Ibibisita ed Insipan a Dalin
BILBILANG ta imbaga na sakey a kaaron insaliwan to ka—bilang sakey a regalo—balon abung ed pegley na marakep tan mareen a kaliberliber. ‘Anto kasi so itsura to?’ nayarin pan-umamengan mo. Andi duaruwan magunaet mon nanengneng a mismo iyan abung, looban tan nengnengen a maong so balang kuarto. Tutal, kayarian mo met iyan balon ayaman!
Nen 1473 K.K.P., pinatawiran nen Jehova na balon ayaman so nasyon na kadaanan ya Israel—say Insipan a Dalin, sakey a pandukey a teritorya a mansukat na ngalngali 500 kilometro manlapud amianen ya anggad abalaten tan 55 kilometro a kaawang, ed promedyo.a Lapud walad atawag a Fertile Crescent, say Insipan a Dalin so makapalikliket a pasen a panayaman, a benendisyonan na inkasikato na nikaduma iran kipapasen to.
Balet akin et interesado ka natan ed sakey ya “ayaman” a satan so niiter ed sananey, nagkalalo la ed sakey a manbibilay ed abayag lan panaon? Lapud say pikakabat ed sayan maawaran a dalin so mamadaak na apresasyon mo ed saray salaysay na Biblia. “Diad dalin na Biblia,” insulat nen inatey lan Propesor a si Yohanan Aharoni, “say heograpiya tan awaran so ontanlan impanulop a dinanman ed saratan so agpeteg a natalosan no anggapoy tulong na sakey.” Niarum ni, diad kapantokan to say Insipan a Dalin so makapangiter na melag a laknab na alimbawa ed no anto so kabaliksan na Paraiso diad silong na Panarian na Dios parad katooan ed interon dalin!—Isaias 11:9.
Legan na mangaraldalin a ministeryo to, inusar nen Jesu-Kristo so kaslakan a nanengneng ed Insipan a Dalin pian mangibangat na praktikal iran leksion. (Mateo 13:24-32; 25:31-46; Lucas 13:6-9) Makaaral itayo met na dakel ed praktikal a paraan diad pangonsidera ed saray nengneng na kadaanan a Palestina. Kanian pasyaren tayo pa iray pigaran kuarto to, a singa panangibaga, a nengnengen a maong so pigaran nikaduman kipapasen na sayan dalin a kinmana bilang ayaman na totoo na Dios ed dakel a siglo. Singa nanengneng tayo, dakel so naaralan tayo manlapud Insipan a Dalin.
[Paimano ed leksab]
a Say inkiusar na “Insipan a Dalin” ed sarayan artikulo so manmomoria ed pamaakaran manlapud kipapasen na kadaanan a panaon, a singa nipresenta ed Biblia, tan andian na pibabali ed modernon pulitikal/relihyoson pangakayaryan ed rehyon.
[Picture Credit Line ed pahina 2]
Apis: Pictorial Archive (Near Eastern History) Est.
[Picture Credit Line ed pahina 3]
Garo Nalbandian