na sakey a cross section na saray Amerikano ed apalabas a surbi. Impalapag na Princeton Religion Research Center iray resulta ed Religion in America 1992-1993.
Panon so pangebat mo? Antoray posibilidad a pakaonla na asawam odino arum ya inarom ed bilay ed tawen diad ipatey? Kasin isipen mon posibli a sika, odino sikara, so nayarin diad kaunoran et onla ed tawen?
Ipapanengneng na surbi a 78 porsiento so mannononot ed saray posibilidad da a pakaonla ed tawen so maabig odino sankaabigan, nagkalalo nen say bilang na inmebat na ontan ed ngalngali 40 a taon lay apalabas. Impierno? Ngalngalin 77 a porsiento so angikuan a say posibilidad ya onla diman so melag.
Kasin saray ebat da so nibabase ed suston kakabatan ed Biblia? Bueno, ngalngalin 4 ed loob na 10 so mamidbir ya onaatendi ed relihyoso iran serbisyo so lawas daiset nen say ginawa ra ed apalabas a limaran taon. Wala labat so 28 a porsyento a mankuan a mibibiang ed saray grupon manaaral na Biblia tan 27 a porsiento ed relihyoson edukasyon iran klase.
No maalwar mon aralen so Biblia, naromog mo so pigaran makasurpresa iran katuaan. Alimbawa, idadanet na Biblia a diad impatey nen Jesus et sikatoy linma ed “impierno,” a singa impangipatalos na arum a Biblia. (Gawa 2:31, King James Version; “Hades,” New World Translation) Papaneknekan met na Salita na Dios a balanglan si Arin David nisay si Juan a Managbautismo so aglinma ed tawen diad impatey. (Mateo 11:11; Gawa 2:29) Saraman so katuaan, aliwa labat ya opinyon a nanlapud sakey a relihyoson surbi.
Saray arum a katuaan so nayarin mangapekta ed sika: Ibabangat na Biblia a saray apostol nen Jesus tan limitadon bilang na arum so naala ed tawen pian manuley a kaiba nen Jesus. Anggaman ontan, say karaklan ed katooan ya inatey so linma ed kaslakan a lubok na katooan. Paolien ira na Dios, itarok tora ed bilay diad paraison dalin tekep na panilalo ed sigpot, maliket, agmanganggan bilay ed sakey a nipawil a mangaraldalin a paraiso.
Saray Tasi nen Jehova so maliket ya ontulong ed sika a mangiletneg manlapud mismon Bibliam ed say napanmatalkan a letnegan para’d satan ya ilalo.