Si Abraham​—Imponpon Dia, Balet Mabilay?

Diad loob na nilasus a taon, saray Judio, Muslim, tan saray Kristiano so nambaroy ya amaarap ed sayan pasen.

Napasyar mo iya ed kadaanan a syudad na Hebron, ya abalaten na Jerusalem. Sayan paalagey so tatawagen a Haram el-Khalil tan say Pantyon na saray Patriarka. On, saya so malaknab a bibidbiren bilang panagponponan na saray patriarka a singa si Abraham, Isaac, tan si Jacob, ontan met ed kaasawaan da a si Sara, Rebeca, tan Lea.

Tandaan manlapud Biblia diad impatey na pinabli ton asawa, si Sara, sinaliw nen Abraham so sakey ya ungib tan pigaran dalin ed Macpela, ya asingger ed Hebron pian pasen a pangiponponan. (Genesis 23:2-20) Diad saginonor, si Abraham so imponpon met dia, pati arum niran membro na pamilya. Kayari na nilasus a taon, diad liber na tradisyonal a panagponponan, si Herod a Baleg so angipaalagey na sakey a baleg a paalagey ya ag-abayag et inapiger tan pinabaleg na saray konkestador, a mangipapatnag ed dilin relihyoson sisisiaen da.

Diad iloob lambengat, et nanengneng mo so anemiran cenotaphs (saray monumento odino pantyon ya anggapoy karga). Diad sayan retrato et nanengneng imay para’d si Isaac, ya ilalak nen Abraham. Asingger ed satan et walaray botbot ya onlampas ed datal, ya uusaren pian nasabi so walad dalem. Aromog na saray imbestigador so pigaran kuarto a nayarin mankarga na dakel a kadaanan iran pukel.

Komusta met si Abraham? No sikatoy niponpon la ed sakey ya ungib a natan et walad dalem na sayan lugar, sikatoy abayag lan inatey, agta ontan? Mipakna so dakel ya ombibisita ditan. Ingen sakey a babaleg a propeta nen si Abraham so angikuan a diad sakey a pantalos et mabilay ni si Abraham. Panon? Anto so siglaotan na saya ed pananisiam?

Ipangasin basaen so artikulon “Saray Pinabli Yon Andi-la’d-bilay​—Iner so Kulaan Da?” (Pahina 3) Ipaparungtal to so inkuan na baleg a propeta nipaakar ed pagmaliw nen Abraham a mabilay, impormasyon a pakagunggunaan mon tuloy tan say pamilyam.