Say Sankabalgan a Toon Nambilay ed Kapiganman

Kapitulo 10

Saray Panagbaroy ed Jerusalem

Asabi panaon na subol. Tan panaon la para’d pamilya nen Jose, kaiba iray kakaaro tan kakanayon, pian gawaen lamet so tinaon a panagbaroy ed Jerusalem pian selebraan so Paskua ed panao’y subol. Diad isisipot dan pambaroy ed ngalngali 100-kilometro, wadtan so gendat a liket. Si Jesus natan so mantaon la na 12, tan pialagar to a tekep na nikadkaduman interes so panagselebra.

Para’d si Jesus tan say pamilya to, say Paskua so aliwa lambengat a sakey-agew ya okasyon. Sikara met so mansiasiansia para’d ontumbok a pitoy-agew a Panagselebra na Andi-lebadura iran Tinapay, ya ipapasen dan kabiangan na panaon na Paskua. Bilang resulta, say interon panagbaroy manlapud abung da ed Nazareth, tekep na pansiansia ra ed Jerusalem, et sabien to’y ngalngali duay simba. Balet ed saman a taon, lapud bengatlan mangilalanor ed kinen Jesus, saya so mabaybayag.

Pinmatnag so problema ed panagbaroy da a pasempet manlapud Jerusalem. Impasen nen Jose tan si Maria a si Jesus so wala ed grupo na saray kakanayon tan kakaaro a kaiban manbabaroy. Ingen ta sikato so agnaimano sanen sikaray tinmunda ed labi, tan nilaran inanap ed saray kakaiba ra a manbabaroy. Sikato so agnaromog. Kanian si Jose tan Maria so pinmawil ed Jerusalem pian sikatoy anapen.

Sanagew a sikato so inanap da, balet ta agda nalmo. Onkomaduan agew et agda nin siansia naromog. Kaunoran, ed komatlon agew, sikara so linma ed templo. Diman, ed sakey ed saray kuarto, anengneng da si Jesus ya akayurong ed limog na saray Judion managbangat, ya ontatalineng tan mantetepet ed sikara.

“Anak, akin a ginawam iya ed sikami?” tepet nen Maria. “Nia say amam tan siak so awetwet la a manaanap ed sika.”

Mankelaw si Jesus no akin ta agda amta no iner so pakaromogan ed sikato. “Akin a kinaukolan yo ak ya anapen?” tepet to. “Agyo ta amta a nepeg ko so mansiansia ed abung na Amak?”

Agnatalosan nen Jesus no akin ya ag-amta na saray ateng to iya. Diad saman, si Jesus so sinmempet a kaiba to iray ateng to tan nantultuloy a nanpasakup ed sikara. Sikato so nantultuloy ya inmaligwas ed kakabatan tan ed pisikal tan ed pabor na Dios tan totoo. On, manlapud inkaugaw to a manpatuloy, si Jesus so angiter na maabig ya ehemplo ya aliwa lambengat ed pananap na espiritual ya interes noagta ontan met ed pangipanengneng na respeto ed saray ateng. Lucas 2:40-52; 22:7.

▪ Anton panaon na subol a panagbaroy so regular a gagawaen nen Jesus a kaiba so pamilya to, tan kaunongan kabayag iya?

▪ Anto so agawa legan na panbabaroy da sanen si Jesus so mantaon na 12?

▪ Anton ehemplo so inter nen Jesus para’d saray tobonbalo natan?