Tinmalindeg Iran Malet ed Utel na Panamasegsegang na Nazi
Sankanengneng so pandumaan na andi-takot ya integridad na Tastasi nen Jehova ed Nazi Germany tan say alagey na saray iglesia na Kakristianoan. Impaimano iya na propesor ed awaran a si John Weiss ed libro ton Ideology of Death. Oniay insulat to:
“Nen 1934 et impilit na Ebanghelikon iglesia a saray Nazi so nepeg ya ‘abrasaen na Lutheranismo,’ tan pisalamatan so ‘Dios a Katawan’ diad impangiter to’d saray Aleman na sakey a ‘maridios tan napanmatalkan a katawan.’ . . . Nansulat so sakey a Protestantin obispo ed klero to, ‘[Si Hitler] so imbaki na Dios ed sikatayo.’” Intuloy ni nen Weiss: “Say Aleman ya iglesian Methodista . . . so inmabobon ed Obispon Dibelius ya insalba nen Hitler so Alemanya manlapud paganigani lan Bolshevik rebolusyon, ya akapangitarok na kareenan tan inkaligen. . . . Binilin na iglesian Mormon iray membro to a say isumpa ed si Hitler et sakey a panamuyak ed ganggan na Mormon.” Tan inyarum to: “Nipurek ed saray Katoliko a sagradon susumpalen so itulok ed balon estado, sakey a susumpalen ya aglan balot inekal anggan ayari lay makapatalagnaw iran agawgawa’d bukig (Eastern Europe) ya amta na klero.”
Komusta balet iray Tastasi nen Jehova? Impalinew nen Propesor Weiss a “bilang sakey a grupo, saray Tastasi nen Jehova lambengat so sinmumpa’d saray Nazi.” Nilibo ed sikara so pinapatey, oniay intuloy nen Propesor Weiss, “ingen nibulos komon so siopaman a Tasi ya impisok ed panangipangawan a kampo no manpirma labat ed sakey a dokumenton mangibuburi’d pananisia to.”
Nipaakar ed integridad na Tastasi nen Jehova, inkomento nen Propesor Weiss: “Iyiilustra na alimbawa ra so nikadkaduman inkapekder tan palbayanin inkabiskeg a ginawa nensaman ed asasakbay ya Inkakristiano sakbay na inkiletneg bilang sakey ya institusion tan pibabali ed sosyedad so anaeg ed pilalek a manbilay ya agmikokompromiso. A singa insulat na sakey a Protestantin pastor nipaakar ed sikara, ‘Anggapo ed saray iglesia, noagta sarayan pinagpauges tan minudmoran totoo so akatalindeg sumpad sanok na demonyoy Nazi, tan makpel a tuloy a mangiwaklit ed pikokompromiso unong ed pananisia ra.’”