“Mankakaukolan Kayo na Panagsungdo”
“MANKAKAUKOLAN [tayo] na panagsungdo,” no labay tayon naawat so “kasumpalan na sipan.” (Hebreos 10:36) Insalaysay na sakey ya iskolar na Biblia a say Griegon salita parad “panagsungdo” ya inusar nen apostol Pablo ed sayan teksto et uusaren no maminsan pian ilitrato so “abilidad na sakey a tanaman a manbilay ed silong na mairap tan agpaborablin kipapasen.”
Diad kapalandeyan na Europa, walay ontutubo diman ya ontan a tanaman. Makapaayat, saya so tatawagen a live-forever. Siempre, sayan alpinon tanaman so agmanbilay a maando balet satan so talagan manbabayag na dakel a taon, a manrorosas na marakdakep a kada tiagew. Isasalaysay na The New Encyclopædia Britannica a say ngaran a live-forever so niiter ed tanaman lapud “bayag tan paot” na satan. (Say makasientipikon ngaran parad sarayan tanaman a klase Sempervivum so mankabaliksan met a “live-forever.”)
Makatantanda met ed sayan mapaot a tanaman et say itutubo to ed amagan tuloy iran lugar. Naromog iya ed tagey na saray alosadsar na palandey a siplogan na dagem, a ditan et say temperatura so nayarin onleksab ya anggad 35° C ed loob labat na 24 oras. Nayari met iyan onlamot ed mabaton sengat a walaay daiset a dalin to. Antoray pigaran rason a makapansungdo iya ed ontan iran mairap a kipapasen?
Say live-forever so walaay makbul iran bulong, a maalalwar a mangisisimpen na danum. Lapud saya et nagagawa ton anamoten so amin a linaew a naala manlapud uran odino natutunaw a niyebe. Sakey ni, amongkog no ontubo itan a napankakasakey day biskeg na saraya pian mapeket a tuloy ed saray mabaton suporta. Diad kilamot ed saray sengat, walaay proteksion iya sumpad saray mauges ya elemento, anggaman dagdaiset so dalin. Diad arum a salita, manbibilay itan diad panamegley na pananganamot ed mairap iran kipapasen da.
Diad espiritual a paraan, nayarin naromog tayo so inkasikatayon niwalad saray kipapasen a manubok ed kualidad na panagsungdo tayo. Anto so ontulong ed sikatayo pian makapansungdo ed silong na pakasalsali? Singa say tanaman a live-forever, nayari tayon mantipon na manangiter-bilay a danum na Salita na Dios tan maapapit a milimog ed saray tuan Kristiano parad panangantabay tan proteksion. Manuna ed amin, singa say rosas na alpino, kaukolan tayon siseseet ya onpeket ed “bato” tayo, si Jehova, ontan met ed Salita tan organisasyon to.—2 Samuel 22:3.
Talagan say tanaman a live-forever so makaroyroyon pakanonotan ya, anggan ed saray mairirap a kaliber-liber, makapansungdo tayo no anamoten tayoray naalan probisyon. Ipapaseguro nen Jehova ed sikatayo a say ontan a panagsungdo so mangitonton ed ‘pakatawir tayo na saray sipan,’ a diad literal et mankabaliksan na panbilay a maando.—Hebreos 6:12; Mateo 25:46.