“Agmipapakon Bangking”

SARAY duaran baka a nipapanengneng dia so walaan na agaylan biskeg, a nayarian dan guyoren a magmainomay so ambelat ya awi-awit. Balet panon kasi no sakey ed saray baka so sinalatay asno. Lapud say asno so memelag tan makakapuy nen say baka, nayarin onkulibandos itan diad pansipasipa ed kiew ya akakabit ed pakon kaabaray to. Sirin, tekep na maabig a rason et inkuan na ganggan na Dios ed Israel: “Agka nepeg a manbaka a panlansingen mo so baka tan asno.”​—Deuteronomio 22:10.

Nansulat si apostol Pablo na mipadparan bengatla nipaakar ed totoo. Inkuanto: “Agmipapakon bangking ed saray agmananisia.” (2 Corinto 6:14) Saya so nagkalalo lan tandaan sano mamipili na asawaen. Say panamaley so sakey a permanentin paniba, ta inkuan nen Jesu-Kristo: “Say impankasakey na Dios aleg komon a sianen na too.” (Mateo 19:6) Dakel a kasulitan so manresulta sano say sanasawa so agmanpaknaan ed saray pananisia, prinsipyo, tan kalakalat. Kanian makatunongan lambengat sirin a tumboken so simbawa na Biblia a mangasawa “dia lambengat ed Katawan.” (1 Corinto 7:39) Say piasawa ed sakey ya agmipaknaan ed saray relihyoson pananisiam so mangiparungtal na babaleg a problema nen say panpako na baka ed asno.

Say pandumaan ed relihyoson pananisia so sakey lambengat a sengegan ed sanasawa a nipakon bangking. Saray prospektibon kapareha​—anggamano kapanisiaan—​so nagunggunaan diad pantepet, ‘Kasin manpara kami na saray kalat? Iner so panayaman mi? Siopa so manasikaso na badyet? Kasin mantrabaho kamin dua? Kasin manpamilya kami? Kasin say kaabigan tan konsiderasyon so manipkel ed panamaley?’

No maminsan, say paraan na paningbat ed ontan iran isyu so mangipatnag no kasin say pako so manpareho odino andi. Siempre, anggapoy duaran too a sigpot a manpaknaan. Anggaman ontan, no legan na pankakarawan et nayarian dan arapen tan resolbien iray problema a saniba tan no napansiansia ra so linya na pitatalosan a lukas, nayarin sikaray agmagmaliw a nipakon bangking.