‘Ibangat so Anak’

KAKAUKOLANEN na matalonan panagtanaman so mas nen say pangisibwag na saray bukel ed dalin insan pawilen iratan kayari pigaran bulan pian anien la. Nakakaukolan so impasyan kimey ed pangiprepara’d dalin, pangitanem ed saray bukel, tan panparanum tan pamayubo ed saray tanaman ta pian ombuna iratan.

Sayan proseso so mangiyilustran maong ed katuaan na Uliran 22:6, a kuanto: “Ibangat mo so anak ed dalan a nepeg to a laen, tan anggan sano masiken la ag-onarawi ed sikato.” On, say panangipasal na ateng so manunan sengegan ed matalonan panagpabaleg ed ugaw.

Balet diad malukak a mundo natan, dakel ya atateng so agmanutumbok ed sayan konseho. Sano tumboken day kaslakan lan opinyon a nepeg a naaral na ananak a solbarey dili ran problema, mabetbet a makauley lay ananak dan mangasikaso ed inkasikaran dili. Say ontan a kurso et mamainomay ed saray andiay prinsipyo tan malukak a totoo a mangimpluensia ed saray ugugaw ni.​—Uliran 13:20.

Talagan magmaong so pangipurek na atateng ed saray Kristianon prinsipyo ed ananak da diad panamegley na maridios a panangipasal diad masasakbay ya edad! Panon kasakbay? ‘Manlapud inkaugaw,’ so inkuan nen apostol Pablo. Ontan so kipapasen nen ugaw nin Timoteo. Impaslep na ina nen Timoteo, si Eunice, tan si bai ton Loida so ‘masanton sulsulat’ ed sikato kanian ‘naaralan’ to tan ‘atangguyor ya anisia.’ Say resulta? Say ontan a panangipasal so walaan na importantin betang ed impagmaliw ton “makabat ed kilalaban.”​—2 Timoteo 1:5; 3:14, 15.

Ontan met natan, saray atateng ya “ag-ontutunda a manggawa na maabig” so manani na daakan a tumang no ag-ira “onkesaw.” (Galacia 6:9, NW) Onia so inkuan nen makabat ya Arin Solomon: “Say ama na matunong manliket na baleg.”​—Uliran 23:24.