Naadornoan na Ikaw a Balitok

NANLAPULA’D sankasakbayan iran panaon, saray alahas a balitok so seselengen lapud kablian tan inkadakep to. Diad impagmaliw ton primo ministro ed Ehipto, akaawat si Jose na kulintas a balitok a nanlapud si Faraon. (Genesis 41:42) Naikdan si Rebeca na balitok a singsing ed eleng tan duaran balitok a pursilas, a mankantidad natan na ngalngali $1,400 (U.S.). (Genesis 24:22) Agpanduaruwaan, sarayan mablin regalo so inawat tekep na otang a linawa tan insulong tekep na panliket.

Walay sasaglawien na Biblia a piguratibon alahas a mablin tuloy nen say insulong di Jose tan Rebeca. Oniay ibabaga na Uliran 25:12: “Singa ikaw a balitok, tan agamil a dalisay a balitok, ontan so makabat a mamaat ed matulok a layag.” Sano say managkonseho so manisimbawa base’d Salitay Dios imbes ed dili ton opinyon, sikatoy peteg a manginanabang na importantin regalo. Akin? Lapud diad unor et satan a konseho so manlalapud si Jehova a mismo. Ibabaga ed sikatayo na Biblia: “Ana’ ko, agmo mudmoraen so pananusa nen Jehova; agka met onsawa ed panamaat to. Ta say aroen nen Jehova baaten to, singa sakey ya ama a manliket ed anak.” (Uliran 3:11, 12) Sano sipapaabeban awaten tan iyaplika na ondedengel so konseho, singa to aadornoan so inkasikato na ikaw a balitok. Mitukoyan itan ed ibabaga na apuyanan a proverbioy Biblia: “Mapalar so too a makaromog na kakabatan, tan say too a makagamor na pakatalos. Ta say pakagamor ed sikato magmaong nen say pakagamor ed pilak, tan say pinabangan ed sikato magmaong nen say dalisay a balitok.”​—Uliran 3:13, 14.