“Singa Saray Agew na Sakey a Kiew”

MASULOK a sanlibon taon lay apalabas, insulat nen Moises: “Pitomplo a taon so dukey na panbilay mi, odino nisengeg ed kaksilan walomplo a taon; et say kapangtaan da mansagpot ni tan manermen.”​—Salmo 90:10.

Anggaman ed saray iyaaligwas ed medisina, say dukey na bilay na too so siansian pareho ed agew nen Moises. Anggaman kuan, aglawas nakondenay totoo ed ontan a temporaryon kiwawala. Diad libro na Biblia ya Isaias, inkuan na Dios: “Singa saray agew na sakey a kiew ontan ira naani so saray agew na baley ko, et saray pinilik manliket ira naani a maando ed saray gawa na saray lima ra.”​—Isaias 65:22.

Sakey ed sankarukeyay-bilay iran kiew diad daldalin na Biblia et say kiew na olibo. Saray kiew a niretrato dia so sakey ed dakel a nilibon taon laran kiew na olibo a siansian ombubulaslas diad Galilea. Kapigan a manbilay so totoo na manbayag? Isasalaysay na parehon propesiya a satan so nagawa sano palsaen na Dios so “saray balo a tawen tan balo a dalin.”​—Isaias 65:17.

Ipropropesiya met na Apocalipsis so kiletneg na “tawen a balo tan sakey a dalin a balo”​—sakey a balon mangatatawen a gobierno tan sakey a balon sosyedad na too sano say Dios et “punasen to so amin a lua ed kamataan da; tan andi gapo la naani ipatey; tan angapo la naani onnangis o dageyem, o ot-ot.”​—Apocalipsis 21:1, 4.

Sayan madibinon sipan so asingger lan nagawa. Insan, anggan saray agew na sakey a kiew ya olibo so singano 24-oras ya agew lambengat. Tan nawalaan tayo na magenap a panaon pian sigpot a pangayagaay kimey na kalimaan tayo.