“Inliktar Ak na Saray Tasi nen Jehova!”
KALEGANAN na sarayan kaunoran ya agew, dakel so apaneknekan a sikaray “maruksa, maingongot ed saray maabig.” (2 Timoteo 3:1, 3) Saya so apaneknekan nen Isaac, sakey a boluntaryon ministro ed sangan opisina na Watch Tower Society ed Bukig ya Aprika. Onia so salaysay to:
“Nen Enero 1992, siak so manbibiahe ed andukey a sulinek a dalan ya akalugan ed sakey a taksin kaiba na limara nin pasahero. Ginapoan kon katongtongen so biin akayurong ed abay ko, tan maliket ton inawat ed siak so nibased-Biblian brosyur.
“Bigla-bigla, ed bandad alas-kuarto na ngarem, sakey a balon kotsen andian na saray plaka so nansara ed sikami, tan say luluganan mi so namprenon bigla. Taloran ankabaleg a lalaki, a balang sakey so walaay riple, so linmabas ed basil a kotse tan biglan nilukasan da so kapot mi. ‘Paway kayo, amin yo,’ so ingal na sakey ed sikara.
“Sananey a laki so anamsam ed bag kon walaan na saray libro. Sanen anengneng ton puros literatura ed Biblia so karga to, imbasileng toy bag. ‘Anto ni wala ed sika?’ so tepet to, legan ya akatutuk ed siak so paltog to. Tampol kon inter ed sikato so kuartan walad pitakak. ‘Aya labat?’ so tepet to. Inkuanko ed sikaton siak so sakey ed saray Tasi nen Jehova tan saray Tasi et agmarunong a mantila. Sinamsam toy pitakak, anengneng to so Watch Tower identification card ko tan inkuanto, ‘Ok, Watchtower. Manalagar ka’d dia.’
“Kayari to, sinublay toy biin kinatongtong ko’d taksi. Inapura ton inekal so kuwintas to tan inter to’d sikatoy kuartan walad pitaka to. Sanen naimano na manag-salong so brosyur ed manggiwgiw a lima to, abaloan ton sikami sanulop, kanian sinenyasan to so biin miabay ed siak.
“Kaleganan to, saray arum ya armadon tulisan so siruruksan angataki ed kaiba miran biahero. Binugbog tan tinakewan da so tsuper tan ontan met ed sakey nin lakin kaiba mi. Sinamsam na matakew so kuwintas na komaduan bii. Sanen sinmunggay, pinekpek day ulo to tan say pagew to na saray paltog ya anggad sikatoy inatey. Say komatlon bii so ingguyor manlapud luluganan tan pinaltog ed pagew. Makapaermen ya ibaga, a sikato met so inatey. Siak lambengat tan say biin kaibak so tinaynan ya ag-asakitan a balot.
“Sanen sikami inlugan na sakey a dinmalan a motorista ed saginonor, naulit-ulit ya imbaga na ataktakot a biin, ‘Inliktar ak na saray Tasi nen Jehova!’”