Kasin Nononoten Moy Nipaakar ed Panamaley?
No ikompara tayoy nagagawan sankagloboan a diborsyo ed sakey a yegyeg, say Estados Unidos so sentro. Diad agano nin taon, masulok a sakey milyon a panamaley so abuyak diman—promedyon duara kada minuto. Balet kabkabat mo ya aliwan say Estados Unidos labat so walaay makapasinagem a kipapasen ed panamaley.
UNONG ed sakey a surbi, say bilang na diborsyo ed Canada, Inglatera tan Wales, Pransya, Gresya, tan say Netherlands et masulok ya adoble nanlapulad 1970.
Matalek tayon panisiaan a maslak a sanaasawa so mankakasal lapud manaaroan ira tan kaliktan day manamong legay-bilay da. Balet, makapaermen ta say ugagep a maliket a panamaley so mabetbet ya ontan—kugip labat. Diad pakamoria’d tuan kipapasen, dakel so mangibabagan sikaray asakbay ya angasawa odino agda apili inasawa ra odino nampara.
Akin a dakerakel so nabubuyak a panamaley? “Say manunan rason et kulang na preparasyon,” so inkuan na autor na libro nipaakar ed pankarawan. Inyarum to ni: “No midedeneng ak ed saray sanaasawan nalalanor ed desdes na panamaley et duaran liknaan so ontatalona ed siak—pakakaabagey tan pakasasanokan. Naaabagey ko ra lapud agda amoria iray ugagep da parad nantupag a makapenek a relasyon. Tan nasasanokan ak lapud inka-ignoranti ra’d inkakomplikadoy obligasyon.”
On, dakel so onloloob ed estado a samet odino anggapoy ideya ra no panon a gawaen itan a matalona. Ingen, agla pankelawan iya. Onia so inkuan na sakey ya edukador: “Kaunongan ed kalangweran tayo so mankokolehyo ya aaralen day awawey na saray otot tan tikki, balet ta agda natalosan so awawey na duaran too a tatawagen ya asawan laki tan asawan bii?”
Kasin nononoten moy nipaakar ed panamaley—balanglan nipaakar ed posiblin pangasawam ed arapen odino say panamaley mo natan? No ontan, kaukolan mon aksobien a say tua’d-bilay a relasyon so duman tuloy ed nipapanengneng ed saray pelikula, ed saray palabas ed telebisyon, tan ed saray nobela nipaakar ed karinyoan. Ontan met, say panamaley na duaran matatken lan too a talagan manaaroan so nipasen a bendision manlapud Dios. (Uliran 18:22; 19:14) Panon sirin a nasegurom ya akaparaan ka lan mangapet ed saray kakaukolanen na panamaley? Antoran sengegan so kaukolan mon nonoten diad panpili na kapareha? Odino no wala lay asawam, panon mon napabaleg so posibilidad ed kiwalay magnayon a liket ed panamaley mo?