‘No Panon a say Balatyang et Patataremen toy Balatyang’

DIAD pansamposampot na komatlon siglo K.P., sakey a masimoon a laki a manngaran na Anthony, ya adeskribe bilang sakey a “Kristianon Coptic,” ya inmarawi ed mundo tan angusar na 20 taon na impanbokbokor ed desierto. Akin? Sisiaen ton saya so sankaabigan a paraan pian manlingkor ed Dios. Sikato so inmunan maimpluensyan ermitanyo na Kakristianoan.

Natan, dagdaiset iray ermitanyo na Kakristianoan. Balet ondarakel lan ondarakel so mangiyaarawi na inkasikara ed sananey a paraan. Agda labay so mitongtong ed arum nipaakar ed relihyon, a liknaen dan say ontan a pitotongtong so mansumpal ed agpanpapaknaan tan kolkolan. Say panagdayew da so manunan titibukelen na basta agpamasakit ed kaparan too.

Tua, say agpamasakit ed kaparan too so kabiangan na tuan relihyon, balet mas ni so nakakaukolan. Inkuan na kadaanan a proverbio: “Diad balatyang, napatarem so mismon balatyang. Ontan so pamapatarem na sakey a too ed lupa na sananey.” (Uliran 27:17) Say katuaan et papasesegen na Biblia iray Kristiano a saniiban mantitipon, ya agda iyaarawi so inkasikaran sigpot manlapud mundo odino diad arum a Kristiano. (Juan 17:14, 15) Kuanto: “Ikonsidera tayo so sakey tan sakey pian manaayatan ed aro tan ed maabig iran gawa, ya agpapaulyanan so saniiban pandaragup tayo.” (Hebreos 10:24, 25) Tutumboken na Tastasi nen Jehova itan a simbawa. Maminpiga-piga ed sakey simba, sikaray mankakasakey a mantitipon pian ‘pataremen so lupa na sananey,’ a pabibiskegen so pananisia na saray kapananisiaan. Naiimano ran say parungtal a pantotongtong nipaakar ed Biblia so agmansusumpal ed kolkolan. Imbes, satan so mansusumpal ed pantutunosan tan kareenan. Satan so makanan kabiangan na tuan panagdayew.