Say Sankabalgan a Toon Nambilay ed Kapiganman

Kapitulo 16

Seseg para’d Panagdayew ed si Jehova

Saray agagi nen Jesus ed ina​—saray arum ya anak nen Maria—​et sikara di Santiago, Jose, Simon, tan Judas. Sakbay na saraya so manbaroy a kaiba nen Jesus tan saray babangatan to a mamaarap ed Capernaum, a sakey a syudad ya asingger ed Dayat na Galilea, nayarin sikara so tinmunda ed abung da ed Nazareth pian say pamilya so makapanbalkot na saray bengatlan kaukolanen da.

Balet akin ya oonla si Jesus ed Capernaum imbis ya ituloy to so ministeryo to ed Cana, ed Nazareth, odino ed arum a lugar ed kapokdolan na Galilea? Sakey ni, say Capernaum so lalon kabkabat tan mapatnag a babaleg a syudad. Ontan met, dakel ed saray balobalon babangatan nen Jesus so manaayam odino asingger ed Capernaum, kanian agda la kaukolan a taynan iray abung da pian sikaray makaawat na panagsanay manlapud sikato.

Legan na pansiasiansia to ed Capernaum, si Jesus so nanggawa na saray mamilagron kimey, a singa pinaneknekan to a dili ed sinmaginonor iran bulan. Balet ag-abayag et si Jesus tan saray kakaiba to so wala lamet ed lansangan. Saman et premabera, tan sikara so mamapaarap ed Jerusalem pian atendian so Paskua na 30 K.P. Legan a wadman ira, anengneng na saray babangatan to so bengatlan nipaakar ed si Jesus a nayarin agda ni anengneng nen saman.

Unong ed Ganggan na Dios, saray Israelita so nakaukolan a mangibagat na saray ayep. Kanian, pian magmaliw a mainomay para’d sikara, saray managlako ed Jerusalem so manlalako na saray ayep odino saray manok para’d sayan gagala. Balet ta sikara so manlalako ed loob mismo na templo, tan sasaolen daray totoo diad alablabas a panisingil da ed sikara.

Napno na baleg a sanok, si Jesus so nanggawa na lubir a latiko tan sinunson to iraman a managlako a papaway. Inbuyandak to iramay barya na managsalat na kuarta tan binalintuag iray lamisaan da. “Ekal yo irayan bengatla manlapud dia!” so kelyaw to ed saramay manlalako na malapati. “Agyo gagawaen so abung nen Amak ya abung na tagilako!”

Sanen anengneng iya na saray babangatan nen Jesus, anonotan da so propesiya nipaakar ed Anak na Dios: “Say seseg para’d abung mo so manakmon ed siak.” Balet intepet na saray Judio: “Anton tanda so ipanengneng mo ed sikami, lapud sarayan bengatla so gagawaen mo?” Inmebat si Jesus: “Igeba yo iyan templo, tan diad taloran agew et ipaalagey ko.”

Impasen na saray Judio a si Jesus so manasalita nipaakar ed literal a templo, tan kanian intepet da: “Sayan templo so impaalagey ed apataplo tan anem a taon, tan ipaalagey mo ed taloran agew?” Anggaman kuan, si Jesus so manasalita nipaakar ed templo na laman to. Tan taloran taon ed saginonor, anonotan na saray babangatan to so ibabaga to sanen sikato so pinaoli manlapud saray inaatey. Juan 2:12-22; Mateo 13:55; Lucas 4:23.

▪ Kayari na bansal ed Cana, diad antoran lugar a si Jesus so nambaroy?

▪ Akin a si Jesus so napno na sanok, tan anto so ginawa to?

▪ Anto so anonotan na saray babangatan nen Jesus ed impakanengneng da ed inkiwas to?

▪ Anto so imbaga nen Jesus nipaakar ed “sayan templo,” tan anto so labay to ya ibaga?