Kasin Nibiig Moy Duga Manlapud Aliwa?

“Akapatey ak na ngalngalin 25 a totoo. . . . Kada labi tan kada agew et onseseksek ed kanonotan ko. Walaray labin nababangongot ak. . . . Makakaonla ak ed arum a lugar tan makakanengneng ak na lupa a pakanonotan ko’d totoon pinapatey ko. Talagan singak nanenengneng itan, a singano nagagawa natan, natan a mismo. . . . Agko naperdonay inkasiak lapud bengabengatlan ginawak.”​—V.S.

“Niganggan ak ya onlusob diman tan pateyen iray kalaban. . . . Turturobos ak la, lalaki man, bibii tan ugugaw. . . . Nensaman ni tan anggad natan et gagawaen koy unong ya inkidirehian ko, tan ginawak iray ingganggan ed siak tan agko impasen a mauges so panggawa’d satan.”​—W.C.

NEN Marso 16, 1968, say duaran lalaki ya abitla ed tagey so akibiang ed inyabawag ed saginonor bilang maruksan tuloy a krimen ed bakal. Sikara, kaibay arum a sundalo, so linmusob ed melag a baryo ed Vietnam tan pinapatey so nilasus a sibilyan​—pati bibii, ugugaw, tan mamasiken. Balet imanoen so mandumaan a reaksion na sarayan duaran sundalo. Say inmunan sundalo so mapatnag a nagugurdo lapud ginawa to. Impasen na komadua a saray ginawa to et unong ed ley. Akin a mandumaan a tuloy so reaksion na duaran totoo ed parehon inkagawa?

Walay pikoneksion na ebat ed konsiensia​—sakey a pakayarin inter na Dios ya ontulong ed sikatayon mansuri ed inkasikatayo tan manhusga ed saray kiwas tan intension tayo. Say konsiensia so mangipapalikna ed sikatayo no antoy duga tan aliwa.

Sano mandedesisyon, walaray totoon ombaling ed kaslakan a diparan, “Paiwanwan ka’d konsiensiam.” Balet, makapaermen, say konsiensia et aglawas napanmatalkan. On, dakel so akapangitepel tan nanggawa ni ingen na grabe iran inkaruksa, tan ag-iran balot nakokonsiensia. (Juan 16:2; Gawa 8:1) Singa inkuan na English novelist a si Samuel Butler, say konsiensia “so mangibabaliwala la ed saramay agmanpirawat ya ondengel ed satan.”

Kasin napanmatalkan moy konsiensiam? Say ebat so mandedependin tuloy ed kipapasal ton maong, a singa ipanengneng na ontumbok ya artikulo.

[Picture Credit Line ed pahina 3]

Tagey ya eksena ed bakal: Nilitrato na U.S. Signal Corps