‘Interesado Iran Ontulong ed Arum’
ONTAN so imbaga na sakey a polis ed New York City nipaakar ed Tastasi nen Jehova. Say katongtong to et si Kathleen, sakey ed saray sigpot-panaon a boluntaryon manlilingkor ed sankamundoan a hedkuarter na Tastasi nen Jehova ed Brooklyn, New York.
Legan a manpapaeses kayari panangugto, ed sakey ya ampetang tan maagew a panaon na otonyo, yinmurong si Kathleen ed sakey a bangko ya asingger ed Promenade. Ondedengel ed sakey ya audiocassette player diad panamegley na headphones. Diad sakey a panagpatekkiaban na saray helikopter ed basil na East River, walaray gagawaen a preparasyon parad iyalis na papa, ya onbibisita ed saman ed syudad. Istrikto so seguridad ed inerman, tan dakel a polis so manpapatrolya ed Promenade. Sakey ed sikara so inmasingger ed si Kathleen tan nantepet no anto so gagawaen to. Inmebat si Kathleen: “Ondedengel ak ed sakey a tape ed lenguahen Ruso. Amta yo, sakey ak ed Tastasi nen Jehova, tan labay kon naaralay Ruso pian nipanabang ko so maong a balita na Panarian na Dios ed totoon mansasalita na Ruso ya oonla’d dia a manayam ed syudad.”
Inmebat so polis a nankalkalnan pandinayewan to so Tastasi nen Jehova ed apalabas lan 15 taon ed pagmamaliw ton sakey a polis ed New York City. Inkuanto: “Ipapasen kon sakey ya organisadon relihyon so Tastasi nen Jehova a saray membro to so talagan interesadon ontulong ed arum ed komunidad.”
Saray Tastasi nen Jehova so kabkabat ed interon mundo lapud panagpulong da ed kabkaabungan. (Gawa 20:20) Legan ya ibabangat da so Panarian na Dios bilang say mogmon solusyon ed saray problema a manasalot ed katooan, tutulongan da met so totoo a paaligwasen so kualidad na bilay da diad pamaseseg da ed sikaran iyaplika iray prinsipyo na Biblia ed inagew-agew a bilay da. Alimbawa, papasesegen na Tastasi iray ateng a mangitarya na sakey a kaliberliber ed ayaman a makapaingganyo ed panaral. Sisimbawaen daray indibidual a magmaliw a matua tan matulok ed ley, papasesegen daran mangamor na saray panangipasal tan kualidades a naromog na saray managpatrabahon makana.
On, interesadon tuloy iray Tastasi nen Jehova ya ontulong ed totoo pian paaligwasen so bilay da. Sika met so masimoon ya iimbitaan ya onkiwas ed onggendan ya opresi.