“Agak Kasi Mankukugip?”
Say onggendan a report so manlalapud Malawi unong ed sakey a maawaran a “Magayagan Manangidayew” a Distrito iran Kombension na Tastasi nen Jehova a ginawa ditan legan na tiagew na 1995.
“KATONTONAN na sakey a manunan kalsada, a mamegpegley na mamasagur a baybay na Lake Malawi, sakey a karatula so impeket ed unaan a pankanawnawa diad 29 a taon. Nabasa so onia, ‘Distriton Kombension na Tastasi nen Jehova.’
“Sakey a baleg a trak so niparada ed abay na karatula, tan manlapud trailer to so pinawayan na masulok a 200 a delegado a nanlapud baley na Mzuzu. Tarok daray abalkot ya abe-abel, ule-ules, kaldero, timba, tagano, pantungo, tan saray Biblia pian mikasakey ed manga 3,000 ed agagi ra manlapud arum niran pasen.
“Legan miran aabrasaey agagi ed iyeepas ed trak, sinmabi met ed satan si George Chikako, 63, a mangitutulak ed bisekleta to ed kabueran, a niluganan ton duaran agew manlapud Nkhotakota. Diad loob na saray taon, aprison amipat si Brother Chikako bilang resulta na agto pangikompromiso ed saray prinsipyoy Biblia. Say kapinsan to so inatey ed panagpekpek a naawat to legan na inkikulong. ‘Agak kasi mankukugip?’ tepet nen Brother Chikako. ‘Parungtalan a ginawa iyan kombension, tan maksil so pangankansion na sarayan totoo na saray kantay Panarian! Diad loob na dakel a taon, kinaukolan mi mandaragup ed kabilungetan na labi, iyesaes iray kantay Panarian, tan igupo-gupo iray lima mi bilang pantipak. Natan et sipaparungtal kamin mandaragup, tan nabibigla iray totoo a nanengneng a dakel itayon tuloy bangta inisip dan pigpigara tayo lambengat!’
“Inarál so kombension na kawayan tan inatepan na saray talaib. Ankekelag ya alolong tan anggapoy-dingding a dormitoryo so impaalagey pian panpundoan na saray delegado. Say dagem ed labi so napapano na tanol na marakep a mantutunosan iran boses ya agla pepepeen na takot na panamasegsegang.
“Agaylan matukoy iman a kombension a walaan na tema ton ‘Magayaga Iran Manangidayew’!”
[Credit Line]
Mountain High Maps® Copyright © 1995 Digital Wisdom, Inc.