“Inebatan nen Jehova Iray Pikakasik!”

DIAD sankamundoan, mangikokondukta iray Tastasi nen Jehova na ngalngali limaran milyon a panangiyaral na Biblia ed totoon interesado ed pakagamor na suston pikakabat nipaakar ed Dios tan say makapakelaw a gagala to parad katooan. Anggan saray ugugaw ed limog na Tastasi nen Jehova so mibibiang ed sayan kimey. Alimbawa, konsideraen pay sakey ya ugaw a laki a manngaran na Joel. Insimbolo toy dedikasyon to ed si Jehova tan abautismoan diad edad a siamera. Sakey taon ed saginonor sikatoy awalaan na onian eksperiensia:

“Legan a walad ministeryo, akabat ko so sakey a bii a manngaran na Candy. Inyopresik ed sikato so brosyur a ‘Nia! Gagawaen Kon Balo so Amin a Bengatla.’ Walaan la na onia, kanian inyopresik so libron Makapambilay Kayo na Ando lan Ando ed Paraiso diad Dalin. Sikatoy walaan met la na satan. Insan inisip kon, ‘Opresian ko iyan bii na panagaral ed Biblia.’ Inawat to!

“Akiayam so agin bii nen Candy, ya ompatey la lapud kanser. Niarum ni, si Candy so manaaral pian magmaliw a nars. Kanian diad pigaran panaon, say panagaral ed Biblia so nitunda. Balet siak tan say atateng ko so nantultuloy ya akapitalosan ed sikato diad pangititilak na saray magasin ed sikato odino ed asawa to, si Dick. Imbaga to ed sikami ya iiyan toray magasin ed dukolan to tan babasaen to iratan ed labi.

“Saginonor et inatey so agi nen Candy. Kinatongtong mi di Tatay tan Nanay ko si Candy nipaakar ed kipapasen na inaatey. Deneside ton itultuloy so panagaral ed Biblia. Diad sakey a duman agew, tinepetan mi si Dick no kasin labay toy miaral a kabansag si Candy tan gawaen itan a panpamilyan panagaral. Inisip ton maabig iman ya ideya. Kanian natan, kaiba si Tatay, iyaaralan koy Dick tan Candy. Marakep so iyaaligwas da tan ibabalikas da so apresasyon ed panagaral ed Biblia.

“Manpipikasi ak a nawalaan na panangiyaral ed Biblia, tan inebatan nen Jehova iray pikakasik!”