Kasumpalan ed Propesiya na Biblia

AKAPARAYAG diad Imperial War Museum ed London, Inglatera, so sakey a nikaduman relo tan sakey ya electronic digital counter. Legan ya onaandar so relo, ompipitik so counter kapag 3.31 segundo. Kada pitik et sakey a bilang so niaarum ed dagup. Say kada pitik, kada bilang, et mangirerepresenta ed sakey a laki, bii, odino ugaw ya inatey lapud bakal ed sayan siglo.

Inggapo na counter so impankuenta to ed saya nen Hunyo 1989 tan iilaloan a nakompleto so panbilang ed pegley-labi ed bisperas na taon 2000. Diad satan a panaon et say numero na counter so mangirehistro na sanlasus milyon​—say apadesiran a bilang na misiglaotan ed bakal iran ipapatey ed interon koma-20 siglo.

Ngalngali 2,000 a taon lay apalabas, impasakbay nen Jesu-Kristo so panaon a pakapatnagay ‘iyalagey na nasyon sumpa ed nasyon tan panarian sumpa ed panarian.’ Kanian, abayag lan ipupulong na Tastasi nen Jehova a say makaderal iran bakal ed sayan siglo, tekep lay dakel a yegyeg, salot, kakulangan na tagano, tan arum iran kasumpalan, so nantutugyop a prueban sikatayo lay manbibilay ed “kaunoran iran agew”​—say peryodo na panaon a katumbokay inkiletneg nen Kristo ed tawen bilang Ari ed taon 1914.​—Lucas 21:10, 11; 2 Timoteo 3:1.

Diad panguusar ed Biblia bilang autoridad to, iyaanunsio na Say Panag-Bantayan so maong a balita a magano lan deralen na Panarian na Dios iray managpairap tan pagmaliwen to a paraiso iyan dalin. Tan komusta met so nipaakar ed arapen a pambabakal? Isasalaysay na Biblia: “Gala, ta nengneng mo so saray gawa nen Jehova, no anto a kaingewan so ginawa to dia ed dalin. Sikato patundaen to so bakabakal angga ed sampot na dalin. Sikato balbalen to so bekang tan puteren to a mankadua so gayang; sikato ipool to so karosa [na bakal] ed apuy.”​—Salmo 46:8, 9.

[Picture Credit Line ed pahina 32]

Relo: Kortesiya na Imperial War Museum